କଣିହାଁ,୨୨ା୧୦(ଡି.ଏନ୍.ଏ.): ଅନୁଗୋଳ ଜିଲା ତାଳଚେର ରେଞ୍ଜ କଣିହାଁ ବ୍ଲକ ହରିହରପୁର ପଞ୍ଚାୟତ ଏକଘରିଆ ଗ୍ରାମ ନିକଟରେ ତାଳଚେର ପାଳଲହଡ଼ା ମୁଖ୍ୟ ରାସ୍ତାରେ ଶୁକ୍ରବାର ମର୍ନିଂ ଓ୍ବାକ୍ କରୁଥିବା ସମୟରେ ଗ୍ରାମର ଯୋଗେଶ ଦେବତା (୭୦)ଙ୍କୁ ଏକ ଦନ୍ତାହାତୀ ଆକ୍ରମଣ କରବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ପ୍ରତିଦିନ ପରି ଯୋଗେଶ ଉକ୍ତ ରାସ୍ତାରେ ମର୍ନିଂ ଓ୍ବାକ୍ କରୁଥିବା ବେଳେ ଆଜି ମଧ୍ୟ ଭୋର୍ ସମୟରେ ଯାଇଥିଲେ। ହଠାତ ହାତୀଟି ରାସ୍ତାରେ ତାଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲା। ଫଳରେ ତାଙ୍କର ମୃତ୍ୟୁ ଘଟିଥିଲା।
ଖବରପାଇ ଘଟଣାସ୍ଥଳରେ ସ୍ଥାନୀୟ ଲୋକେ ରୁଣ୍ଡ ହେବା ସହିତ ଉତ୍ତେଜନା ଲାଗିରହିଥିଲା। ମୃତକଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ଦାବି କରିବା ସହିତ ଜଙ୍ଗଲ ବିଭାଗକୁ ଏଥିପାଇଁ ଦାୟୀ କରିଛନ୍ତି ଲୋକେ। ଜଙ୍ଗଲ ବିଭାଗର ଅବହେଳା ଯୋଗୁ ହାତୀ ରସ୍ତା ଘାଟରେ ଓ ଜନବସତି ସ୍ଥାନରେ ହାତୀମାନେ ବୁଲୁଛନ୍ତି ଯାହାର ସୂଚନା ଜଙ୍ଗଲ ବିଭାଗ ପାଖରେ ମଧ୍ୟ ନାହିଁ। ଫଳରେ ଲୋକଙ୍କ ଜୀବନ ଯାଉଛି । ଏହାର ପ୍ରତିକାର ଓ କ୍ଷତିପୂରଣ ଦାବିରେ ଘଟଣାସ୍ଥଳରେ ଉତ୍ତେଜନା ଲାଗିରହିଛି । କଣିହାଁ ତହସିଲଦାର ପତିତପାବନ ଦେବତା, ତାଳଚେର ରେଞ୍ଜ ଦାୟିତ୍ୱରେ ଥିବା କଣିହାଁ ରେଞ୍ଜର ନୀଳମଣି ଦେହୁରୀ, ତାଳଚେର ପୋଲିସ ପହଞ୍ଚିବା ସହିତ ଘଟଣାର ଅନୁଧ୍ୟାନ କରୁଛନ୍ତି।