ଝାରସୁଗୁଡ଼ା ଅଫିସ,୨୯ା୧: ରବିବାର ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କ ଉପରକୁ ଜଣେ ଏଏସ୍ଆଇ ବ୍ରଜରାଜନଗରରେ ଗୁଳିମାଡ଼ କରିଥିବା ପ୍ରତ୍ୟକ୍ଷଦର୍ଶୀମାନେ କହିଛନ୍ତି। ସେମାନେ କହିଛନ୍ତି, ‘ଦାଦା ସଭାସ୍ଥଳରେ ପହଞ୍ଚିବା କ୍ଷଣି ଆମେ ସ୍ବାଗତ କରିବାକୁ ଯାଇଥିଲୁ। ଏହି ସମୟରେ ପୋଲିସ ପୋଷାକରେ ଥିବା ଜଣେ ଏଏସ୍ଆଇ ହଠାତ୍ ଗୁଳି କରିଥିଲେ। ଗୁଳି ଫୁଟିବା ଶବ୍ଦ ଶୁଣି ଆମେ ଏଏସ୍ଆଇଙ୍କୁ କାବୁ କରି ନେଇଥିଲୁ। ଅତି ନିକଟରୁ ଅର୍ଥାତ୍ ମାତ୍ର ୪/୫ଫୁଟ ଦୂରରୁ ସେ ଗୁଳି କରିଥିଲେ ଯାହା ଭାଇରାଲ ଭିଡିଓରେ ମଧ୍ୟ ଦେଖିବାକୁ ମିଳିଛି। ଗୋଟିଏ ଗୁଳି ଦାଦାଙ୍କ ଛାତିରେ ବାଜିଥିବା ବେଳେ ଆଉ ଗୋଟିଏ ଗୁଳି ଲକ୍ଷ୍ୟଭ୍ରଷ୍ଟ ହୋଇ ଅନ୍ୟ ଜଣଙ୍କଠାରେ ବାଜିଥିଲା। ସେ ମଧ୍ୟ ଆହତ ହୋଇଛନ୍ତି। ପ୍ରତ୍ୟକ୍ଷଦର୍ଶୀମାନେ କହିଛନ୍ତି, ଯେହେତୁ ଅଭିଯୁକ୍ତ ପୋଲିସ ପୋଷାକରେ ଥିଲେ ତେଣୁ ଆମେ କିଛି ଜାଣିପାରିଲୁ ନାହିଁ। ନଚେତ ଆମେ ତାଙ୍କୁ ସଭାସ୍ଥଳକୁ ଆସିବାକୁ ଦେଇ ନ ଥାନ୍ତୁ।