ବୁଲଗେରିଆର ଆଞ୍ଜେଲ ବୋରାଲିଭ୍ ଜଣେ ଫୁଡ୍ ଆର୍ଟିଷ୍ଟ। ତାଙ୍କ ହାତରେ ଅଛି ଅଦ୍ଭୁତ ଯାଦୁ। ସେ ଖାଦ୍ୟକୁ ଦେଇପାରନ୍ତି ଅତି ସୁନ୍ଦର ରୂପ। ତେବେ ୭ ବର୍ଷ ତଳେ ସେ ଆରମ୍ଭ କରିଥିଲେ ଆଉ ଏକ କଳା। ଆଞ୍ଜେଲ କଖାରୁକୁ ଅତି ସୁନ୍ଦରଭାବେ ଖୋଦେଇ କରି ଭିନ୍ନ ଭିନ୍ନ ରୂପ ଦେବା ଆରମ୍ଭ କଲେ। ତେବେ କଖାରୁରେ ତିଆରି ବିଭିନ୍ନ ଚଢେଇର କଳାକୃତୀ ଦେଖିଲେ ଯେକେହି ହତବାକ ହୋଇଯାଆନ୍ତି। ଏଥିରେ ତାଙ୍କର ନିଖୁଣ କାରିଗରି ଦେଖିବାକୁ ମିଳେ। ଚଢେଇର ପର, ଥଣ୍ଟ, ଆଖି, ପଞ୍ଝା ଆଦିକୁ ସେ ଏତେ ସୁନ୍ଦରଭାବେ ଖୋଦେଇ କରନ୍ତି ଯେ, ତାହା ବେଶ୍ ବାସ୍ତବ ଲାଗେ। ପ୍ରଥମ ନଜରରେ ଜାଣି ହୁଏନା ଏହା କଖାରୁରେ ତିଆରି ବୋଲି। ଏହାବାଦ୍ ସେ ତରଭୁଜ ଓ ସାବୁନ ଖୋଦେଇ କରି ବି ବିଭିନ୍ନ କଳାକୃତି ତିଆରି କରନ୍ତି। ହେଲେ କଖାରୁରେ ତିଆରି ଚଢେଇ ପ୍ରତିକୃତିଗୁଡିକୁ ଲୋକେ ଅଧିକ ପସନ୍ଦ କରନ୍ତି।