ନୂଆଦିଲ୍ଳୀ,୨୮।୮: ଦୁବାଇର ସବୁଠାରୁ ଦାମୀ ଘର କିଣିଛନ୍ତି ରିଲାଏନ୍ସ ଗ୍ରୁପ୍ର ମାଲିକ ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀ। ସମୁଦ୍ରକୂଳରେ ଏହି ଘର ରହିଥିବାବେଳେ ଏହାକୁ ୮୦ ମିଲିୟନ୍ ଡଲାର ବିନିମୟରେ କିଣାଯାଇଛି। ଦୁବାଇର ପାଲ୍ମ ଜୁମେରାହରେ ଏହି ପ୍ରପର୍ଟି ରହିଥିବାବେଳେ ଚଳିତ ବର୍ଷ ମୁକେଶଙ୍କ ସାନ ପୁଅ ଏହି ସମ୍ପତ୍ତି କିଣିଛନ୍ତି। ସୂଚନାଯୋଗ୍ୟ ଅମ୍ବାନୀ ପରିବାର ଏହି ଡିଲ୍କୁ ଗୋପନୀୟ ରଖିବାକୁ ଚାହୁଁଥିଲେ। ବିଶ୍ୱର ପ୍ରତ୍ୟେକ ଧନିକ ଲୋକଙ୍କ ପ୍ରିୟ ବ୍ୟବସାୟିକ ସ୍ଥଳୀ ହେଉଛି ଦୁବାଇ। ବାହାର ଦେଶର ଲୋକଙ୍କ ପାଇଁ ଦୁବାଇ ସରକାର ବିଶେଷ କଟକଣା ଲାଗୁ କରି ନ ଥିବା ହେତୁ ସେଠାରେ ସମ୍ପତ୍ତି କ୍ରୟ କରିବାରେ ସେତେ ଅସୁବିଧା ହୋଇ ନ ଥାଏ। ବ୍ରିଟିଶ ଫୁଟବଲ ଖେଳାଳି ଡେଭିଡ୍ ବେକ୍ହାମ ସ୍ତ୍ରୀ ଭିକ୍ଟୋରିଆ ଏବଂ ବଲିଉଡ୍ ମେଗାଷ୍ଟାର ଶାହରୁଖ ଖାନ୍ ମଧ୍ୟ ଦୁବାଇରେ ସମ୍ପତ୍ତି କିଣିଥିବା କୁହାଯାଉଛି।
