ସାଉଥାମ୍ପଟନ,୨୮।୯(ପି.ଟି.): ବିଶ୍ୱର ପ୍ରଥମ ଦ୍ରୁତ ବୋଲର ଭାବେ ଟେଷ୍ଟରେ ୬୦୦ ଉଇକେଟ ଅକ୍ତିଆର କରିଥିବା ଇଂଲଣ୍ଡର ଜେମ୍ସ ଆଣ୍ଡରସନ ଏବେ ଏକ ନୂଆ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଆସନ୍ତା ବର୍ଷ ଅଷ୍ଟ୍ରେଲିଆରେ ଖେଳାଯିବାକୁ ଥିବା ଆଶେସ ସିରିଜ ଖେଳିବା ପାଇଁ ଲକ୍ଷ୍ୟ ରଖିଛନ୍ତି। ଅଷ୍ଟ୍ରେଲିଆରେ ସେ ଏହି ହାଇପ୍ରୋଫାଇଲ ଟେଷ୍ଟ ସିରିଜ ଖେଳିବାକୁ ସେ ସବୁକିଛି କରିବାକୁ ପ୍ରସ୍ତୁତ୍ ଅଛନ୍ତି ବୋଲି କହିଛନ୍ତି।
୨୦୦୩ରେ ୩୮ ବର୍ଷୀୟ ଆଣ୍ଡରସନ୍ ଟେଷ୍ଟ ପଦାର୍ପଣ କରିଥିଲେ। ଏହାପରଠାରୁ ସେ ଇଂଲଣ୍ଡ ପାଇଁ ୧୫୬ଟି ଟେଷ୍ଟ ଖେଳି ଇଂଲଣ୍ଡର ସର୍ବାଧିକ ଟେଷ୍ଟ ଉଇକେଟ ହାସଲ କରି ବୋଲର ସାବ୍ୟସ୍ତ ହୋଇଛନ୍ତି। ଏଥିରେ ୪ଟି ଆଶେସ ଟୁର ସାମିଲ ରହିଛି। ଏବେ ମଧ୍ୟ ଉଇକେଟ ହାସଲ କରିବାକୁ ବ୍ୟଗ୍ର ରହିଛି। କ୍ରିକେଟ ଖେଳିବାକୁ ଏବେ ମଧ୍ୟ ଭଲ ପାଉଛି। ତେଣୁ ଫିଟ୍ ରହିବା ସହ ପ୍ରଦର୍ଶନରେ ଉନ୍ନତି ଆଣିବାକୁ ପ୍ରୟାସ ଜାରି ରଖିଛି ବୋଲି ସେ ‘ବିବିସି ବ୍ରେକ୍ଫାଷ୍ଟ’କୁ ସାକ୍ଷାତକାର ଦେବା ଅବସରରେ କହିଛନ୍ତି। ଏଥର ଆସେଶ ସିରିଜ ଅଷ୍ଟ୍ରେଲିଆରେ ନଭେମ୍ବର ୨୦୨୧ରୁ ଜାନୁୟାରୀ ୨୦୨୨ ଜାନୁୟାରୀ ମଧ୍ୟରେ ଆୟୋଜନ ହେବ। ଆଗାମୀ ଦିନରେ ଭଲ ପ୍ରଦର୍ଶନ କଲେ ଆଶେସ ପାଇଁ ସେ ଦଳରେ ସାମିଲ ହୋଇପାରିବେ। ପୂର୍ବରୁ ଚଳିତ ସପ୍ତାହରେ ଆଣ୍ଡରସନ ବିଶ୍ୱର ଚତୁର୍ଥ ବୋଲର ଓ ପ୍ରଥମ ଦ୍ରୁତ ବୋଲର ଭାବେ ଟେଷ୍ଟରେ ୬୦୦ ଉଇକେଟ ହାସଲ କରିବାର ଗୌରବ ଅର୍ଜନ କରିଥିଲେ। ପାକିସ୍ତାନ ବିପକ୍ଷ ତୃତୀୟ ତଥା ଅନ୍ତିମ ଟେଷ୍ଟରେ ଅଧିନାୟକ ଆଝାର ଅଲୀଙ୍କୁ ଆଉଟ କରିବା ପରେ ସେ ଏହି ମାଇଲଖୁଣ୍ଟ ସ୍ପର୍ଶ କରିଥିଲେ। ଅବସର ନେଇଥିବା ସ୍ପିନର ମୁଥିଆ ମୁରଲୀଧରନ (୮୦୦), ଶେନ୍ ଓ୍ବର୍ନ (୭୦୮) ଓ ଅନିଲ କୁମ୍ବଲେ (୬୧୯) ଆଣ୍ଡରସନଙ୍କଠାରୁ ଅଧିକ ଉଇକେଟ ହାସଲ କରିଛନ୍ତି। କଠିନ ପରିଶ୍ରମ ଓ ଅଧ୍ୟବସାୟ ବଳରେ ସେ ଏହି ମାଇଲଖୁଣ୍ଟ ଛୁଇଁଛନ୍ତି। ଏହା ପଛରେ ପ୍ରକୃତିଦତ୍ତ ଶରୀରର ଭୂମିକା ରହିଛି ବାଲି ସେ କହିଛନ୍ତି। ଜିମ୍ରେ ଫିଟ୍ ରହିବାକୁ ଓ ମୋ ଆକ୍ସନକୁ ଯେତେସମ୍ଭବ ସହଜ କରିବାକୁ ସବୁବେଳେ ପ୍ରୟାସ କରିଥାଏ। ଇଞ୍ଜୁରୀଠାରୁ ଦୂରେଇ ରହିପାରିଲେ ଆଉ ଅଧିକ ସମୟ ଖେଳିପାରିବି ବୋଲି ଆଣ୍ଡରସନ କହିଛନ୍ତି।
