ଭଦୋଦରା, ୨୬ା୮:ରେଳ ବିଭାଗରେ ଚାକିରି ପାଇବା ପାଇଁ ଜଣେ ଆଶାୟୀ ଅଜବ ଉପାୟ ବାଛିଛନ୍ତି। ଆବେଦନକାରୀଙ୍କ ସାଙ୍ଗ ଡମି କ୍ୟାଣ୍ଡିଡେଟ୍ ଭାବେ ପରୀକ୍ଷା କେନ୍ଦ୍ରକୁ ଯିବା ଏବଂ ବାୟୋମେଟ୍ରିକ୍ରେ ଧରା ନ ପଡ଼ିବା ପାଇଁ ଆଶାୟୀଙ୍କ ବୁଢ଼ା ଆଙ୍ଗୁଠିର ଚମଡ଼ା ନେଇଥିବା ଜଣାପଡ଼ିଛି। ପରୀକ୍ଷା କେନ୍ଦ୍ର ନିରୀକ୍ଷକ ତାଙ୍କୁ ଧରିଦେବା ପରେ ବୁଧବାର ଭଦୋଦରା ପୋଲିସ ଆଶାୟୀ ମନିଷ କୁମାର ଏବଂ ତାଙ୍କ ସାଙ୍ଗ ରାଜ୍ୟଗୁରୁ ଗୁପ୍ତାଙ୍କୁ ଗିରଫ କରିଛି।
ରିପୋର୍ଟ ଅନୁସାରେ, ରେଲଓ୍ବେ ଦ୍ୱାରା ଅନୁମତିପ୍ରାପ୍ତ ଏକ ଘରୋଇ କମ୍ପାନୀ ରେଳ ବିଭାଗର ଡି’ ଗ୍ରୁପ୍ ପରୀକ୍ଷା ଆୟୋଜନ କରିଥିଲା। ଗୁଜରାଟର ଭଦୋଦରା ସହରରେ ଅଗଷ୍ଟ ୨୨ରେ ଏହି ପରୀକ୍ଷା ଅନୁଷ୍ଠିତ ହୋଇଥିଲା। ଏଥିରେ ୬୦୦ରୁ ଅଧିକ ଆବେଦନକାରୀ ପରୀକ୍ଷା ଦେବାକୁ ଆସିଥିଲେ। କୌଣସି ଠକେଇ ରୋକିବା ପାଇଁ ବାୟୋମେଟ୍ରିକ୍ରେ ପରୀକ୍ଷାର୍ଥୀଙ୍କ ବୁଢ଼ା ଆଙ୍ଗୁଠି ଚିହ୍ନ ଆଧାର କାର୍ଡ ସହ ମ୍ୟାଚ କରାଇବା ବ୍ୟବସ୍ଥା ହୋଇଥିଲା। ମନିଷ ଏହି ପରୀକ୍ଷା ପାଇଁ ଆବେଦନ କରିଥିବାବେଳେ ବନ୍ଧୁ ରାଜ୍ୟଗୁରୁ ତାଙ୍କ ସ୍ଥାନରେ ଟେଷ୍ଟ ଦେବାକୁ ଯୋଜନା କରିଥିଲେ। ରାଜ୍ୟଗୁରୁ ପରୀକ୍ଷା ଦେଲେ ସେ ଉତ୍ତୀର୍ଣ୍ଣ ହୋଇଯିବେ ବୋଲି ମନିଷ ଭାବିଥିଲେ। ଏଥିପାଇଁ ତତଲା ତାଓ୍ବା ବ୍ୟବହାର କରି ମନିଷ ତାଙ୍କ ବୁଢ଼ା ଆଙ୍ଗୁଠି ଚମଡ଼ା ବାହାର କରିବା ସହ ତାହାକୁ ରାଜ୍ୟଗୁରୁଙ୍କୁ ଦେଇଥିଲେ। ବାୟୋମେଟ୍ରିକରେ ରାଜ୍ୟଗୁରୁ ସେହି ଚର୍ମକୁ ବ୍ୟବହାର କରିଥିଲେ। ପରୀକ୍ଷା ଦେବାବେଳେ ନିରୀକ୍ଷକ ରାଜ୍ୟଗୁରୁଙ୍କୁ ଦେଖି ସନ୍ଦେହ କରିଥିଲେ। ସେ ତାଙ୍କ ବାମ ହାତକୁ ଲୁଚାଇବାକୁ ଚେଷ୍ଟା କରୁଥିବା ଜାଣିବାକୁ ପାଇଥିଲେ। ନିରୀକ୍ଷକ ଜଣକ ତାଙ୍କ ହାତକୁ ବାହାରକୁ ଆଣି ସେଥିରେ ସାନିଟାଇଜର ସ୍ପ୍ରେ କରିଥିଲେ। ଫଳରେ ରାଜ୍ୟଗୁରୁଙ୍କ ଆଙ୍ଗୁଠିରୁ ମନିଷଙ୍କ ଚମଡ଼ା ଖସିପଡ଼ିଥିଲା।