ଟେନ୍ସା,୨୦ା୨(ଡି.ଏନ୍.ଏ.): ନିକଟସ୍ଥ ରେଙ୍ଗମାଗ୍ରାମରେ ରକ୍ତମୁଖା ଦନ୍ତାହାତୀ ଆତଙ୍କ ଖେଳାଇଛି। ବାଡ଼ିକୁ ଫସଲ ଖାଇବାକୁ ଆସି ଖାଇ ନଷ୍ଟ କରିବା ସହ ଜଣଙ୍କୁ କଚାଡ଼ି ମାରି ଦେଇଛି ଦନ୍ତାହାତୀ। ଏହିପରି ଏକ କରୁଣ ଦୃଶ୍ୟ ଦେଖିବାକୁ ମିଳିଛି ସୁନ୍ଦରଗଡ଼ ଜିଲା ବରସୁଆଁ ଫରେଷ୍ଟ ରେଞ୍ଜ ଅଞ୍ଚଳରେ। ରବିବାର ବିଳମ୍ବିତ ରାତିରେ ରେଙ୍ଗମାଗ୍ରାମରେ ଗୋଠଛଡ଼ା ରକ୍ତମୁଖା ଦନ୍ତା ଆକ୍ରମଣରେ ଜଣେ ବୃଦ୍ଧଙ୍କର ମୃତ୍ୟୁ ହୋଇଛି। ମୃତକ ହେଲେ କୋଇଡ଼ା ଫାଣ୍ଡି ନିକଟ ଡେଙ୍ଗୁଳା ପଞ୍ଚାୟତ ରେଙ୍ଗମା ଗ୍ରାମର କବି ନାଏକ(୫୫)। ବିଳମ୍ବିତ ରାତିରେ ହାତୀଟି ଆସି ରେଙ୍ଗମା ଗାଁର କବିଙ୍କ ଫସଲ ଖାଇବାକୁ ବାଡ଼ିରେ ପଶିଥିଲା। ସେହି ବାଡ଼ିରେ କବି ଏକ କୁଡ଼ିଆ କରି ଫସଲ ଜଗୁଥିଲେ। ହାତୀ ଆସିବା ଶବ୍ଦ ଶୁଣି କବି ଫୁଟବଲ ପଡ଼ିଆ ଦେଇ ଘରକୁ ଯାଉଥିବା ବେଳେ ହାତୀ ସହିତ ମୁହାଁମୁହିଁ ହୋଇଯିବାରୁ ହାତୀ ଶୁଣ୍ଡରେ ଟେକି ନେଇ କଚାଡ଼ି ଦେଇଥିଲା। ଖବର ପାଇ କୋଇଡ଼ା ପୋଲିସ ଓ ବରସୁଆଁ ବନ ବିଭାଗ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ କୋଇଡା ପଠାଇଥିବା ଜଣାପଡ଼ିଛି । ଏହି ଗୋଠଛଡ଼ା ଦନ୍ତାଟି କୋଇଡ଼ା ଓ ବରସୁଆଁ ରେଞ୍ଜ ଅଞ୍ଚଳରେ ୭ରୁ ଊର୍ଦ୍ଧ୍ୱ ଲୋକଙ୍କ ଜୀବନ ନେଲାଣି। ବାରମ୍ବାର ହାତୀ ଆକ୍ରମଣରେ ମୃତ୍ୟୁ ଘଟଣା ସାମ୍ନାକୁ ଆସୁଥିବା ବେଳେ ବନ ବିଭାଗ ଚୁପ୍ ରହିଛି। ହାତୀକୁ ଟ୍ରାଙ୍କୁଲାଇଜ କରି ଅନ୍ୟ ଜଙ୍ଗଲରେ ଛାଡ଼ିବା ପାଇଁ ଅଞ୍ଚଳବାସୀ ଅଭିଯୋଗ କାରୁଥିବା ବେଳେ ଶୁଣିବାକୁ କେହି ନାହିଁ।