ବ୍ରହ୍ମପୁର ଅଫିସ,୧୯ା୧୨:ବ୍ରହ୍ମପୁର ସଦର ଥାନା ଅନ୍ତର୍ଗତ ଜଗଦଳପୁର ଗ୍ରାମବାସୀ ଏବେ ଆତଙ୍କିତ। ଜଣେ ଅଜଣା ଯୁବକ ବାରମ୍ବାର ମହିଳାଙ୍କୁ ଟାର୍ଗେଟ କରୁଛନ୍ତି। ସେ କେତେବେଳେ ଲୁହାଛଡ଼, ଆଉ କେତେବେଳେ ଇଟାରେ ଆକ୍ରମଣ ତ ପୁଣି କେତେବେଳେ ଧାରୁଆ ଅସ୍ତ୍ରରେ କିଛିଦିନ ହେଲା ଉକ୍ତ ଗ୍ରାମର ମହିଳାଙ୍କୁ ଟାର୍ଗେଟ କରି ଆକ୍ରମଣ କରୁଛନ୍ତି। ରବିବାର ସକାଳେ କବିତା ପାଢ଼ୀଙ୍କୁ ଦୁର୍ବୃତ୍ତ ଜଣଙ୍କ ଲୁହାଛଡ଼ରେ ଘାତକ ଆକ୍ରମଣ କରିଛନ୍ତି। କାହିଁକି ଏଭଳି ସେ ମହିଳାଙ୍କୁ ଆକ୍ରମଣ କରୁଛନ୍ତି ତାହା ଜଣାପଡ଼ିନାହିଁ। ଖବର ପାଇ ଅତିରିକ୍ତ ଏସ୍ପି ରମେଶ ସେଠୀ ଘଟଣାସ୍ଥଳରେ ପହଞ୍ଚି ପୋଲିସ ଓ ଗ୍ରାମବାସୀଙ୍କ ସହ ଏନେଇ ଆଲୋଚନା କରିଛନ୍ତି। ନିଜ ନିଜ ଘରେ ମହିଳାମାନେ ଏକାକୀ ଥିବାବେଳେ ଦୁର୍ବୃତ୍ତ ସେମାନଙ୍କୁ ଟାର୍ଗେଟ କରୁଛନ୍ତି। ଘଟଣା ପରେ ଆକ୍ରମଣକାରୀଙ୍କ ସୁରାକ୍ କେହି ପାଇପାରୁନାହାନ୍ତି। ଦୁର୍ବୃତ୍ତଙ୍କୁ ଧରିବା ପାଇଁ ଏକ ଟିମ୍ ଗଠନ କରାଯାଇଥିବା ଅତିରିକ୍ତ ଏସ୍ପି ସେଠୀ ସୂଚନା ଦେଇଛନ୍ତି।
ପ୍ରକାଶ ଯେ, ପ୍ରଥମେ ଗତ ୧୪ ତାରିଖରେ ଜଗଦଳପୁର ଗ୍ରାମରେ ରହୁଥିବା ବାବୁଆ ପାଢ଼ୀ ନାମ୍ନୀ ଜଣେ ମହିଳା ଘରେ ଏକାକୀ ଥିବା ବେଳେ ଜଣେ ଦୁର୍ବୃତ୍ତ ଘରେ ପଶି ତାଙ୍କୁ ମାଡ଼ ମାରି ଆକ୍ରମଣ କରି ସେଠାରୁ ଚମ୍ପଟ ମାରିଥିଲେ। ସେହିପରି ୧୫ ତାରିଖରେ କେ. ଭାରତୀ ପାତ୍ରଙ୍କୁ ଲୁହାଛଡ଼ରେ ଆକ୍ରମଣ ହୋଇଥିଲା। ସେହିଭଳି ୧୬ ତାରିଖରେ କବିତାଙ୍କ ମୁଣ୍ଡକୁ ଆକ୍ରମଣ କରିଥିବା ବେଳେ ୧୮ ତାରିଖ ସକାଳେ ତାଙ୍କୁ ପୁଣି ଧାରୁଆ ଅସ୍ତ୍ରରେ ଆକ୍ରମଣ ହୋଇଛି। ତାଙ୍କ ବେକରେ ଗଭୀର ଆଘାତ ଲାଗିଛି। ଗୁରୁତର ଅବସ୍ଥାରେ ତାଙ୍କୁ ଏମ୍କେସିଜି ମେଡିକାଲରେ ଭର୍ତ୍ତି କରାଯାଇଛି।