ବାରିପଦା ଅଫିସ,୨୪ା୮: ଶିମିଳିପାଳ ଜାତୀୟ ଉଦ୍ୟାନରୁ ବାଟବଣା ହୋଇଥିବା ଏକ ଦନ୍ତାହାତୀ ସୋମବାର ସକାଳେ ବାରିପଦା ସହରରେ ବୁଲୁଥିବା ଦେଖିବାକୁ ମିଳିଛି। ସକାଳୁ ସହର ମୁର୍ଗାବାଡ଼ି ଅଞ୍ଚଳରେ ଏକ ବିଶାଳ ଦନ୍ତାଟି ପଶ୍ଚିମବଙ୍ଗର ସୀମାକୁ ଲାଗିଥିବା ଘଣଘଣା ପାଲ ଜଙ୍ଗଲର ଲକ୍ଷ୍ମୀପୋଷି ପଟ ଦେଇ ବାରିପଦା ସହରକୁ ପଶି ଆସିଥିଲା । ପରେ ଦନ୍ତାଟି ବାରିପଦା ସହର ଦେଇ ଯାଇଥିବା ୧୮ନଂ ଜାତୀୟ ରାଜପଥର ମୁର୍ଗାବାଡ଼ିରୁ କୁଳିଅଣା ପ୍ରତିହାରୀପୁର ଗାଁରେ ଅଟକିଛି । ବାରିପଦା ବନ ବିଭାଗ ଓ ଦେଉଳି ବନବିଭାଗ କର୍ମଚାରୀମାନେ ହାତୀକୁ ନଜରରେ ରଖିଛନ୍ତି। ତେବେ ହାତୀଟି କାହାରି କ୍ଷୟକ୍ଷତି କରିନାହିଁ । ହାତୀକୁ ଦେଖି କିଛି ସମୟ ଗାଡ଼ି ଚଳାଚଳ ବନ୍ଦ ହୋଇଯାଇଥିଲା।
