ପଟ୍ଟାଙ୍ଗି, ୨୦।୪: (ଡି.ଏନ.ଏ.) କୋରାପୁଟ ଜିଲା ପଟ୍ଟାଙ୍ଗି ବ୍ଲକ ସୀମାନ୍ତ ଅଞ୍ଚଳରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରୁଥିବା ଦାବି କରୁଥିବା ବ୍ଲକ ପ୍ରଶାସନର ଇଚ୍ଛାଶକ୍ତି ଅଭାବରୁ ଉନ୍ନୟନମୂଳକ କାର୍ଯ୍ୟ ସବୁ ଦିଗହରା ହେଉଛି। ସୀମାନ୍ତ ଅଞ୍ଚଳରେ ଆନ୍ଧ୍ର ଏଥିରୁ ଫାଇଦା ଉଠାଉଛି। ଏପରି ଏକ ଘଟଣା ଏବେ ନଜରକୁ ଆସିଛି। ଓଡ଼ିଶା ଆଶ୍ରମ ବିଦ୍ୟାଳୟରୁ ଆନ୍ଧ୍ର ବିଦ୍ୟୁତ୍ କାଟି ଦେବାପରି ଘଟଣା ଦେଖିବାକୁ ମିଳିଛି।
ଖବରରୁ ଜଣାପଡିଛି, ପଡୋଶୀ ଆନ୍ଧ୍ର ସୀମାକୁ ଲାଗି ରହିଛି କୋଟିଆ ପଞ୍ଚାୟତ। ଉକ୍ତ ପଞ୍ଚାୟତର ବିବାଦୀୟ ୨୧ଖଣ୍ଡ ଗ୍ରାମର କିଛି ଗ୍ରାମରେ ଓଡ଼ିଶା ରାଜ୍ୟ ସରକାରଙ୍କ ପକ୍ଷରୁ ବିଦ୍ୟୁତ୍ ସେବା ଯୋଗାଇ ଦିଆଯାଇଛି। ତଳସେମ୍ବି ଗ୍ରାମ ପର୍ଯ୍ୟନ୍ତ ପଟ୍ଟାଙ୍ଗି ବ୍ଳକ ପ୍ରଶାସନ ବିଦ୍ୟୁତ୍ ସେବା ଯୋଗାଇ ଦେଇଛି। ସବୁ ଗ୍ରାମରେ ବିଦ୍ୟୁତ୍ ସେବା ଯୋଗାଇବାରେ ବ୍ଳକ ପ୍ରଶାସନ ସଫଳ ହୋଇପାରିନାହିଁ । ଫଳରେ ଆନ୍ଧ୍ର ବିଦ୍ୟୁତ୍ ସେବା ଅପହଞ୍ଚ ହୋଇଥିବା ସେହି ସବୁ ଗ୍ରାମରେ ପହଞ୍ଚତ୍ ବିଦ୍ୟୁତ୍ ସେବା ସହ ପାନୀୟ ଜଳ ଯୋଗାଣ ବ୍ୟବସ୍ଥା କରିଛି। ଏହି ଗ୍ରାମ ମଧ୍ୟରେ ରହିଛି ଓଡ଼ିଶା ସରକାରଙ୍କ ତାଡିବାଲସା ଗ୍ରାମ। ଉକ୍ତ ଗ୍ରାମରେ ରହଛି ନେରିଡିବାଲସା ଆଶ୍ରମ ବିଦ୍ୟାଳୟ। ବିଦ୍ୟାଳୟଟି ପୂର୍ବରୁ ଡେସ୍କୁଲ ଭାବେ ଚାଲୁଥିବା ବେଳେ ୨୦୨୧ରେ ଏହା ସ୍ବତନ୍ତ୍ର ଆଶ୍ରମ ବିଦ୍ୟାଳୟ ଭାବେ ନାମିତ କରି ଓଡ଼ିଶାର କୋରାପୁଟ ଜିଲା ପ୍ରଶାସନ ଏଠାରେ ୧୦୦ ଶଯ୍ୟା ବିଶିଷ୍ଟ ହଷ୍ଟେଲ ବ୍ୟବସ୍ଥା କରିଥିଲେ। ଆଶ୍ରମ ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ଯାଏ ରହିଥିବା ବେଳେ ହଷ୍ଟେଲରେ ରହୁଥିବା ଛାତ୍ରୀଛାତ୍ରଙ୍କ ପାଇଁ ଏବଂ ବିଦ୍ୟାଳୟରେ ବିଦ୍ୟୁତ୍ ସେବା ନ ଥିବାରୁ ବ୍ଲକ ପ୍ରଶାସନ ପକ୍ଷରୁ ସୋଲାର ବ୍ୟବସ୍ଥା କରାଯାଇ ଲାଇଟ ଓ ପାନୀୟଜଳ ବ୍ୟବସ୍ଥା କରାଯାଇଥିଲା। ଉକ୍ତ ବ୍ୟବସ୍ଥା ତ୍ରୁଟିପୂର୍ଣ୍ଣ ଥିବାରୁ ଠିକ୍ ଭାବେ ବିଦ୍ୟୁତ୍ ସେବା ମିଳୁ ନ ଥିଲା। ଏଥିରୁ ଫାଇଦା ଉଠାଇବାକୁ ଯୋଜନା କରିଥିଲା ଆନ୍ଧ୍ର। ଆଶ୍ରମ ବିଦ୍ୟାଳୟ ପରିଚାଳନା ସଭାପତି ମାଝି ରାମଚନ୍ଦ୍ରଙ୍କ ନାଁରେ ଆନ୍ଧ୍ର ବିଦ୍ୟୁତ ବିଭାଗରୁ ବିଦ୍ୟୁତ୍ ସେବା ଉକ୍ତ ବିଦ୍ୟାଳୟକୁ ଅଣାଯାଇଥିଲା। ପରିଚାଳନା କମିଟି ସଭାପତି ରାମଚନ୍ଦ୍ରଙ୍କ ନାମରେ ବିଦ୍ୟୁତ୍ ଆସିଥିବାରୁ ତାଙ୍କ ନାମରେ ବିଲ୍ ଆସୁଥିଲା। ବିଦ୍ୟୁତ୍ ବ୍ୟବହାର ନେଇ ବିଲ୍ ବାବଦ ପ୍ରାପ୍ୟ ନ ମିଳିବାରୁ ଆନ୍ଧ୍ର ବିଦ୍ୟୁତ୍ ବିଭାଗ ଗତ ୬ ମାସ ହେଲା ବିଦ୍ୟାଳୟରୁ ବିଦ୍ୟୁତ୍ କାଟି ଦେଇଛି। ଏଥିପାଇଁ ଛାତ୍ରୀଛାତ୍ରମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ୧୦ ହଜାର ଟଙ୍କା ପୈଠ ନ କଲେ ତୁମକୁ ଆନ୍ଧ୍ର ପକ୍ଷରୁ ମିଳୁଥିବା ସମସ୍ତ ସେବା ବନ୍ଦ କରାଯିବ ବୋଲି ଆନ୍ଧ୍ର ବିଦ୍ୟୁତ୍ ବିଭାଗ ଅଧିକାରୀ ରାମଚନ୍ଦ୍ରଙ୍କୁ କହିଛନ୍ତି।