ଆନନ୍ଦପୁର,୧୭ା୫(ସ୍ବ.ପ୍ର.): ଆନନ୍ଦପୁର ପୌରପରିଷଦର ନୂତନ ପାରିଷଦ ଗଠନ ହେବାର ବର୍ଷକ ମଧ୍ୟରେ ୩ ପୌର ଅଧିକାରୀଙ୍କ ଦାୟିତ୍ୱକୁ ନେଇ ଚର୍ଚ୍ଚା ଜୋର ଧରିଛି। ବର୍ତ୍ତମାନ ଆନନ୍ଦପୁର ପୌରଅଧିକାରୀ ଭାବେ ନିଯୁକ୍ତି ପାଇଥିବା ଅଶୋକ କୁମାର ରାଉତଙ୍କ ବଦଳି ଆଦେଶକୁ ନେଇ ଏଭଳି ଚାପା ଗୁଞ୍ଜରଣ ସୃଷ୍ଟି ହୋଇଛି। ରାଜ୍ୟ ସରକାରଙ୍କ ହାଉସିଂ ଓ ସହରୀ ଉନ୍ନୟନକରଣ ବିଭାଗ ଭୁବନେଶ୍ୱର ଆଦେଶ ପତ୍ର ସଂଖ୍ୟା ୯୯୯୯/୧୭ା୫ା୨୩ ଅନୁଯାୟୀ, ଆନନ୍ଦପୁର ପୌର ଅଧିକାରୀଙ୍କୁ ଜେ.ଇ. ସିଡିଏ, କଟକ ଭାବେ ବଦଳି ଆଦେଶ ହୋଇଛି। ଆନନ୍ଦପୁର ପୌର କାର୍ଯ୍ୟାଳୟରେ ୫ଟି ସରକାରୀ ବ୍ୟବସ୍ଥା ସଠିକ୍ ଭାବେ ତ୍ୱରାନ୍ବିତ ହୋଇପାରୁ ନ ଥିବା, ପୌରକର୍ମଚାରୀଙ୍କ ମଧ୍ୟରେ ସମନ୍ବୟ ଅଭାବ କାରଣକୁ ନେଇ ରାଜ୍ୟ ହାଉସିଂ ଓ ସହରୀ ଉନ୍ନୟନ ବିଭାଗ ନିକଟରେ ଅଭିଯୋଗପତ୍ର ଦାଖଲ ହୋଇଥିଲା। ସେହିପରି ପୌରଅଧିକାରୀ ରାଉତ ମଧ୍ୟ ଅନ୍ୟତ୍ର ବଦଳି ହେବା ପାଇଁ ବିଭାଗୀୟ ଅଧିକାରୀଙ୍କ ନିକଟକୁ ପତ୍ର ଲେଖିବା ଭଳି ଘଟଣା ମଧ୍ୟ ଚର୍ଚ୍ଚାକୁ ଆସିଥିଲା। ପୌରଅଧିକାରୀଙ୍କ ବଦଳି ଆଦେଶ ପରେ ଦାୟିତ୍ୱ କିଏ ଗ୍ରହଣ କରିବେ ସେ ସମ୍ପର୍କରେ କୌଣସି ସୂଚନା ହସ୍ତଗତ ହୋଇନାହିଁ।
ସୂଚନାଯୋଗ୍ୟ, ନୂତନ ପାରିଷଦ ଗଠନର ବର୍ଷକ ମଧ୍ୟରେ ଆନନ୍ଦପୁର ପୌରପରିଷଦରେ ତିନି ତିନି ଜଣ ପୌରଅଧିକାରୀଙ୍କୁ ଦେଖିଲାଣି। ନୂତନ ପାରିଷଦ ଗଠନର ପ୍ରାଥମିକ ପର୍ଯ୍ୟାୟରେ ଲଳିତ କୁମାର ନାୟକ ପୌରଅଧିକାରୀ ଭାବେ ଦାୟିତ୍ୱରେ ଥିବାବେଳେ ତାଙ୍କର ବଦଳି ହୋଇଥିଲା। ଆନନ୍ଦପୁର ତହସିଲଦାର ମାନସ କୁମାର ତ୍ରିପାଠୀଙ୍କୁ ପୌରଅଧିକାରୀଙ୍କ ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଥିଲା।