ବେଜିଂ,୧୦।୩: ନ୍ୟାଶନାଲ୍ ପିପୁଲ୍ସ କଂଗ୍ରେସ (ଏନପିସି) ର ୧୪ ତମ ବୈଠକରେ ସି ଜିନପିଙ୍ଗଙ୍କୁ ତୃତୀୟ ଥର ପାଇଁ ରାଷ୍ଟ୍ରପତି ଭାବେ ମନୋନୀତ କରାଯାଇଛି। ଏହା ତାଙ୍କ ଶକ୍ତି ଆହୁରି ବୃଦ୍ଧି କରିବ। ଶୁକ୍ରବାର ତାଙ୍କୁ ରାଷ୍ଟ୍ରପତି ଭାବରେ ତୃତୀୟ ଥର ଏହି ଦାୟିତ୍ୱ ପ୍ରଦାନ କରାଯାଇଥିଲା।
ନ୍ୟାଶନାଲ୍ ପିପୁଲ୍ସ କଂଗ୍ରେସ ମାର୍ଚ୍ଚ ୫ରେ ବାର୍ଷିକ ବୈଠକ ଆରମ୍ଭ କରିଥିଲା। ଏହି ବୈଠକ ଏକ ସପ୍ତାହ ଧରି ଚାଲିଛି। ଏଥିରେ ୬୯ ବର୍ଷିୟ ସି ଜିନପିଙ୍ଗଙ୍କ କାର୍ଯ୍ୟକାଳ ତୃତୀୟ ଥର ପାଇଁ ବୃଦ୍ଧି କରାଯାଇଛି। ଫଳରେ ଚାଇନାରେ ତାଙ୍କର ଶକ୍ତି ଆହୁରି ମଜଭୁତ ହେବ। ତେବେ ଏହି ବୈଠକରେ ନିଷ୍ପତ୍ତି ନିଆଯାଇଛି ଯେ, ଚଳିତ ବର୍ଷ ଚାଇନା ୨୦୨୩ରେ ଏହାର ପ୍ରତିରକ୍ଷା ପାଇଁ୧୮ ଲକ୍ଷ କୋଟି ଟଙ୍କା ଖର୍ଚ୍ଚ କରିବ। ଯାହା ଭାରତର ପ୍ରତିରକ୍ଷା ବଜେଟଠାରୁ ପ୍ରାୟ ୩ ଗୁଣ ଅଧିକ। ଏଥି ସହିତ, ୨୦୨୩ ପାଇଁ ଚାଇନା ଅର୍ଥନୈତିକ ଅଭିବୃଦ୍ଧିର ଲକ୍ଷ୍ୟକୁ ୫ ପ୍ରତିଶତରେ ରଖାଯାଇଛି।
ସି ଜିନପିଙ୍ଗ କ୍ଷମତାକୁ ଆସିବା ପୂର୍ବରୁ ଚାଇନା ରାଷ୍ଟ୍ରପତି ୫ ବର୍ଷୀୟ ଦୁଇଟି କାର୍ଯ୍ୟକାଳ କିମ୍ବା ୬୮ ବର୍ଷ ବୟସ ପର୍ଯ୍ୟନ୍ତ ପଦବୀରେ ରହିପାରୁଥିଲେ। କିନ୍ତୁ ୨୦୧୩ରେ କ୍ଷମତାକୁ ଆସିଥିବା ସି ଜିନପିଙ୍ଗ ଏହି ନିୟମକୁ ରଦ୍ଦ କରିଦେଇଥିଲେ। ଏହି କାରଣରୁ ସି ଜିନପିଙ୍ଗ ୬୯ ବର୍ଷ ବୟସରେ ତୃତୀୟ ଥର ପାଇଁ ଦେଶର ରାଷ୍ଟ୍ରପତି ଭାବରେ ମନୋନୀତ ହୋଇଛନ୍ତି।