ନୂଆଦିଲ୍ଲୀ,୧୬।୭: ପୁଣି ଥରେ ଏୟାରଟେଲ ଗ୍ରାହକଙ୍କ ବଡ଼ ଝଟ୍କା । ଦେଶର ଦ୍ୱିତୀୟ ବୃହତ୍ତମ ଟେଲିକମ କମ୍ପାନୀ ଏୟାରଟେଲ ପୁଣି ଥରେ ନିଜ ରିଚାର୍ଜ ବଢାଇଛି। କମ୍ପାନୀ ଜୁଲାଇ ୩ ରେ ଏହାର ରିଚାର୍ଜ ଯୋଜନାର ମୂଲ୍ୟ ବୃଦ୍ଧି କରିଥିଲା। କିନ୍ତୁ ଏବେ ପୁଣି ଏଥିରେ ବୃଦ୍ଧି କରିଛି। ଜୁଲାଇ ୩ ରୁ ଏୟାରଟେଲ ଏହାର ଯୋଜନାକୁ ପ୍ରାୟ ୨୧ ପ୍ରତିଶତ ମହଙ୍ଗା କରିଛି। ବର୍ତ୍ତମାନ ଏୟାରଟେଲ ଏହାର ତିନୋଟି ଡାଟା ପ୍ୟାକ ମୂଲ୍ୟ ବଢାଇ ଉପଭୋକ୍ତାମାନଙ୍କୁ ପୁଣି ଟେନସନ ଦେଇଛି ।
ଯଦି ଆପଣ ଏୟାରଟେଲ ସିମ ବ୍ୟବହାର କରନ୍ତି ତେବେ ବର୍ତ୍ତମାନ ଆପଣଙ୍କୁ ଡାଟା ପାଇଁ ଅଧିକ ଟଙ୍କା ଖର୍ଚ୍ଚ କରିବାକୁ ପଡିପାର । ଏୟାରଟେଲ ଏହାର ଡାଟା ପ୍ଲାନର ମୂଲ୍ୟ ୬୦ ଟଙ୍କାକୁ ବୃଦ୍ଧି କରିଛି। ୭୯, ୧୮୧ ଟଙ୍କା ଏବଂ ୩୦୧ ଟଙ୍କା ଡାଟା ପ୍ୟାକର ଦାମ ବୃଦ୍ଧି ହୋଇଛି ।
ଏୟାରଟେଲ ଏହାର ୧୮୧ ଯୋଜନାର ମୂଲ୍ୟ ୩୦ ଟଙ୍କା ବୃଦ୍ଧି କରିଛି। ବର୍ତ୍ତମାନ ଆପଣ ୨୧୧ ଟଙ୍କା ଦେଇ ୧୮୧ ପ୍ଲାନ ଭଳି ସମାନ ସୁବିଧା ପାଇବେ । ଏହି ଯୋଜନାରେ ଆପଣ ୩୦ ଦିନର ବୈଧତା ପାଇବେ । କମ୍ପାନୀ ପ୍ରତିଦିନ ୧ ଜିବି ଡାଟା ପ୍ରଦାନ କରିଥାଏ । ଯଦି ଆପଣ ଆପଣଙ୍କର ନିୟମିତ ଯୋଜନା ସହିତ ଅତିରିକ୍ତ ୧ ଜିବି ଡାଟା ଚାହୁଁଛନ୍ତି ତେବେ ଆପଣ ଏହି ଯୋଜନା ପାଇଁ ଯାଇପାରିବେ ।
୩୦୧ ଟଙ୍କା ଡାଟା ଯୋଜନାରେ କମ୍ପାନୀ ସର୍ବାଧିକ ୬୦ ଟଙ୍କା ବୃଦ୍ଧି କରିଛି। ବର୍ତ୍ତମାନ ଏହି ପ୍ଲାନ ରିଚାର୍ଜ କଲେ ଆପଣଙ୍କୁ ୩୬୧ ଟଙ୍କା ଖର୍ଚ୍ଚ କରିବାକୁ ପଡିବ । ଏଥିରେ କମ୍ପାନୀ ଗ୍ରାହକଙ୍କୁ ମୋଟ ୫୦ ଜିବି ଡାଟା ଦେଇଥାଏ । ଯଦି ଆପଣ ଦୀର୍ଘ ବୈଧତା ସହିତ ଏକ ଯୋଜନା ନେଇଛନ୍ତି, ତେବେ ଯୋଜନା ଶେଷ ନହେବା ପର୍ଯ୍ୟନ୍ତ ଆପଣ ଏହି ୫୦ ଜିବି ଡାଟା ବ୍ୟବହାର କରିପାରିବେ ।
ଏୟାରଟେଲ ଏହାର ଅନ୍ୟ ଏକ ଯୋଜନାରେ ପରିବର୍ତ୍ତନ କରିଛି ଯାହା ୯୯ ଟଙ୍କା ଡାଟା ପ୍ୟାକ । ଯଦିଓ ଏହା ଏକ ନୂଆ ପ୍ୟାକ ନୁହେଁ । ଏହି ଯୋଜନା ପୂର୍ବରୁ ୭୯ ଟଙ୍କା ଥିଲା, ଯାହା ବର୍ତ୍ତମାନ ୯୯ ଟଙ୍କା ହୋଇଯାଇଛି। ଏହି ଯୋଜନାରେ କମ୍ପାନୀ ଗ୍ରାହକଙ୍କୁ ୨୦ ଜିବି ଡାଟା ଦେଇଥାଏ ।
