ବାରିପଦା,୧୮ା୧(ନୀଳାଦ୍ରି ବିହାରୀ ଦଣ୍ଡପାଟ): ମୟୂରଭଞ୍ଜ ଜିଲା ବାରିପଦା ସହରରେ ହାତୀ ପ୍ରବେଶକୁ ନେଇ ଲୋକେ ଆତଙ୍କିତ ହୋଇଛନ୍ତି। ଗୁରୁବାର ଭୋର୍ ସମୟରେ ଏକ ହାତୀ ଏମ୍କେସି ହାଇସ୍କୁଲ ପାଚେରି ଭାଙ୍ଗି ସ୍କୁଲ ପରିସରରେ ପ୍ରବେଶ କରିଥିଲା। ସ୍କୁଲ ମଧ୍ୟରେ ବୁଲିବାରୁ ହଷ୍ଟେଲ ଛାତ୍ରମାନେ ଭୟଭୀତ ହୋଇପଡ଼ିଥିଲେ। ସ୍ଥାନୀୟ ଲୋକେ ବନ ବିଭାଗକୁ ଖବର ଦେବା ପରେ ଉଭୟ ବନ ବିଭାଗ ଏବଂ ପୋଲିସ ପ୍ରଶାସନ ସେଠାରେ ପହଞ୍ଚି ହାତୀଟିକୁ ବାହାରକୁ ଆଣିବାକୁ ଉଦ୍ୟମ କରିଥିଲେ। ପରେ ବାହାରକୁ ଆସି ବଜାରରେ ଚଳପ୍ରଚଳ କରିଥିଲା। ଏହି ଅଞ୍ଚଳରେ କୌଣସି ବ୍ୟକ୍ତିଙ୍କୁ ଘରୁ ନ ବାହାରିବା ପାଇଁ ବନ ବିଭାଗ ପକ୍ଷରୁ ନିବେଦନ କରାଯାଇଛି। ତେବେ ହାତୀଟି ଶିମିଳିପାଳ ଅଭୟାରଣ୍ୟରୁ ଖାଦ୍ୟ ଅନ୍ବେଷଣରେ ଆସିଥିବା ନେଇ ପ୍ରାଣୀପ୍ରେମୀମାନେ ପ୍ରକାଶ କରିଛନ୍ତି। ଛାତ୍ରୀଛାତ୍ରଙ୍କ ସୁରକ୍ଷାକୁ ଦୃଷ୍ଟିରେ ରଖି ଆଖପାଖ ସ୍କୁଲଗୁଡ଼ିକୁ ଜିଲା ଶିକ୍ଷାଧିକାରୀ ଛୁଟି ଘୋଷଣା କରିଛନ୍ତି। ରିପୋର୍ଟ ଲେଖା ପର୍ଯ୍ୟନ୍ତ ହାତୀଟି ବୁଢ଼ାବଳଙ୍ଗ ନଦୀକୂଳରେ ଅଟକି ରହିଛି। ବନ ବିଭାଗର କର୍ମଚାରୀମାନେ ହାତୀର ଗତିବିଧି ଉପରେ ସମ୍ପୂର୍ଣ୍ଣ ନଜର ରଖି ଲୋକଙ୍କୁ ସଚେତନତା କରୁଛନ୍ତି।