ହାଇଦ୍ରାବାଦ: ଅଡୁଆରେ ଚଳଚ୍ଚିତ୍ର ‘ବାହୁବଲୀ’ର ଭଲ୍ଲାଲ ଦେବ ଅର୍ଥାତ ଅଭିନେତା ରାଣା ଦଗ୍ଗୁବତୀ। ସେ ଏବଂ ତାଙ୍କ ବାପା ସୁରେଶ ବାବୁଙ୍କ ଉପରେ ଜମି ହଡପ କରିଥିବା ମାମଲା ରୁଜୁ ହୋଇଛି। ହାଇଦ୍ରାବାଦର ବ୍ୟବସାୟୀ ପ୍ରମୋଦ କୁମାର ଉଭୟଙ୍କ ବିରୋଧରେ ଅଭିଯୋଗ କରିଛନ୍ତି।
୨୦୧୪ରେ ରାଣା ଏବଂ ସୁରେଶ ହାଇଦ୍ରାବାଦର ଫିଲ୍ମ ସିଟି ନିକଟରେ ଥିବା ନିଜ ଜମିକୁ ହୋଟେଲ ଲାଗି ପ୍ରମୋଦ କୁମାର ନାମକ ଜଣେ ବ୍ୟବସାୟୀଙ୍କୁ ଭଡା ଦେଇଥିଲେ। କଥିତ ଭାବେ ସୁରେଶ ଉକ୍ତ ଜମିକୁ ବିକ୍ରି କରିବାକୁ ନିଷ୍ପତ୍ତି ନେଇଥିଲେ। ଏଥିପାଇଁ ସୁରେଶ ପ୍ରମୋଦଙ୍କୁ ୫ କୋଟି ଟଙ୍କା ଦେଇଥିଲେ। ଏହାସତ୍ତ୍ୱେ ପ୍ରମୋଦ ଜମି ଖାଲି କରିବାକୁ ମନା କରିଥିଲେ। ଏହାକୁ ନେଇ ତାଙ୍କ ବିରୋଧରେ ମାମଲା ରୁଜୁ କରାଯାଇଥିଲା। ଏବେ ପ୍ରମୋଦ ଏହି ଘଟଣାରେ କୋର୍ଟର ଦ୍ୱାରସ୍ଥ ହୋଇଛନ୍ତି।
୫ କୋଟି ଟଙ୍କା ତାଙ୍କୁ ମିଳି ନ ଥିବା ପ୍ରମୋଦ ଅଭିଯୋଗରେ ଦର୍ଶାଇଛନ୍ତି। ଏପରିକି ରାଣା ଏବଂ ତାଙ୍କ ବାପା ଜମି ଖାଲି କରିବାକୁ ଧମକାଇଥିବା ସେ କହିଛନ୍ତି। ଖୁବ୍ଶୀଘ୍ର ଏହି ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଉଛି।
