ଏସିଆନ ପାରା ଗେମ୍ସ ୨୦୨୩ରେ ୧୬ ବର୍ଷୀୟା ଶୀତଲ ଦେବୀ ଦୁନିଆକୁ ଦେଖାଇ ଦେଇଛନ୍ତି ଶାରୀରିକ ଅକ୍ଷମତା କେବଳ ଏକ ଭ୍ରମ। ବିନା ହାତରେ ସେ ନିକଟରେ ଏସିଆନ ପାରା ଗେମ୍ସରେ ଅନେକ ପଦକ ଜିତିଥିଲେ। ତାଙ୍କର ଏହି ବିଜୟ ସମଗ୍ର ଦେଶକୁ ପ୍ରେରଣା ଦେଇଛି। ମହିନ୍ଦ୍ରା ଗ୍ରୁପ ଚେୟାରମ୍ୟାନ ଆନନ୍ଦ ମହିନ୍ଦ୍ରା ମଧ୍ୟ ଶୀତଲଙ୍କ ଦ୍ୱାରା ଗଭୀର ଭାବରେ ପ୍ରଭାବିତ ହୋଇଥିଲେ। ସେ ଏକ୍ସରେ ଏକ ଭିଡିଓ ଶେୟାର କରିଛନ୍ତି। ଏଥିରେ ସେ କହିଛନ୍ତି, ଶୀତଲ ଦେବୀ ଜଣେ ପ୍ରକୃତ ଯୋଦ୍ଧା। ସେ ତାଙ୍କୁ ଏକ କଷ୍ଟୋମାଇଜ କାର୍ ଉପହାର ଦେବାକୁ ମଧ୍ୟ ପ୍ରତିଶୃତି ଦେଇଛନ୍ତି। ସେ ଏକ ପ୍ରେରଣା ଏବଂ ଆମେ ତାଙ୍କ ପାଇଁ ବହୁତ ଗର୍ବିତ ଅନୁଭବ କରୁ ବୋଲି ଆନନ୍ଦ କହିଛନ୍ତି।
ହାଙ୍ଗଜୋ ଏସିଆନ ପାରା ଗେମ୍ସରେ ତୀରନ୍ଦାଜରେ ମହିଳା ବ୍ୟକ୍ତିଗତ ଇଭେଣ୍ଟରେ ସ୍ବର୍ଣ୍ଣ ପଦକ ଜିତି ଶୀତଲ ଦେବୀ ଏକ ବଡ଼ ସଫଳତା ହାସଲ କରିଥିଲେ। ଏହାର ଗୋଟିଏ ଦିନ ପୂର୍ବରୁ, ଅକ୍ଟୋବର ୨୮ରେ, ସେ ଏବଂ ରାକେଶ କୁମାର ମଧ୍ୟ ଏସୀୟ ପାରା ଗେମ୍ସ ୨୦୨୩ରେ ମିଶ୍ରିତ ଇଭେଣ୍ଟରେ ସ୍ବର୍ଣ୍ଣ ପଦକ ଜିତିଥିଲେ। କେବଳ ଏତିକି ନୁହେଁ, ଅକ୍ଟୋବର ୨୫ରେ ସରିତାଙ୍କ ସହ ସେ ମହିଳା ଡବଲ୍ସ କମ୍ପାଉଣ୍ଡ ଇଭେଣ୍ଟରେ ରୌପ୍ୟ ପଦକ ଜିତିଥିଲେ।