ଭୁବନେଶ୍ୱର,୫ା୮(ସତ୍ୟଜିତ୍ ରାଉତ):ଦେଶର ବଡ଼ ଶିଳ୍ପପତି, କ୍ରୀଡ଼ାବିତ୍ ଓ ଅଭିନେତାଙ୍କ ଫଟୋ ବ୍ୟବହାର କରି ଅନ୍ଲାଇନ୍ ପୋଞ୍ଜି ସ୍କାମ୍ ମାମଲାରେ ଓଡ଼ିଶା କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଅଧିକ ତଦନ୍ତ ଚଳାଇଛି। ଏହି ମାମଲାରେ ଚାଇନା ମାଷ୍ଟରମାଇଣ୍ଡ ଗୁଆଁହୁଆ ୱାଙ୍ଗ୍ଙ୍କ ବିରୋଧରେ ପୂର୍ବରୁ ଲୁକ୍ଆଉଟ୍ ସର୍କୁଲାର (ଏଲ୍ଓସି) ଜାରି ହୋଇଥିଲା। ଏବେ ତାଙ୍କ ସହଯୋଗୀ ତଥା ୩ ଚାଇନା ନାଗରିକଙ୍କୁ ଧରିବାକୁ ଇଓଡବ୍ଲ୍ୟୁ ପ୍ରୟାସ ଆରମ୍ଭ କରିଛି। ସେମାନେ ହେଲେ ଲିୟୁ ହୁଆଁ, ୱେନ୍ହ୍ୟୁ ଝେଙ୍ଗ୍ ଓ ଜିହ୍ୟୁ ଜିହାଲୁ। ଇଓଡବ୍ଲ୍ୟୁର ଅନୁରୋଧକ୍ରମେ କେନ୍ଦ୍ର ସରକାରଙ୍କ ବ୍ୟୁରୋ ଅଫ୍ ଇମିଗ୍ରେଶନ୍ (ବିଓଆଇ) ଏମାନଙ୍କ ବିରୋଧରେ ଲୁକ୍ଆଉଟ୍ ସର୍କୁଲାର ଜାରି କରିଛି। ବିଓଆଇ ପକ୍ଷରୁ ଦେଶର ସମସ୍ତ ଏୟାରପୋର୍ଟ ଓ ସି ବିଚ୍ ସମେତ ଅନ୍ୟାନ୍ୟ ଚେକ୍ ପୋଷ୍ଟରେ ଆଲର୍ଟ କରାଯାଇଛି। ଏଥିସହ ନଜର ରଖିବାକୁ ଲ’ ଏନ୍ଫୋର୍ସମେଣ୍ଟ ଏଜେନ୍ସି ଓ ବିଦେଶୀ ଲ’ ଏନ୍ଫୋର୍ସମେଣ୍ଟ ଏଜେନ୍ସିଗୁଡ଼ିକ ସହ ମଧ୍ୟ ଯୋଗାଯୋଗ କରାଯାଉଛି। ତେବେ ଏମାନଙ୍କୁ ଧରିବା ଇଓଡବ୍ଲ୍ୟୁ ବଡ଼ ଚ୍ୟାଲେଞ୍ଜ ହେବ ବୋଲି କୁହାଯାଉଛି। ଅନ୍ୟପକ୍ଷରେ ଏହି ଠକେଇ ର଼୍ୟାକେଟ ପରିଚାଳନା ଦାୟିତ୍ୱରେ ଥିବା ଭାରତ ମୁଖ୍ୟ ଚିତ୍ରଭେଲ୍ଙ୍କୁ ଇଓଡବ୍ଲ୍ୟୁ ଗତ ଅଗଷ୍ଟ ଦ୍ୱିତୀୟ ସପ୍ତାହରେ ତାମିିଲନାଡ଼ୁରୁ ଗିରଫ କରିଥିବା ବେଳେ ସେ ଏବେ ଜେଲରେ ଅଛନ୍ତି।
ସୂଚନା ଅନୁଯାୟୀ, ମାଷ୍ଟରମାଇଣ୍ଡ ଗୁଆଁହୁଆ ତାଙ୍କ ସହଯୋଗୀଙ୍କ ସହ ୨୦୧୯ ବାଙ୍ଗାଲୋରକୁ ଆସି ସାଇବର ଠକେଇ କରିବାକୁ ପ୍ରାୟ ୧୪ଟି ସେଲ୍ କମ୍ପାନୀ ଖୋଲିଥିଲେ। କୋଭିଡ୍ ସମୟରେ ଗୁଆଁହୁଆ ତାଙ୍କ ସହଯୋଗୀଙ୍କୁ ନେଇ ଚାଇନା ପଳାଯିବା ସହ ଚିତ୍ରଭେଲ୍ଙ୍କ ସହଯୋଗରେ ଭାରତରେ ଏହି ସ୍କାମ୍ ଚଳାଉଥିଲେ। ଗ୍ରାହକମାନଙ୍କୁ ନିର୍ଯାତନା ଦେଉଥିବା ଗ୍ୟାଙ୍ଗକୁ ଚିତ୍ରଭେଲ୍ ହିଁ ପରିଚାଳନା କରୁଥିଲେ। ଏହି ଆପ୍ଗୁଡ଼ିକୁ ସରକାର ବ୍ୟାନ୍ କରିବା ପରେ ଚାଇନା ନାଗରିକମାନେ ଅନ୍ଲାଇନ୍ ପୋଞ୍ଜି ସ୍କାମ୍ କରି ଲୋକଙ୍କୁ ଫଶାଉଥିଲେ। ଫେକ୍ ଆପ୍ଗୁଡ଼ିକ ଦ୍ୱାରା ସେଲିବ୍ରିଟିଙ୍କ ଫଟୋକୁ ବିଜ୍ଞାପନ ରୁପେ ବ୍ୟବହାର କରି ଲୋକଙ୍କୁ ଆକୃଷ୍ଟ କରୁଥିଲେ। ୫ ଟଙ୍କାରୁ ୧୨୫ ଟଙ୍କା, ୨୦ ଟଙ୍କାରୁ ୧୨୮୫ ଟଙ୍କା ମିଳିବ ବୋଲି କୁହାଯାଇ ଅନ୍ଲାଇନ୍ ମାଧ୍ୟମରେ ବହୁ ଟଙ୍କା ନେଇଯାଇ ଏହି ଠକ।