କଳା, ସଂସ୍କୃତି ଓ ପରମ୍ପରାରେ ପରିପୂର୍ଣ୍ଣ ମୟୂରଭଞ୍ଜ ଜିଲା। ଏଠାରେ ରହିଛନ୍ତି ଅନେକ ଲୁକ୍କାୟିତ ପ୍ରତିଭା; ଯାହାକୁ ଲୋକଲୋଚନକୁ ଆଣିବାକୁ ଅଣ୍ଟା ଭିଡିଛି ୟଙ୍ଗ ମାସ୍ ଆସୋସିଏଶନ(ଓ୍ବାଇଏମ୍ଏ)। ଦୀର୍ଘ ୨୮ବର୍ଷ ଧରି ସ୍ଥାନୀୟ ଅଞ୍ଚଳର ଯୁବକମାନଙ୍କୁ ନେଇ ଗଢ଼ି ଉଠିଥିବା ଏହି ସଙ୍ଗଠନ କୁନି କୁନି ଶିଶୁ କଳାକାରଙ୍କଠାରୁ ଆରମ୍ଭ କରି ଯୁବ କଳାକାରମାନଙ୍କୁ ଆଗକୁ ବଢ଼ିବାର ସୁେଯୋଗ ଦେଇ ଚାଲିଛି। ଆଉ ଜିଲା ତଥା ରାଜ୍ୟରେ ପ୍ରଶଂସା ଲାଭ କରିଛି। ଦରିଦ୍ର ଓ ଅସହାୟ ଲୋକଙ୍କୁ ସହାୟତାର ହାତ ବଢ଼ାଇ ଚାଲିଥିବା ବେଳେ ରକ୍ତଦାନ ଭଳି ମହତ୍ ଦାନ କାର୍ଯ୍ୟକ୍ରମକୁ ବଜାୟ ରଖିଛି। ଜିଲାର ବେତନଟୀ ବ୍ଲକ ମୁଖ୍ୟାଳୟରେ ଥିବା ଓ୍ବାଇଏମ୍ଏ ସଙ୍ଗଠନ ୧୯୯୩ ଡିସେମ୍ବର ୩୧ରେ ୨୫ଜଣ ସଦସ୍ୟଙ୍କୁ ନେଇ ଆରମ୍ଭ କରାଯାଇଥିଲା, ଯାହାର ବର୍ତ୍ତମାନ ସଦସ୍ୟ ସଂଖ୍ୟା ୫୦୦। ସେବେଠୁ ସଂଗଠନ ପକ୍ଷରୁ ବୃକ୍ଷରୋପଣଠାରୁ ଆରମ୍ଭ କରି ସ୍ବଚ୍ଛତା, ମାଗଣା ସ୍ବାସ୍ଥ୍ୟ ପରୀକ୍ଷା, ଶିକ୍ଷା ବ୍ୟବସ୍ଥା ଓ ଜଳଦାନ ଭଳି ବିଭିନ୍ନ କାର୍ଯ୍ୟକ୍ରମ ଜରିଆରେ ଅଞ୍ଚଳବାସୀଙ୍କ ସହାୟତା ଭଳି କାର୍ଯ୍ୟକ୍ରମ କରାଯାଇଆସୁଛି। ବର୍ଷ ଶେଷରେ ଅର୍ଥାତ୍ ନୂଆବର୍ଷକୁ ସ୍ବାଗତ କରିବା ପାଇଁ ଦିନିକିଆ କାର୍ଯ୍ୟକ୍ରମରେ ୫ଟି ପ୍ରତିଯୋଗିତା ଅନୁଷ୍ଠିତ କରାଯାଇଥାଏ, ଯେଉଁଥିରେ ଆଖପାଖ ଅଞ୍ଚଳର ପ୍ରତିଯୋଗୀମାନେ ଅଂଶ ଗ୍ରହଣ କରିଥା’ନ୍ତି ଏବଂ କୃତୀ ପ୍ରତିଯୋଗୀଙ୍କୁ ପୁରସ୍କାର ଓ ଟ୍ରଫି ପ୍ରଦାନ କରାଯାଏ। ତେବେ ଗତବର୍ଷ ଡିସେମ୍ବର ୩୧ରୁ ଜାନୁୟାରୀ ୪ ପର୍ଯ୍ୟନ୍ତ ୫ଦିନିଆ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ୪୫ଟି ପ୍ରତିଯୋଗିତା ଅନୁଷ୍ଠିତ ହୋଇଥିବା ବେଳେ ୨ ହଜାରରୁ ଊର୍ଦ୍ଧ୍ୱ ପ୍ରତିଯୋଗୀ ଅଂଶ ଗ୍ରହଣ କରିଥିଲେ। ପ୍ରତିଦିନ ସନ୍ଧ୍ୟାରେ ଜିଲାର କଳା, ସଂସ୍କୃତି ଓ ପରମ୍ପରାକୁ ନେଇ ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା। ସିନେ ପରଦାରେ ଆଗଧାଡ଼ିର କଳାକାରମାନେ ଏଥିରେ ଉପସ୍ଥିତ ରହି ଲୋକଙ୍କ ମନୋରଞ୍ଜନ କରିଥିଲେ। ସମସ୍ତ ସଦସ୍ୟ ଶୃଙ୍ଖଳିତ ରହି କାର୍ଯ୍ୟକ୍ରମକୁ ସଫଳ କରିଚାଲିଛନ୍ତି। ସଙ୍ଗଠନ ସଭାପତି ପ୍ରଦୀପ କୁମାର ସାମଲ ଓ ସମ୍ପାଦକ ସିପୁନ ସାମଲଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବିଭିନ୍ନ କାର୍ଯ୍ୟକ୍ରମ ପରିଚାଳନା ହୋଇଥାଏ। ଆଗାମୀ ଦିନରେ ସଙ୍ଗଠନକୁ ଆହୁରି ମଜଭୁତ କରି ଅଞ୍ଚଳର ବିକାଶ କରିବା ସହ ଜିଲାର ଐତିହ୍ୟକୁ ବଜାୟ ରଖିବାକୁ ପ୍ରୟାସ ଜାରି ରହିବ ବୋଲି ସଦସ୍ୟମାନେ ମତପ୍ରକାଶ କରିଛନ୍ତି।
– ନୀଳାଦ୍ରି ବିହାରୀ ଦଣ୍ଡପାଟ