ଲୋଇସିଂହା,୧୨।୧୧(ସୁଶାନ୍ତ ବାରିକ): ସୁବର୍ଣ୍ଣପୁର ଜିଲା ତରଭା ବ୍ଲକ କୁମୁଣ୍ଡେ ସରକାରୀ ଉଚ୍ଚ ବିଦ୍ୟାଳୟରେ ଲାଗି ରହିଥିବା ବିବାଦ ସମାଧାନ ହେବାର ନେଉନାହିଁ। ଶିକ୍ଷା ବିଭାଗ ଆନ୍ତରିକତା ଅଭାବକୁ ଦାୟୀ କରି ଛାତ୍ରୀଛାତ୍ର ଓ ଗ୍ରାମବାସୀ ପୁଣି ଆନ୍ଦୋଳନକୁ ଓହ୍ଲାଇଛନ୍ତି। ମଙ୍ଗଳବାର ଆନ୍ଦୋଳନର ଦ୍ୱିତୀୟ ଦିବସ। ସୋମବାର ଗ୍ରାମବାସୀ ସ୍କୁଲ ଗେଟରେ ତାଲା ପକାଇ ଦେଇଥିଲେ। ଫଳରେ ସ୍କୁଲ ବାହାରେ ବିଦ୍ୟାଳୟର ଶିକ୍ଷୟିତ୍ରୀଶିକ୍ଷକ ବାହାରେ ରହିଥିଲେ। ଅପରପକ୍ଷରେ ଛାତ୍ରୀଛାତ୍ର ଓ ଅବିଭାବକମାନେ କୁମୁଣ୍ଡେ- ବିଲାଇସର୍ଡ଼ା ରାସ୍ତାରେ ବସି ବିକ୍ଷୋଭ ପ୍ରଦର୍ଶନ କରିଥିଲେ। ଧାରଣା ସ୍ଥଳକୁ ବିଦ୍ୟାଳୟ ଶିକ୍ଷୟିତ୍ରୀଶିକ୍ଷକ କେହି ଆଲୋଚନା ପାଇଁ ଆସି ନ ଥିଲେ। ଫଳରେ ଅନିର୍ଦ୍ଦିଷ୍ଟ କାଳପାଇଁ ଧାରଣା ଜାରି ରହିଛି।
ପ୍ରକାଶ ଯେ, ଉକ୍ତ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ଯାଏ ରହିଛି। ବିଦ୍ୟାଳୟରେ ଆବଶ୍ୟକ ଶିକ୍ଷକ ଥାଇ ସୁଦ୍ଧା ପାଠପଢ଼ା ନ ହେବା, ମଧ୍ୟାହ୍ନ ଭୋଜନରେ ଅନିୟମିତତା ଏବଂ ପ୍ରଧାନ ଶିକ୍ଷକଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣି ଗତ ସେପ୍ଟେମ୍ବର ମାସରେ ବ୍ଲକ ଶିକ୍ଷା ଅଧିକାରୀଙ୍କ ନିକଟରେ ଫେରାଦ ହୋଇଥିଲେ। ଅଭିଯୋଗକୁ ନେଇ ବ୍ଲକ ଶିକ୍ଷା ବିଭାଗ ପକ୍ଷରୁ ହୋଇଥିବା ତଦନ୍ତ ପ୍ରକ୍ରିୟାକୁ ଅସନ୍ତୋଷ ବ୍ୟକ୍ତ କରି ଅକ୍ଟୋବର ୧୮ ତାଲାବନ୍ଦ ଆନ୍ଦୋଳନ କରି ଧାରଣା ଦିଆଯାଇଥିଲା। ଖବର ପାଇ ଜଣେ ଏବିଇଓ ବୁଝାସୁଝା ପାଇଁ ଧାରଣାସ୍ଥଳକୁ ଆସିଥିଲେ। ହେଲେ ସମ୍ପୃକ୍ତ ଅଧିକାରୀଙ୍କୁ ଗ୍ରାମବାସୀଙ୍କ ରୋଷର ଶିକାର ହେବାକୁ ପଡ଼ିଥିଲା। ସେହିଦିନ ଅପରାହ୍ନରେ ବିଇଓ ଆସି ପ୍ରଧାନ ଶିକ୍ଷକଙ୍କୁ ନିଲମ୍ବନ କରିଥିବା ଜଣାଇଥିଲେ।
ପରବର୍ତ୍ତୀ ସମୟରେ ବିଦ୍ୟାଳୟର ଅନ୍ୟ ଜଣେ ସହକାରୀ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି କରାଯାଇଥିଲା। ବିଦ୍ୟାଳୟକୁ ଶୃଙ୍ଖଳିତ ପରିଚାଳନ, ନିଲମ୍ବିତ ପ୍ରଧାନ ଶିକ୍ଷକ ଦାୟିତ୍ୱ ହସ୍ତାନ୍ତର ଏବଂ ଅନିୟମିତତା ଘଟଣାରେ କାର୍ଯ୍ୟାନୁଷ୍ଠାନ ଦାବିରେ ଜିଲା ଶିକ୍ଷା ଅଧିକାରୀଙ୍କୁ ସୋନପୁର କାର୍ଯ୍ୟାଳୟରେ ଭେଟିଥିଲେ ଗ୍ରାମବାସୀ । ଗତ ମାସ ୨୮ ତାରିଖ ସୁଦ୍ଧା ତଦନ୍ତ ସାରିବା ସହ ଜିଲା ଶିକ୍ଷା ଅଧିକାରୀ ସ୍କୁଲ ଗସ୍ତ କରିବାକୁ କଥା ଦେଇଥିଲେ। ଜିଲା ଶିକ୍ଷା ଅଧିକାରୀ ପ୍ରତିଶ୍ରୁତି ରକ୍ଷା କରି ନ ଥିବାରୁ ଏହାର ପ୍ରତିବାଦରେ ଗ୍ରାମବାସୀ ପୁଣି ଆନ୍ଦୋଳନକୁ ଓହ୍ଲାଇ ଥିବା ଜୟଗୁରୁ କୁଆଁର କହିଛନ୍ତି।