ଭୁବନେଶ୍ୱର, ୭।୩ (ବ୍ୟୁରୋ):ଏଣିକି ରାସ୍ତା କଡ଼ରୁ ଗଛ କାଟିବାକୁ ହେଲେ ଅନ୍ଲାଇନ୍ରେ ଅନୁମତି ନେବାକୁ ହେବ। ମନଇଚ୍ଛା ଗଛ କାଟିହେବ ନାହିଁ କିମ୍ବା ଅଫ୍ଲାଇନ୍ରେ ଅନୁମତି ଦିଆଯିବ ନାହିଁ। ସେହିପରି ଗଛ କାଟିବା ପରେ ସେଠାରେ ପଡୁଥିବା ନିର୍ମାଣାଧୀନ ଭଗ୍ନାବଶେଷ କିମ୍ବା ସବୁଜ ଆବର୍ଜନାକୁ ୨୪ଘଣ୍ଟା ମଧ୍ୟରେ ଉଠାଇବାକୁ ପଡିବ। ସୋମବାର ବିଏମ୍ସି ଆଇସିଓଏମ୍ସି ଟାଓ୍ବାରଠାରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ଏନେଇ ନିଷ୍ପତ୍ତି ହୋଇଛି।
ବିଏମ୍ସି କମିଶନର ତଥା ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ (ବିଏସ୍ସିଏଲ୍)ର ସିଇଓ ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ମଧ୍ୟ ନିଆଯାଇଛି। ରାସ୍ତାକଡ଼ରୁ ଯେଉଁ ସଂସ୍ଥା ବା ବ୍ୟକ୍ତି ଗଛ କାଟିବେ ସେଠାରୁ ଆବର୍ଜନା ଉଠାଇବା ଦାୟିତ୍ୱ ମଧ୍ୟ ତାଙ୍କର। ଯଦି ନିଜେ ଆବର୍ଜନା ଉଠାଇ ପାରିବେ ନାହିଁ, ତେବେ ସମ୍ପୃକ୍ତ ରାସ୍ତା ଯେଉଁ ବିଭାଗ ଅଧୀନରେ ଥିବ ସେଠାରେ ନିର୍ଦ୍ଧାରିତ ଅର୍ଥ ପଇଠ କରିବାକୁ ପଡିବ। ଫଳରେ ସମ୍ପୃକ୍ତ ବିଭାଗ କିମ୍ବା ବିଏମ୍ସି ସେଠାରେ ଗଦା ହୋଇଥିବା ଆବର୍ଜନାକୁ ୨୪ ଘଣ୍ଟା ମଧ୍ୟରେ ଉଠାଇ ନେବେ। ଏହାଦ୍ୱାରା ରାସ୍ତାକଡ଼ରେ ଆବର୍ଜନା ପଡି ରହିବ ନାହିଁ। ସେହିପରି ଅନ୍ଲାଇନ୍ ବ୍ୟବସ୍ଥା ଦ୍ୱାରା କେଉଁ କାରଣରୁ, କେଉଁ ସ୍ଥାନରୁ ଏବଂ କିଏ ଗଛ କାଟିଲେ ତାହାର ତଥ୍ୟ ମଧ୍ୟ ରହିବ। ବୈଠକରେ ବିଏମ୍ସିର ଅନ୍ୟ ଅଧିକାରୀଙ୍କ ସହ ବିଏସ୍ସିଏଲ୍ ଜିଏମ୍ ସୁବ୍ରତ ବେହେରା, ଲାଇନ୍ ବିଭାଗ, ପିଡବ୍ଲ୍ୟୁଡି, ଓପିଟିସିଏଲ୍, ଜିଓ ଏବଂ ସମସ୍ତ ବିଭାଗର ଅଧିକାରୀ ଉପସ୍ଥିତ ଥିଲେ। ଆସନ୍ତା ୨/୩ ଦିନ ମଧ୍ୟରେ ଏ ନେଇ ବିଧିବଦ୍ଧ ଭାବେ କାର୍ଯ୍ୟ କରାଯିବ ବୋଲି ସୂଚନା ଦିଆଯାଇଛି। ସରକାରୀ କାଗଜପତ୍ରଠାରୁ ଆରମ୍ଭ କରି ଜନ୍ମମୃତ୍ୟୁ ପଞ୍ଜୀକରଣ, ଭତ୍ତା ସବୁକିଛି ଅନ୍ଲାଇନ୍ ମୋଡ୍ରେ ହେବାପରେ ଏବେ ଗଛ କଟା ନେଇ ଅନୁମତିକୁ ମଧ୍ୟ ଅନ୍ଲାଇନ୍ ମୋଡ୍ରେ ସାମିଲ୍ କରାଯାଇଛି।