ପାଟଣା,୧୭ା୬(ସ୍ବ.ପ୍ର.):ଛତିଶଗଡ଼ର ଜାହାଙ୍ଗିର ଚମ୍ପା ଜିଲା ପିହରିଡ଼ ଗ୍ରାମରେ ୮୦ ଫୁଟ ଗଭୀର ବୋରୱେଲରେ ଫସି ରହିଥିବା ଦିବ୍ୟାଙ୍ଗ ବାଳକ ରାହୁଲଙ୍କ ଉଦ୍ଧାର କାର୍ଯ୍ୟରେ ସାମିଲ ଥିଲେ ଜଣେ ଓଡ଼ିଆ ଯୁବ ଇଞ୍ଜିନିୟର। ସେ ହେଲେ କେନ୍ଦୁଝର ଜିଲା ଚମ୍ପୁଆ ବ୍ଲକ ଅଧୀନ ଫୁଲକଅଁଳେଈ ଗ୍ରାମର ଜ୍ଞାନେନ୍ଦ୍ର କର। ସେ ଏବେ ଛତିଶଗଡ଼ର କୋରବାରେ ଥିବା ଟାଟା ପ୍ରୋଜେକ୍ଟ ଲିମିଟେଡ୍ରେ ଇଞ୍ଜିନିୟର ଭାବେ କାର୍ଯ୍ୟରତ ଅଛନ୍ତି।
ଛତିଶଗଡ଼ ସରକାରଙ୍କ ନିର୍ଦ୍ଦେଶକ୍ରମେ ଉକ୍ତ କମ୍ପାନୀର ୧୮ଜଣ ଇଞ୍ଜିନିୟର ଏହି ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିଲେ। ଉଦ୍ଧାର କାର୍ଯ୍ୟ ସମୟରେ ୨୧ ଫୁଟର ସୁଡ଼ଙ୍ଗ ଖୋଳିବା ସକାସେ ନକ୍ସା ପ୍ରସ୍ତୁତ ଲାଗି ଜ୍ଞାନେନ୍ଦ୍ରଙ୍କୁ ଦାୟିତ୍ୱ ଦିଆଯାଇଥିଲା। ସୁଡ଼ଙ୍ଗ ଖୋଳିବା ପାଇଁ ଅତ୍ୟାଧୁନିକ ଜ୍ଞାନକୌଶଳ ଯୋଗାଇବା ସହ କମ୍ପାନୀର ସମସ୍ତେ ଇଞ୍ଜିନିୟର ଉପସ୍ଥିତ ରହି ପ୍ରତିଟି ମୁହୂର୍ତ୍ତକୁ ତଦାରଖ କରୁଥିଲେ। ଏଥିରେ ଜ୍ଞାନେନ୍ଦ୍ରଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା। ଉଦ୍ଧାର କାର୍ଯ୍ୟ ସମୟରେ ପ୍ରତିଟି ମୁହୂର୍ତ୍ତ ଚ୍ୟାଲେଞ୍ଜିଂ ଥିଲା ବୋଲି ସେ କହିଛନ୍ତି। ରାହୁଲ ଉଦ୍ଧାର ହେବା ପରେ ଉକ୍ତ ଅଞ୍ଚଳର ପରିବେଶ ବେଶ ଭାବବିହ୍ବଳ ହୋଇପଡ଼ିଥିଲା। ଜିଲା ପ୍ରଶାସନ ଏବଂ ଅଞ୍ଚଳବାସୀ ଉଦ୍ଧାରକାରୀଙ୍କୁ ବେଶ୍ ଭଲ ପାଇବା ଦେଇଥିଲେ ବୋଲି ଜ୍ଞାନେନ୍ଦ୍ର କହିଛନ୍ତି।
