କେସିଙ୍ଗା,୧୫।୮(ଡି.ଏନ୍.ଏ.): ଜୀବନ ଚାଲିଗଲା ସିନା ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ ମିଳିପାରିଲା ନାହିଁ। ଶେଷରେ ପଞ୍ଚାୟତ କାର୍ଯ୍ୟାଳୟ ବାରଣ୍ଡା ହିଁ ତାଙ୍କର ଶେଷ ଠିକଣା ହୋଇ ରହିଗଲା। ଗୋଟିଏ ପଟେ ସରକାର ରାଜ୍ୟର ଗରିବ ଶ୍ରେଣୀର ଲୋକଙ୍କ ଲାଗି ଆବାସ ଯୋଜନାରେ ଘର ଯୋଗାଇଦେଉଥିବା ନେଇ ଡିଣ୍ଡିମ ପିଟୁଥିବା ବେଳେ କେସିଙ୍ଗାରେ ଏହାର ବ୍ୟତିକ୍ରମ ଦେଖିବାକୁ ମିଳିଛି।
ସୂଚନାନୁଯାୟୀ, କଳାହାଣ୍ଡି ଜିଲା କେସିଙ୍ଗା ବ୍ଲକ ବାଲସି ପଞ୍ଚାୟତ ବୁଡିପଦର ଗ୍ରାମର ଅଗସ୍ତି ହରିଜନ ଘର ଖଣ୍ଡିଏ କରିବାକୁ ସହାୟତା ନ ପାଇ ନ ଥିଲେ। ଘରଦ୍ୱାର ନ ଥିବାରୁ ସେ ବାଲସି ପଞ୍ଚାୟତ କାର୍ଯ୍ୟାଳୟ ବାରଣ୍ଡାରେ ପରିବାର ସହ ଦୀର୍ଘଦିନରୁ ରହି ଆସୁଥିଲେ। ଆବାସ ଯୋଜନାରେ ଘର ଖଣ୍ଡିଏ ପାଇଁ ପଞ୍ଚାୟତଠାରୁ ଆରମ୍ଭ କରି ପଞ୍ଚାୟତ ସମିତି ପର୍ଯ୍ୟନ୍ତ ସେ ବାରମ୍ବାର ଦୌଡ଼ି ନିରାଶ ହୋଇଥିଲେ। ଦୀର୍ଘ ୫ଦିନ ଧରି ପ୍ରବଳ ବର୍ଷା ଓ ପବନ ଯୋଗୁ ଅଗସ୍ତି ଅସୁସ୍ଥ ହୋଇପଡ଼ିଥିଲେ। ଆର୍ଥିକ ସମସ୍ୟା ସହ ଖାଦ୍ୟପେୟର ଘୋର ଅଭାବ ରହିଥିବା ଯୋଗୁ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇଥିଲା। କେସିଙ୍ଗା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଉଥିବା ବେଳେ ସୋମବାର ସକାଳେ ତାଙ୍କର ମୃତ୍ୟୁ ଘଟିଛି। ବର୍ତ୍ତମାନ ଅଗସ୍ତିଙ୍କ ସ୍ତ୍ରୀ ଓ ୧୦ବର୍ଷର ଝିଅ ଅସହାୟ ହୋଇପଡ଼ିଛନ୍ତି। ଉଭୟଙ୍କ ପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ଖାଇବା ରହିବା ପାଇଁ ବ୍ୟବସ୍ଥା କରିବାକୁ ସାଧାରଣରେ ଦାବି ହେଉଛି। ଏ ନେଇ ବାଲସି ଗ୍ରାମ ପଞ୍ଚାୟତର ପିଇଓ ନରହରି ବାଗଙ୍କୁ ପଚାରିବାରୁ ଅଗସ୍ତି ଜ୍ବରରେ ପୀଡ଼ିତ ଥିବାରୁ ମୃତ୍ୟୁ ଘଟିଛି ବୋଲି ସେ କହିଛନ୍ତି।