ନୂଆଦିଲ୍ଲୀ,୬।୯: ଟାଟା ସନ୍ସର ପୂର୍ବତନ ଚେୟାରମେନ ସାଇରସ୍ ମିସ୍ତ୍ରୀଙ୍କ ରବିବାର ସଡ଼କ ଦୁର୍ଘଟଣାରେ ଦେହାନ୍ତ ହୋଇଛି। ଘଟଣାସ୍ଥଳର ଯାଞ୍ଚ ସମୟରେ ଜଣାପଡ଼ିଛି ଯେ, ସାଇରସ୍ ପଛରେ ବସିଥିଲେ ମଧ୍ୟ ସିଟ୍ ବେଲ୍ଟ ବାନ୍ଧି ନ ଥିଲେ। ଯାହାଫଳରେ ତାଙ୍କର ମୃତ୍ୟୁ ଘଟିଛି। ଏହି ଘଟଣା ପରେ ଉଦ୍ୟୋଗପତି ଆନନ୍ଦ ମହିନ୍ଦ୍ରା ଏକ ବଡ଼ ସଂକଳ୍ପ ନେଇଛନ୍ତି। ସେ ଟୁଇଟ କରି କହିଛନ୍ତି, ମୁଁ ସଂକଳ୍ପ ନେଉଛି ଯେ, କାର୍ର ପଛ ସିଟ୍ରେ ବସିଲେ ମଧ୍ୟ ସବୁବେଳେ ସିଟ୍ ବେଲ୍ଟ ବାନ୍ଧିବି। ମହିନ୍ଦ୍ରା ଆନନ୍ଦ ନିଜେ ସଂକଳ୍ପ ନେବା ସହ ସମସ୍ତ ଲୋକଙ୍କୁ ଏହି ପ୍ରତିଜ୍ଞା ପାଳନ କରିବାକୁ ନିବେଦନ କରିଛନ୍ତି। ଏଥିସହ ସେ କହିଛନ୍ତି, ଆମେ ସମସ୍ତେ ନିଜ ପରିବାର ପାଖରେ ଋଣୀ। ତେଣୁ ସବୁବେଳେ ସେମାନଙ୍କ କଥା ଚିନ୍ତା କରି ସିଟ୍ ବେଲ୍ଟ ବାନ୍ଧିବାକୁ କେବେ ଭୁଲିବେ ନାହିଁ ବୋଲି ଆନନ୍ଦ ମହିନ୍ଦ୍ରା ନିଜ ଟୁଇଟରେ କହିଛନ୍ତି। ଆନନ୍ଦ ସୋସିଆଲ ମିଡିଆରେ ବେଶ୍ ଆକ୍ଟିଭ୍ ରହିଥାନ୍ତି। ସବୁବେଳେ ସୋସିଆଲ ମିଡିଆରେ ସେ ଅନେକ ପ୍ରେରଣାଦାୟକ ଟୁଇଟ ଓ ଭିଡିଓମାନ ପୋଷ୍ଟ କରିଥାନ୍ତି।