ଠାକୁରମୁଣ୍ଡା,୧୭ା୧୦(ଡି.ଏନ୍.ଏ.): ମୟୂରଭଞ୍ଜ ଜିଲା ମହୁଲଡିହା ଥାନା ଅନ୍ତର୍ଗତ ଭାଲିଆଡାଳ ପଞ୍ଚାୟତର ବଉଳା ଗ୍ରାମରେ ଗତ ୧୧ ତାରିଖ ମଙ୍ଗଳବାର ଘର ବାହାରେ ଜଣେ ୬୨ ବର୍ଷୀୟା ବୃଦ୍ଧାଙ୍କ ମୁଣ୍ଡକୁ ଛେଚି ନିର୍ମମ ଭାବରେ ହତ୍ୟା କରାଯାଇଥିଲା। ଏହି ଘଟଣାରେ ମହୁଲଡ଼ିହା ଥାନା ପୋଲିସ ସୋମବାର ୩ ଅଭିଯୁକ୍ତକୁ ଗିରଫ ପରେ କୋର୍ଟ ଚାଲାଣ କରିଛି। ହତ୍ୟାକାଣ୍ଡ ଡାହାଣୀ ସନ୍ଦେହରେ ହୋଇଥିବା ନେଇ ପୋଲିସ କହିଛି। ଘଟଣାରେ କୋର୍ଟ ଚାଲାଣ ହୋଇଥିବା ୩ ଜଣ ଅଭିଯୁକ୍ତ ହେଉଛନ୍ତି ଝରଝରି ଗ୍ରାମର ମାନକୀ ମୁଣ୍ଡୁରୀ ( ଝୋଟ),କାଣ୍ଡେ ହେମ୍ବ୍ରମ (ଭୂୟାଁ),ପୂର୍ଣ୍ଣ ବୁଡିଉଲି (କାନ୍ଦ୍ରା)।
ପୋଲିସ ସୂତ୍ରରୁ ପ୍ରକାଶ ଯେ, ଅଭିଯୁକ୍ତ ୩ ଜଣଙ୍କ ମଧ୍ୟରୁ ମାନକୀଙ୍କ ମା’ଙ୍କର ଏକ ମାସ ପୂର୍ବରୁ ମୃତ୍ୟୁ ଘଟିଥିଲା। ସେହିପରି କାଣ୍ଡେଙ୍କ ବାପାଙ୍କ ଅଢେଇ ବର୍ଷ ପୂର୍ବରୁ ମୃତ୍ୟୁ ଘଟିଥିଲା। ପୂର୍ଣ୍ଣଙ୍କ ଭାଇଙ୍କର ବର୍ଷେ ପୂର୍ବରୁ ମୃତ୍ୟୁ ଘଟିଥିଲା। ଏ ସମସ୍ତଙ୍କ ମୃତ୍ୟୁର କାରଣ ମୃତା ବୃଦ୍ଧା ସୁନେଇ ଡାହାଣୀ ହୋଇ ମାରିଦେଇଥିବାର ଏହି ୩ ଜଣ ସନ୍ଦେହ କରି ଆସୁଥିଲେ। ଏଣୁ ସୁନେଇଙ୍କୁ ଜୀବନରୁ ଶେଷ କରିବାକୁ ଏହି ୩ ଜଣ ଯୋଜନା କରି ଆସୁଥିଲେ। ଗ୍ରାମରେ ଜୟରାମ ପୂର୍ତ୍ତୀ ଓ ତାଙ୍କ ସ୍ତ୍ରୀ ସୁନେଇ ଦୁଇ ଜଣ ଏକ ନିଛାଟିଆ ସ୍ଥାନରେ ଥିବା ଘରେ ରହୁଥିଲେ। ଗତ ମଙ୍ଗଳବାର ସ୍ବାମୀ ଜୟରାମ ଭାଲିଆଡାଳ ପଞ୍ଚାୟତ କାର୍ଯ୍ୟାଳୟକୁ ଭତ୍ତା ପାଇଁ ଆସି ଭାଲିଆଡାଳ ଗ୍ରାମରେ ସମ୍ପର୍କୀୟଙ୍କ ଘରେ ରହିଯାଇଥିଲେ। ଏହି ସୁଯୋଗରେ ଏହି ୩ ଅଭିଯୁକ୍ତ ସେହିଦିନ ରାତିରେ ତାଙ୍କ ଘରକୁ ଆସି ଏକ କୁରାଢ଼ି ସାହାଯ୍ୟରେ ସୁନେଇଙ୍କ ମୁଣ୍ଡକୁ ଛେଚି ହତ୍ୟା କରି ପଳାଇ ଯାଇଥିଲେ। ବୁଧବାର ରାତିରେ ସ୍ବାମୀ ଜୟରାମ ଘରକୁ ଫେରି ଘର ବାହାରେ ସ୍ତ୍ରୀଙ୍କ ମୃତଦେହ ପଡ଼ିଥିବାର ଦେଖିବାକୁ ପାଇଥିଲେ। ସାହି ପଡ଼ୋଶୀଙ୍କୁ ଆସି ସହାୟତା କରିବାକୁ କହିଥିଲେ ମଧ୍ୟ ତାଙ୍କୁ କେହି ସହାୟତା କରି ନ ଥିଲେ। ଗୁରୁବାର ସକାଳେ ନିଜ ପୁତୁରା ସହିତ ଆସି ଥାନାରେ ଖବର ଦେଇଥିଲେ। ପୋଲିସ ଘଟଣାସ୍ଥଳକୁ ଯାଇ ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ ସହାୟତରେ ତଦନ୍ତ କରିଥିଲା। କିନ୍ତୁ ସେଦିନ ହତ୍ୟାକାଣ୍ଡ ସମ୍ପର୍କରେ ସୂଚନା ପାଇପାରି ନ ଥିଲା କିନ୍ତୁ ପୋଲିସ ଥାନା କେସ୍ ନମ୍ବର ୬୩/୨୦୨୨ ଅନୁଯାୟୀ ଏକ ମାମଲା ରୁଜୁ କରି ଅନୁସନ୍ଧାନ ଜାରି ରଖି ୩ ଜଣକୁ ଗିରଫ କରିବାରେ ସଫଳ ହୋଇଥିଲା ବୋଲି ଆଇଆଇସି ରଞ୍ଜୁ ହସିନା କୁଲୁ ପ୍ରକାଶ କରିଛନ୍ତି।