ସାଲେପୁର,୧୯।୯(ଡି.ଏନ୍.ଏ.):ଦୁଇଟି ପଞ୍ଚାୟତର ବିବାଦ ଯୋଗୁ ବର୍ଷ ବର୍ଷ ଧରି ରାସ୍ତା ନିର୍ମାଣ ହୋଇପାରୁନାହିଁ। ଫଳରେ ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଛି। ଏହାର ପରିଣତି ସ୍ବରୂପ ରବିବାର ଜଣେ ମହିଳା ଡାକ୍ତରଖାନା ପହଞ୍ଚତ୍ବାରେ ବିଳମ୍ବ ହେବାରୁ ତାଙ୍କର ଜୀବନ ହାନି ହୋଇଥିବା ପରିବାର ଲୋକେ ଅଭିଯୋଗ କରିଛନ୍ତି।
ପ୍ରକାଶ ଯେ, ସାଲେପୁର ବ୍ଲକ ଅନ୍ତର୍ଗତ ରାଇସୁଙ୍ଗୁଡ଼ା ଓ ପିକୋଳ ଏହି ଦୁଇ ପଞ୍ଚାୟତର ବିବାଦ ଯୋଗୁ କେରେଙ୍ଗା-ମାଣିତ୍ରୀ ରାସ୍ତାକାମ ଦୀର୍ଘବର୍ଷ ଧରି ହୋଇପାରୁନାହିଁ। ଏହି ରାସ୍ତା ଅବସ୍ଥା ଶୋଚନୀୟ ହୋଇଥିବାରୁ ଆମ୍ବୁଲାନ୍ସ କିମ୍ବା ଦମକଳ ଗାଡ଼ି ଯାଇପାରୁନାହିଁ। ପିକୋଳର ଗୌରୀବାଳା ବିଶ୍ୱାଳ ଗତ ୩ଦିନ ତଳେ ଅସୁସ୍ଥ ହୋଇପଡ଼ିଥିଲେ। ରବିବାର ତାଙ୍କୁ ଡାକ୍ତରଖାନା ନେବାକୁ ଆମ୍ବୁଲାନ୍ସକୁ ଖବର ଦିଆଯାଇଥିଲା। ତେବେ ତାଙ୍କ ଘର ନିକଟକୁ ଆମ୍ବୁଲାନ୍ସ ଆସିପାରି ନ ଥିଲା। ଲୋକେ ତାଙ୍କୁ ଷ୍ଟ୍ରେଚରରେ ୧ କି.ମି. ବୋହିନେଇ ଆମ୍ବୁଲାନ୍ସରେ ସାଲେପୁର ମେଡିକାଲ ନେଇଥିଲେ। ତେବେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।
