ନୂଆଦିଲ୍ଲୀ,୪ ।୧: ଦେଶକୁ କରୋନା ମୁକ୍ତ କରିବାକୁ ସରକାର ପ୍ରଥମେ କୋଭିସିଲ୍ଡ ଭ୍ୟାକ୍ସିନକୁ ମଞ୍ଜୁରୀ ପ୍ରଦାନ କରିଛନ୍ତି । ଏହାପରେ ବିଜନେସମ୍ୟାନ ଆନନ୍ଦ ମହିନ୍ଦ୍ରା କହିଛନ୍ତି ଏହାଦ୍ୱାରା କୋଟି କୋଟି ଲୋକଙ୍କ ଜୀବନ ବଞ୍ଚିଯିବ । ରବିବାର ଡ୍ରଗ୍ସ ରେଗୁଲେଟର ମେଡ ଇନ୍ ଇଣ୍ଡିଆ ଭ୍ୟାକ୍ସିନକୁ ଜରୁରୀ ପରିସ୍ଥିତିରେ ବ୍ୟବହାର କରିବାକୁ ଅନୁମତି ପ୍ରଦାନ କରିଥିଲେ । କୋଭିସିଲ୍ଡ ଓ କୋଭାକ୍ସିନକୁ ମଞ୍ଜୁରୀ ମିଳିବା ପରେ କରୋନା ମୁକ୍ତ ଭାରତ ଦେଖିବା ପାଇଁ ସମସ୍ତଙ୍କ ଉତ୍ସାହ ଦ୍ୱିଗୁଣିତ ହୋଇଛି । କୋଭିସିଲ୍ଡକୁ ଅକ୍ସଫୋର୍ଡ ୟୁନିଭର୍ସିଟି ଓ ବ୍ରିଟେନର ଔଷଧ କମ୍ପାନୀ ଅଷ୍ଟ୍ରାଜେନେକା ମିଳିତ ଭାବେ ପ୍ରସ୍ତୁତ କରିଛନ୍ତି । ଏହି ଟିକାର ଉତ୍ପାଦନ ସିରମ ଇନଷ୍ଟିଚ୍ୟୁଟ ଅଫ୍ ଇଣ୍ଡିଆ (ଏସ୍ଆଇଆଇ) କରୁଛି । ତେବେ ସରକାରଙ୍କ ମଞ୍ଜୁରୀ ମିଳିବାର କିଛି ସମୟ ପରେ ସିରମ ଇନଷ୍ଟିଚ୍ୟୁଟ ଅଫ୍ ଇଣ୍ଡିଆର ସିଇଓ ଅଦାର ପୁନାୱାଲା ଏସମ୍ପର୍କରେ ଟୁଇଟ୍ କରି ସୂଚନା ଦେଇଥିଲେ । ପୁନାୱାଲାଙ୍କ ଟୁଇଟ୍ର ରିପ୍ଲାଇ ଦେଇ ଆନନ୍ଦ ମହିନ୍ଦ୍ରା କହିଛନ୍ତି, ପୁନାୱାଲା ଯେଉଁ ରିସ୍କ ନେଇଛନ୍ତି ତାହା ଯେ କୌଣସି ବିଜନେସର ଫଣ୍ଡାମେଣ୍ଟାଲ କ୍ୟାରେକ୍ଟର । ଅଦାର ପୁନାୱାଲାଙ୍କ ଦ୍ୱାରା ନିଆଯାଇଥିବା ଏହି ରିସ୍କ କୋଟି କୋଟି ଲୋକଙ୍କ ଜୀବନ ବଞ୍ଚାଇବାରେ ସାହାଯ୍ୟ କରିବ । ପୁନାୱାଲାଙ୍କ ଏହି ରିସ୍କ କେବଳ ବ୍ୟବସାୟରେ ଲାଭ ପାଇଁ ନୁହେଁ ବରଂ ଏହାଦ୍ୱାରା କୋଟି କୋଟି ଲୋକଙ୍କ ଜୀବନ ବଞ୍ଚିଯାଇ ପାରିବ । ତେଣୁ ପୁନାୱାଲାଙ୍କୁ ସଲାମ ।