ନୂଆଦିଲ୍ଲୀ: ଅନ୍ଲାଇନ୍ରେ ଖାଇବା ଅର୍ଡର କରିବା ଏବେ ଅଭ୍ୟାସରେ ପରିଣତ ହେଲାଣି। ଘରେ ବସି ମନପସନ୍ଦର ଖାଇବା ମିଳୁଥିବାରୁ ଯେକେହି ଉପଲବ୍ଧ ଥିବା ଆପ୍ରୁ ଖାଇବା ମଗାଉଛନ୍ତି। ହେଲେ ଅନେକ ସମୟରେ ଡେଲିଭରି ବୟ/ଡ୍ରାଇଭରମାନଙ୍କ ଅଜବ କାରନାମା ଚର୍ଚ୍ଚାର କାରଣ ପାଲଟୁଛି। ଏବେ ସେଭଳି ଏକ ଘଟଣା ଲଣ୍ଡନରେ ଘଟିଛି।
ପ୍ରବଳ ଭୋକ ଲାଗୁଥିବାରୁ ୨୧ ବର୍ଷୀୟ ଆଇନ୍ ଛାତ୍ରୀ ଇଲି ଇଲିୟାସ ଉବର୍ ଇଟ୍ସରୁ ୨ ବର୍ଗର, ଚିପ୍ସ ଏବଂ ଚିକେନ୍ ରାପ୍ ଅର୍ଡର କରିଥିଲେ। ଏଥିପାଇଁ ସେ ୨୯ ଡଲାର(୧,୪୫୬ ଟଙ୍କା) ପୈଠ କରିଥିଲେ। ଖାଇବା ପହଞ୍ଚିବା ପାଇଁ ଅପେକ୍ଷା କରିଥିବା ବେଳେ ହଠାତ୍ ତାଙ୍କ ଫୋନ୍କୁ ଏକ ମେସେଜ୍ ‘ସରି ଲଭ୍,ଏଟ୍ ୟ୍ୟୋର୍ ଫୁଡ୍’ ଆସିଥିଲା। ଘର ନିକଟରେ ଥିବା ଡେଲିଭରି ବୟ ତାଙ୍କର ଖାଇବା ଖାଇ ଦେଇଥିବା ନେଇ ସେଥିରେ ଜଣାଇଥିଲେ।
ଅପରପକ୍ଷେ ଆପ୍ରେ ନିଜର ଅର୍ଡର ବିବରଣୀ ଦେଖିବା ସମୟରେ ତାଙ୍କୁ ଖାଇବା ମିଳିଥିବା କୁହାଯାଇଥିଲା। ଏପରିକି ଡ୍ରାଇଭରଙ୍କୁ ଟିପ୍ ଦିଅନ୍ତୁ ବୋଲି ଦର୍ଶାଯାଇଥିଲା। ଏହାକୁ ନେଇ ସେ ଟୁଇଟ୍ କରି ତାଙ୍କ ଉବରଇଟ୍ସର ଡ୍ରାଇଭର୍ ଠିକ୍ ଅଛନ୍ତି ତ ବୋଲି ପଚାରିଥିଲେ। ପରେ ସେ କମ୍ପାନୀ ସହ ଯୋଗାଯୋଗ କରିଥିଲେ। ଶେଷରେ ତାଙ୍କୁ ମାଗଣାରେ ଖାଇବା ମିଳିଥିଲା। ତେବେ ଭୋକିଲା ଥିବା ଯୋଗୁ ଡ୍ରାଇଭରଜଣଙ୍କ ଏଭଳି କରିଥାଇ ପାରନ୍ତି ବୋଲି ଇଲି କହିବା ସହ ତାଙ୍କ ଉପରେ କାର୍ଯ୍ୟାନୁଷ୍ଠାନ ନ ନେବାକୁ କହିଥିଲେ।
