ରାଜଗାଙ୍ଗପୁର, ୨୯।୧୧(ଡି.ଏନ.ଏ.):ସୁନ୍ଦରଗଡ଼ ଜିଲା ରାଜଗାଙ୍ଗପୁରର ପାରିପାଶର୍ବିକ ଅଞ୍ଚଳରେ ବାସ କରୁଥିବା ଜନସାଧାରଣଙ୍କ ଜୀବନରେ ଉନ୍ନତି ଆଣିବା ନିମନ୍ତେ ଜାରି ରହିଥିବା ପ୍ରୟାସକୁ ଅଧିକ ତ୍ୱରାନ୍ବିତ କରି ଡାଲମିଆ ସିମେଣ୍ଟ (ଭାରତ) ଲିମିଟେଡ ପ୍ରୋଜେକ୍ଟ ଦୃଷ୍ଟି କାର୍ଯ୍ୟକାରିତା ନିମନ୍ତେ ଭୁବନେଶ୍ୱରସ୍ଥିତ ଏଲଭି ପ୍ରସାଦ ଆଇ ଇନ୍ଷ୍ଟିଚ୍ୟୁଟ ସହିତ ବୁଝାମଣାପତ୍ରରେ ସ୍ବାକ୍ଷର କରିଛି। ତାହା ପରବର୍ତ୍ତୀ ପର୍ଯ୍ୟାୟରେ କ୍ଷେତ୍ର ସ୍ତରରେ ପ୍ରୋଜେକ୍ଟ ଦୃଷ୍ଟି ଜଉରୁମାଲ ଗ୍ରାମରେ ଶୁଭାରମ୍ଭ କରାଯାଇଛି। ଏହି ଅବସରରେ କାର୍ଯ୍ୟନିର୍ବାହୀ ଡାଇରେକ୍ଟର ଡିସିବିଏଲ ଏବଂ ରାଜଗାଙ୍ଗପୁର ୟୁନିଟ ମୁଖ୍ୟ ଚେତନ ଶ୍ରୀବାସ୍ତବ, ଭାଇସ ଚେୟାର ଏଲଭି ପ୍ରସାଦ ଆଇ ଇନ୍ଷ୍ଟିଚ୍ୟୁଟ ଡା. ରlଜୀବ ଆର ପପ୍ପୁରୁ, ଡା. ନିଳାଦ୍ରି ଭୂଷଣ ପାଢୀ ଏଇଡି-ଡିସିବିଏଲ, ରାଜଗାଙ୍ଗପୁର ବିଡ଼ିଓ ପିୟୁଷ ଲୋହାର, ଡା.ଦେବସ୍ମିତା ମାଝୀ, ସରପଞ୍ଚ ଜଉରୁମାଲ ଯୋଗିତା ଟିଗା,ବ୍ଲକ ଅଧ୍ୟକ୍ଷା ସବିନା ମିଞ୍ଜ ଏବଂ ପଞ୍ଚାୟତ ସମିତି ସଭ୍ୟ ଲାଲୁ ଲାକ୍ରା ଉପସ୍ଥିତ ଥିଲେ। ଜଉରୁମାଲ ଗ୍ରାମର ୧୫୦ରୁ ଅଧିକ ଗ୍ରାମବାସୀ, ଡାଲମିଆ ସିମେଣ୍ଟ ଏବଂ ଏଲଭି ପ୍ରସାଦ ଆଇ ଇନ୍ଷ୍ଟିଚ୍ୟୁଟ ଅଧିକାରୀବୃନ୍ଦ ଏହି କାର୍ଯ୍ୟକ୍ରମରେ ଯୋଗଦେଇଥିଲେ। ଶେଷରେ ଚକ୍ଷୁ ରୋଗର ଶିକାର ହୋଇଥିବା ଗ୍ରାମବାସୀଙ୍କୁ ଚଷମା ବଣ୍ଟନ କରାଯାଇଥିଲା। ଖଣି ଏବଂ କାରଖାନା ପାର୍ଶ୍ୱବର୍ତ୍ତୀ ଅଞ୍ଚଳର ଜନସାଧାରଣଙ୍କ ମଧ୍ୟରେ ଚକ୍ଷୁ ଯତ୍ନ, ଚକ୍ଷୁ ରୋଗ ଏବଂ ଅନ୍ଧତ୍ୱ ନିରାକରଣ ନିମନ୍ତେ ସଚେତନତା ସୃଷ୍ଟି ଉଦ୍ଦେଶ୍ୟରେ ଲାଞ୍ଜିବେର୍ଣ୍ଣାଠାରେ ଏଲଭି ପ୍ରସାଦ ଆଇ ଇନ୍ଷ୍ଟିଚ୍ୟୁଟ ଭିଜନ ସେଣ୍ଟର ସ୍ଥାପନ କରାଯାଇଛି। ଏହା ଜନସାଧାରଣଙ୍କ ଆବଶ୍ୟକତା ଅନୁଯାୟୀ ନିୟମିତ ଭାବରେ ଚକ୍ଷୁଯତ୍ନ ସେବା ଯୋଗାଇଦେଇ ଚକ୍ଷୁରୋଗୀଙ୍କ ସଂଖ୍ୟା ହ୍ରାସ ଦିଗରେ ପ୍ରୟାସ କରିବ। ଏଲଭିପିଇଆଇ ସହଯୋଗରେ ଡାଲମିଆ ସିମେଣ୍ଟ, ରାଜଗାଙ୍ଗପୁର ଏବଂ ସୁନ୍ଦରଗଡ ଅଞ୍ଚଳରେ ୨୦୧୫ରୁ ମାଗଣା ଚକ୍ଷୁଯତ୍ନ ସେବା ଯୋଗାଇ ଆସୁଛି। ୟୁନିଟ ମୁଖ୍ୟ ଚେତନ ଶ୍ରୀବାସ୍ତବ କହିଛନ୍ତି, ଏଲଭି ପ୍ରସାଦ ଆଇ ଇନ୍ଷ୍ଟିଚ୍ୟୁଟ ରାଜଗାଙ୍ଗପୁର ସହିତ ୨୦୧୫ରୁ ଅତି ଘନିଷ୍ଠ ଭାବରେ ମିଶି କାର୍ଯ୍ୟ କରିଆସୁଛୁ। ଏହି ମିଳିତ ପ୍ରୟାସ ଆଇ ସେଣ୍ଟରକୁ ଲାଞ୍ଜିବେର୍ଣ୍ଣା ଅଞ୍ଚଳର ଜନସାଧାରଣଙ୍କ ନିକଟତର କରିପାରୁଛି ଏବଂ ସେମାନେ ଏହାର ସୁଯୋଗ ନେଉଛନ୍ତି। ଏହା ରାଜଗାଙ୍ଗପୁର ଓ ସୁନ୍ଦରଗଡକୁ ଦୃଷ୍ଟିହୀନମୁକ୍ତ ଜିଲାରେ ପରିଣତ କରିବା ଦିଗରେ ଆମର ପ୍ରତିବଦ୍ଧତାକୁ ଦୋହରାଉଛି। ବିଗତ ବର୍ଷଗୁଡିକରେ କମ୍ପାନୀର ଚକ୍ଷୁଯତ୍ନ ସେବା ପ୍ରାୟ ୧ଲକ୍ଷରୁ ଅଧିକ ରୋଗୀଙ୍କୁ ସେବା ଯୋଗାଇ ଦେଇଛି।