କେନ୍ଦୁଝର,୬ା୪(ନରେଶ ଚନ୍ଦ୍ର ପଟ୍ଟନାୟକ): ଚମ୍ପୁଆ ରେଞ୍ଜ ଅନ୍ତର୍ଗତ ବାଲିବନ୍ଧ ବିଟର ଗମୁରା ସେକସନ ଚମକପୂର ଜଙ୍ଗଲରୁ ବନ ବିଭାଗ ଏକ ବୟସ୍କ ହାତୀର ଗଳିତ ମୃତଦେହ ଜବତ କରିଛି। ପ୍ରାୟ ଦୁଇ ସପ୍ତାହ ପୂର୍ବରୁ ହାତୀଟି ମରିଥିବା ଅନୁମାନ କରାଯାଉଛି। ଏହା ମାଈ କି ଅଣ୍ଡିରା ଜଣା ପଡ଼ିନାହିଁ। ହାତୀକୁ କେହି ମାରିଦେଇଛି କିମ୍ବା ସ୍ବାଭାବିକ ମୃତ୍ୟୁ ହୋଇଛି ତାହା ତଦନ୍ତସାପେକ୍ଷ। ଡିଏଫ୍ଓ ଧନରାଜ ଏଚ୍ଡି ସମେତ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି କାରଣ ଖୋଜୁଛନ୍ତି। ବୈତରଣୀ ନଦୀ ନିକଟରେ ଖଣ୍ଡବନ୍ଧ ଜଙ୍ଗଲାଞ୍ଚଳ ହେଉଛି ହାତୀମାନଙ୍କ ଆଶ୍ରୟସ୍ଥଳୀ। ତେବେ ଖଣି ଖାଦାନ ଯୋଗୁ ବ୍ୟାପକ ଜଙ୍ଗଲ ନଷ୍ଟ ହୋଇ ଯାଇଥିବାରୁ ବାସହରା ହୋଇ ଖାଦ୍ୟ ପାଇଁ ଏଣେ ତେଣେ ବୁଲି ମୃତାହତ ହେଉଥିବା ଅଭିଯୋଗ ହେଉଛି। ତେବେ ହାତୀମାନଙ୍କ ଗତିବିଧି ଉପରେ ଦୈନିକ ବନ ବିଭାଗ ଟ୍ରାକିଂ କରି ରିପୋର୍ଟ ଦେଉଥିବା ବେଳେ ଏହି ହାତୀର ନିଖୋଜ ବା ମୃତ୍ୟୁ ସୂଚନା କିପରି ପାଇ ପାରିଲେ ନାହିଁ ତାହାକୁ ନେଇ ବିଭାଗର କାମ କାର୍ଯ୍ୟ ଉପରେ ସନ୍ଦେହ ସୃଷ୍ଟି ହେଉଛି।