ପଟ୍ଟାଙ୍ଗି,୨୩ା୮(ଶରତ ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନରେ ଥିବା କୋଟିଆ ପଞ୍ଚାୟତ ସୀମାନ୍ତ ଗ୍ରାମଗୁଡିକରେ ଉନ୍ନୟନମୂଳକ କାର୍ଯ୍ୟ ଯଥା ଏମ୍ଜିଏନ୍ଆରଇଜିଏସ୍ ନିମନ୍ତେ ରାଜ୍ୟର ୨୯ଟି ଗ୍ରାମରେ ଆନ୍ଧ୍ର ପ୍ରଦେଶ ଟିଡିପି ସରକାର ଶୁକ୍ରବାର ଗ୍ରାମସଭା କରିଥିଲା।
ଏହା ସହିତ ଓଡିଶାର ଧୂଳିପଦର, ନେରିଡିବାଲସା, ତଳ ଗଞ୍ଜେଇ ପଦର, ଫଗୁଣସିନେରି ଏବଂ ଫାଟୁସିନେରି ଆଦି ଗ୍ରାମରେ ମଧ୍ୟ ଗ୍ରାମସଭା ସହ ସ୍ବାସ୍ଥ୍ୟମେଳା କରି ସୀମାନ୍ତବାସୀଙ୍କ ସ୍ବାସ୍ଥ୍ୟ ପରୀକ୍ଷା ସହ ମାଗଣାରେ ଔଷଧ ବଣ୍ଟନ କରିଛି।
ଏହି ସମୟରେ ଆନ୍ଧ୍ରର ଉକ୍ତ ଗ୍ରାମସଭାରେ ଓଡ଼ିଶାର ଉପରୋକ୍ତ ୫ ଗ୍ରାମର ଲୋକେ ନିଜ ନିଜ ଅଞ୍ଚଳରେ ରାସ୍ତା ଘାଟଠାରୁ ଆରମ୍ଭ କରି ପ୍ରଧାନମନ୍ତ୍ରୀ ଆବାସ ଯୋଜନା, ପାନୀୟ ଜଳ, ଶିକ୍ଷା ଓ ବିଦ୍ୟୁତ୍ ସେବା ସମସ୍ୟା ସମ୍ପର୍କରେ ଦରଖାସ୍ତ ଦେଇ ଥିଲେ। ଏପରିକି ଟିଡିପି ସରକାର କିପରି ସମସ୍ୟା ସମାଧାନ କରିବ ସେଥିପ୍ରତି ଦୃଷ୍ଟି ଦେବାକୁ ସାଲୁର ବ୍ଲକ ପ୍ରଶାସନିକ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ।
ଅନ୍ୟପକ୍ଷରେ ଆନ୍ଧ୍ରର ସରକାରୀ କର୍ମଚାରୀ ଏହିପରି କାର୍ଯ୍ୟକ୍ରମ କରି ଲୋକଙ୍କଠାରୁ ଉନ୍ନୟନମୂଳକ କାର୍ଯ୍ୟ ନିମନ୍ତେ ଦରଖାସ୍ତ ଗ୍ରହଣ କରୁଥିବା ବେଳେ ଓଡ଼ିଶାର ପଟ୍ଟାଙ୍ଗି ତହସିଲ କାର୍ଯ୍ୟାଳୟ ପକ୍ଷରୁ ତଳ ଗଞ୍ଜେଇ ପଦରେ ଜଙ୍ଗଲ ଗ୍ରାମକୁ କିପରି ରେଭିନ୍ୟୁ ଗ୍ରାମ କରାଯାଇପାରିବ ସେନେଇ ସ୍ବତନ୍ତ୍ର ଗ୍ରାମସଭା କରାଯାଇଥିଲା।
ଆନ୍ଧ୍ର ଓଡ଼ିଶା ସୀମାନ୍ତରେ ପଶି ଏପରି କାର୍ଯ୍ୟକ୍ରମ କରିଥିଲେ ମଧ୍ୟ ତହସିଲ କର୍ମଚାରୀଙ୍କ ଦୃଷ୍ଟିକୁ ଆସି ପାରିନଥିଲା। ଏହି ସମ୍ପର୍କରେ ପଟ୍ଟାଙ୍ଗି ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆଙ୍କୁ ଆନ୍ଧ୍ରର ଗ୍ରାମସଭା କାର୍ଯ୍ୟକ୍ରମ ସମ୍ପର୍କରେ ପଚାରିବାରୁ ଆମେ ତଳ ଗଞ୍ଜେଇ ପଦର ଗ୍ରାମରେ ସ୍ବତନ୍ତ୍ର ଗ୍ରାମସଭା କରିବା ସମୟରେ ଆନ୍ଧ୍ରର କେହି ନ ଥିଲେ। କିନ୍ତୁ ଆମେ ଫେରି ଆସିବା ପରେ ସେମାନେ ତାଙ୍କ କାର୍ଯ୍ୟକ୍ରମ କରିଥାଇ ପାରନ୍ତି ବୋଲି ସେ କହିବା ସହ ଆନ୍ଧ୍ରର ଉକ୍ତ କାର୍ଯ୍ୟକ୍ରମ ସମ୍ପର୍କରେ ତଦନ୍ତ କରାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ସାଧାରଣ ନିର୍ବାଚନ ସରିବା ପରେ ଆନ୍ଧ୍ରର ଟିଡିପି ସରକାରଙ୍କ ଅଧିକାରୀ ବା କର୍ମଚାରୀ ଓଡ଼ିଶାର କୋଟିଆ ପଞ୍ଚାୟତରେ ଏହା ଦ୍ୱିତୀୟ ଥର ଅନୁପ୍ରବେଶ କରିଥିବା ଜଣାପଡ଼ିଛି।