ବାରଙ୍ଗ,୨୯ା୮(ଡି.ଏନ୍.ଏ.): ପ୍ରାଣୀ ଉଦ୍ୟାନ ନନ୍ଦନକାନନରେ ଶୁକ୍ରବାର ଏକ ହଳଦିଆ ଆନାକୋଣ୍ଡାର ମୃତ୍ୟୁ ହୋଇଛି। ମୃତ୍ୟୁର ପ୍ରକୃତ କାରଣ ଜଣାପଡି ନ ଥିବାବେଳେ ଗତ ଏକମାସ ହେବ ଏହି ଆନାକୋଣ୍ଡାର ତରଳଝାଡ଼ା ହେଉଥିଲା। ୨ଦିନ ହେବ ରକ୍ତଝାଡ଼ାରେ ଆକ୍ରାନ୍ତ ହୋଇ ଆନାକୋଣ୍ଡାଟି ଚିକିତ୍ସିତ ହେଉଥିଲା। ଶୁକ୍ରବାର ସକାଳେ ଏନ୍କ୍ଲୋଜର ସଫାକରିବାକୁ କର୍ମଚାରୀମାନେ ଯାଇଥିବାବେଳେ ଆନାକୋଣ୍ଡାଟି ମରିପଡ଼ିଥିବା ଦେଖିବାକୁ ପାଇଥିଲେ। ୨୨ଅକ୍ଟୋବର ୨୦୧୯ରେ ମାଡ୍ରାସ କ୍ରୋକୋଡାଇଲ ବ୍ୟାଙ୍କ୍ ଟ୍ରଷ୍ଟ୍ ପକ୍ଷରୁ ଉପହାରରେ ୮ଟି ହଳଦିଆ ଆନାକୋଣ୍ଡା ନନ୍ଦନକାନନକୁ ଆସିଥିଲା। ସରୀସୃପ ଉଦ୍ୟାନର ୪୫କେ ଏନ୍କ୍ଲୋଜରରେ ଏହି ୮ଟି ଆନାକୋଣ୍ଡା ରହିଥିଲେ। ଆସିବାର ଦେଢ଼ମାସ ମଧ୍ୟରେ ୨ଟି ଆନାକୋଣ୍ଡାର ମୃତ୍ୟୁ ଘଟିଥିଲା। ଅନ୍ତଃନଳୀରେ ସଂକ୍ରମଣ ଯୋଗୁ ରକ୍ତସ୍ରାବ ହୋଇ ଆନାକୋଣ୍ଡାଦ୍ୱୟ ମୃତ୍ୟୁ କରିଥିବାର ସେ ସମୟରେ କୁହାଯାଇଥିଲା। ଏହି ୨ ଆନାକୋଣ୍ଡାର ମୃତ୍ୟୁପରେ ନନ୍ଦନକାନନ କର୍ତ୍ତୃପକ୍ଷଙ୍କ ଅନୁରୋଧକ୍ରମେ ଡିସେମ୍ବର ୨ରେ ମାଡ୍ରାସରୁ ଡ. ଅଜୟ କାର୍ତ୍ତିକେୟ ଓ ଡ. ରେଣୁକା ଆସି ଏଠାକାର ଡାକ୍ତର ଓ କର୍ମଚାରୀମାନଙ୍କୁ ଆନାକୋଣ୍ଡାର ଜୀବନଶୈଳୀ, ଚିକିତ୍ସା, ଖାଦ୍ୟପେୟ ଆଦି ବିଷୟରେ ବୁଝାଇଥିଲେ। ଏବେ ଆନାକୋଣ୍ଡା ସଂଖ୍ୟା ୫ରେ ପହଞ୍ଚତ୍ଛି ବୋଲି ନନ୍ଦନକାନନ ଉପନିର୍ଦ୍ଦେଶକ ବିମଳ ପ୍ରସନ୍ନ ଆଚାର୍ଯ୍ୟ କହିଛନ୍ତି। ସେହିଭଳି ଶୁକ୍ରବାର ଭଦ୍ରକରୁ ଏକ ମୟୂର ଉଦ୍ଧାର ହୋଇ ନନ୍ଦନକାନନକୁ ଆସିଛି।
