ନବରଙ୍ଗପୁର,୨୬ା୧(ବି.ପ୍ର.): ଅବିଭକ୍ତ କୋରାପୁଟ ଜିଲାର ଆଦିବାସୀମାନଙ୍କ ସର୍ବପୁରାତନ ପାରମ୍ପାରିକ ବାଦ୍ୟଯନ୍ତ୍ର (ଡୁଙ୍ଗଡୁଙ୍ଗା) ବଜାଇ ଭାରତର କୋଟି କୋଟି ଜନତାଙ୍କ ହୃଦୟରେ ଥିବା ଜାତୀୟ ସଙ୍ଗୀତ ଗାନ କରି ବର୍ତ୍ତମାନ ଚର୍ଚ୍ଚା ପାଲଟିଛନ୍ତି ନବରଙ୍ଗପୁର ସହରର ଆନନ୍ଦ କୁମାର ଦାଶ। ତାଙ୍କର ଏଭଳି ପ୍ରୟାସକୁ ଜିଲାବାସୀ ମଧ୍ୟ ସ୍ବାଗତ କରିବା ସହ ସଫଳତାର ଶିଡ଼ି ଚଢ଼ିବାକୁ କାମନା କରିଛନ୍ତି।
ନବରଙ୍ଗପୁର ସହରର ୧୭ ନମ୍ବର ଓ୍ବାର୍ଡ (ହିର୍ଲି ଡଙ୍ଗରି)ରେ ରୁହନ୍ତି ଆନନ୍ଦ। ବାପା ଭାବଗ୍ରାହୀ ଦାଶ ଓ ସ୍ବର୍ଗତାଃ ମା’ ପଦ୍ମାବତୀଙ୍କ ସାନ ପୁଅ ହେଉଛନ୍ତି ଆନନ୍ଦ l ସେ ଛୋଟ ବେଳୁ ହିଁ ଆଦିବାସୀ ପାରମ୍ପାରିକ ବାଦ୍ୟଯନ୍ତ୍ର ପ୍ରତି ଆକୃଷ୍ଟ ହୋଇ ଧିରେ ଧିରେ ସେସବୁ ବଜାଇବା ଶିଖିଥିଲେ। ସେ ନବରଙ୍ଗପୁର କଲେଜରେ ଜୁଲୋଜି ବିଷୟରେ ବିଏସ୍ସି ଶିକ୍ଷା ସମାପ୍ତ କରିଥିବା ବେଳେ ବର୍ତ୍ତମାନ ଏକ ମେରିକୋ ଇଣ୍ଡିଆ ଏଲ୍ଟିଡି ନାମକ ଏକ ତେଲ କମ୍ପାନୀରେ ମାର୍କେଟିଂ ଏକ୍ଜିକ୍ୟୁଟିଭ୍ ଭାବରେ କାର୍ଯ୍ୟ କରୁଛନ୍ତି। ସେ ପେସାରେ ତେଲକମ୍ପାନୀରେ କାମ କରୁଥିଲା ବେଳେ ତାଙ୍କର ନିଶା କିନ୍ତୁ ଆଦିବାସୀ ପାରମ୍ପରିକ ବାଦ୍ୟଯନ୍ତ୍ରଗୁଡ଼ିକୁ ବଜାଇବା ଓ ଲୁପ୍ତ ହୋଇଯାଉଥିବା ବାଦ୍ୟଯନ୍ତ୍ରଗୁଡ଼ିକୁ ପୁଣିଥରେ ଜନମାନସରେ ଉଜ୍ଜୀବିତ କରିବା। ସେଇ ଲକ୍ଷ୍ୟ ନେଇ ସେ ଓଡ଼ିଶାର ବିଭିନ୍ନ ଜିଲାରେ ହେଉଥିବା ବିଭିନ୍ନ କାର୍ଯ୍ୟକ୍ରମରେ ଅଂଶଗ୍ରହଣ କରି କେବଳ ନବରଙ୍ଗପୁର ଜିଲାର ଲୋକ ସଂସ୍କୃତି ଓ ପରମ୍ପରାକୁ ପ୍ରଚାର ପ୍ରସାର କରୁଛନ୍ତି। ଏଥିସହ ନବରଙ୍ଗପୁରର ୨୦ରୁ ୨୨ଜଣ ସ୍ଥାନୀୟ କଳାକାରଙ୍କୁ ଲୋକସଂସ୍କୃତି ଓ ଲୋକବାଦ୍ୟ ଶିକ୍ଷା ଦେଇ ରୋଜଗାର ମଧ୍ୟ ଦେଇଛନ୍ତି। ଏଥିସହିତ ସେ ଅବିଭକ୍ତ କୋରାପୁଟ ଜିଲାର ଲୋକବାଦ୍ୟ ଘୁଡୁକି, ଗୋଚିବାଜା, ଟାମକ, ଢାମ୍ପ, ଟୁଡୁବୁ ଖଞ୍ଜଣୀ, ବଂଶୀ, ତବଲା, ଢ଼ୋଲକ, ଝୁମୁକା ମଧ୍ୟ ବଜାଇ ଜାଣନ୍ତି l
ଲୋକେ ଆନନ୍ଦଙ୍କୁ ପ୍ରଶଂସା କରିବା ସହ ଶୁଭକାମନା ମଧ୍ୟ ଜଣାଇଛନ୍ତି। ସେ ଧରିଥିବା ଡୁଙ୍ଗଡୁଙ୍ଗା ବାଦ୍ୟ ହେଉଛି ଆଦିବାସୀମାନଙ୍କ ପ୍ରାକୃତିକ ଖାଦ୍ୟ ‘ଲାଉ ’ରୁ ନିର୍ମିତ l ଯାହାକି ଦେଖିବାକୁ ‘ମା’ ସରସ୍ବତୀ’ ଙ୍କ ବୀଣା ସଦୃଶ। ସେ ଜାତୀୟ ସଙ୍ଗୀତ ଗାନ କରି ବେଶ୍ ଖୁସି ଥିବା ସହ ଆଗାମୀ ପିଢ଼ି ପାଇଁ ଅବିଭକ୍ତ କୋରାପୁଟ ଜିଲାର ପାରମ୍ପରିକ ବାଦ୍ୟଯନ୍ତ୍ରର ପ୍ରଚାର ପ୍ରସାର ପାଇଁ ଏଭଳି ପ୍ରୟାସ କରିଥିବା କହିଛନ୍ତି।
