ଇସଲାମାବାଦ,୨୧।୧ : ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଚେତାବନୀ ଦେଇଛନ୍ତି ଯଦି ସାଧାରଣ ନିର୍ବାଚନରେ ସ୍ବଚ୍ଛତା ବଜାୟ ନ ରଖାଯାଏ ଏବଂ ତାଙ୍କ ଦଳ ପ୍ରତିଦ୍ୱନ୍ଦ୍ୱିତା ପାଇଁ ସମାନ ସୁଯୋଗ ନ ପାଏ, ତେବେ ନିର୍ବାଚନ ପରେ ଦେଶରେ ଅଶାନ୍ତି,ଅସ୍ଥିରତା ଏବଂ ଅରାଜକତା ବୃଦ୍ଧି ପାଇବ। ପାକିସ୍ତାନର ଆଡିଆଲା ଜେଲରେ ଥିବା ଇମ୍ରାନ ଖାନ ଗଣମାଧ୍ୟମକୁ ଏଭଳି କହିଛନ୍ତି। ନିର୍ବାଚନରେ ପ୍ରଚାର କରୁଥିବାବେଳେ ତାଙ୍କ ଦଳ ପିଟିଆଇ ଅନେକ ସମସ୍ୟାର ସମ୍ମୁଖୀନ ହେଉଛି ବୋଲି ଇମ୍ରାନ ଖାନ ଦାବି କରିଛନ୍ତି। ଦଳକୁ ନିର୍ବାଚନ ସଭା କରିବାକୁ ବାରଣ କରାଯାଉଛି।
ପାକିସ୍ତାନୀ ଗଣମାଧ୍ୟମ ଅନୁଯାୟୀ ଇମ୍ରାନ ଖାନ କହିଛନ୍ତି ପିଟିଆଇ କର୍ମଚାରୀଙ୍କୁ ଅଧିକାରୀମାନେ ହଇରାଣ କରୁଛନ୍ତି ଏବଂ ଅଟକ ରଖିଛନ୍ତି। ବହୁ ସଂଖ୍ୟକ ଲୋକ ଏହା ସହ ଜଡିତ ଥିବାରୁ ସରକାର ଦଳକୁ ରଦ୍ଦ କରିପାରିବେ ନାହିଁ ବୋଲି ସେ କହିଛନ୍ତି। ଇମ୍ରାନ ଖାନ ମଧ୍ୟ ସେହି ନେତାମାନଙ୍କୁ ଚେତାବନୀ ଦେଇଛନ୍ତି ଯେଉଁମାନେ ପିଟିଆଇ ଛାଡି ଅନ୍ୟ ଦଳରେ ଯୋଗ ଦେଉଛନ୍ତି। ଇମ୍ରାନ କହିଛନ୍ତି ପିଟିଆଇ ଛାଡୁଥିବା ଏଭଳି ନେତାଙ୍କ ରାଜନୀତି ଆଗାମୀ ଦିନରେ ଶେଷ ହେବ।
ଇମ୍ରାନ ଖାନ ଅଭିଯୋଗ କରିଛନ୍ତି ନିର୍ବାଚନ ଆୟୋଗ ଜାଣିଶୁଣି ପିଟିଆଇର ଆଭ୍ୟନ୍ତରୀଣ ନିର୍ବାଚନ ପ୍ରସଙ୍ଗରେ ବିଳମ୍ବ କରିଛନ୍ତି ଏବଂ ହଠାତ ଦଳକୁ ନିର୍ବାଚନ ପ୍ରକ୍ରିୟାରୁ ଦୂରେଇ ରଖିବା ପାଇଁ କଠୋର ନିଷ୍ପତ୍ତି ନେଇଛନ୍ତି। ଜାନୁଆରୀ ୧୩ ରେ ପାକିସ୍ତାନର ସୁପ୍ରିମକୋର୍ଟ ତାଙ୍କ ନିଷ୍ପତ୍ତିରେ ପିଟିଆଇର ନିର୍ବାଚନୀ ଚିହ୍ନ ବ୍ୟାଟକୁ ଦଳ ପାଖରୁ ଛଡ଼ାଇ ନେବାକୁ ନିର୍ଦ୍ଦେଶ ଦେଇଛନ୍ତି। ଏହି କାରଣରୁ, ପିଟିଆଇରୁ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀଙ୍କୁ ବର୍ତ୍ତମାନ ସ୍ବାଧୀନ ପ୍ରାର୍ଥୀ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ପଡ଼ିବ। ପାକିସ୍ତାନର ନିର୍ବାଚନ ଆୟୋଗ ପିଟିଆଇ ଆଭ୍ୟନ୍ତରୀଣ ନିର୍ବାଚନ ନ କରି ଥିବାରୁ ଏହାର ଚିହ୍ନ ବ୍ୟବହାର କରିବାକୁ ବାରଣ କରିଥିଲେ। ଏହି ମାମଲା ସୁପ୍ରିମକୋର୍ଟରେ ପହଞ୍ଚିଥିଲା ଯେଉଁଠାରେ ସୁପ୍ରିମକୋର୍ଟ ନିର୍ବାଚନ ଆୟୋଗର ନିଷ୍ପତ୍ତିକୁ ସମର୍ଥନ କରି ଦଳର ନିର୍ବାଚନ ଚିହ୍ନ ଛଡ଼ାଇ ନେବାକୁ ନିଷ୍ପତ୍ତି ନେଇଥିଲେ।