ପଟ୍ଟାଙ୍ଗୀ,୨୨ା୫(ଡି.ଏନ.ଏ.): ପଡ଼ୋଶୀ ଆନ୍ଧ୍ରପ୍ରଦେଶକୁ ପୁଣି ଲାଗିଛି ଝଟକା। ଆନ୍ଧ୍ର ସରକାର ବିଗତ ଦିନରେ କରିଥିବା ପଞ୍ଚାୟତ ଓ ଜିଲା ପରିଷଦ ନିର୍ବାଚନକୁ ଆନ୍ଧ୍ରପ୍ରଦେଶ ହାଇକୋର୍ଟ ଅସିଦ୍ଧ ଘୋଷଣା କରିଛନ୍ତି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ପଞ୍ଚାୟତ ଓ ଜିଲା ପରିଷଦ ନିର୍ବାଚନ ପାଇଁ ରହିଥିବା ନିୟମକୁ ଆନ୍ଧ୍ର ସରକାର ଉଲ୍ଲଂଘନ କରି ଏହାକୁ ପାଳନ କରି ନ ଥିବା କହିଛନ୍ତି କୋର୍ଟ। ବିଜ୍ଞପ୍ତି ଜାରି ହେବାର ୪ ସପ୍ତାହ ପରେ ନିର୍ବାଚନ କରିବା ନିୟମ ଥିଲେ ମଧ୍ୟ ଏହାକୁ ଅବଜ୍ଞା କରି ଗୋଟିଏ ସପ୍ତାହ ପରେ ନିର୍ବାଚନ କରି ଆନ୍ଧ୍ର ସରକାର ନିର୍ବାଚନ ନୀତିନିୟମକୁ ଉଲ୍ଲଂଘନ କରିଥିବା ଆରୋପ ଲଗାଇଛନ୍ତି ହାଇକୋର୍ଟ । ଏପ୍ରିଲ ୩ରେ ଆନ୍ଧ୍ରର ଭାଜପା, ଟିଡିପି ଜନସେନା ପାର୍ଟି ମୁଖ୍ୟ ଏନେଇ ଆନ୍ଧ୍ର ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏପ୍ରିଲ ୬ରେ ହାଇକୋର୍ଟ ପକ୍ଷରୁ ଏକ ତିନିଜଣିଆ ଖଣ୍ଡପୀଠ ଏହାକୁ ବିଚାରକୁ ନେଇ ନିର୍ବାଚନ ଉପରେ ସ୍ଥଗିତାଦେଶ ଜାରି କରିଥିଲେ। ଏହାକୁ ଚ୍ୟାଲେଞ୍ଜ କରି ଆନ୍ଧ୍ର ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇ ନିର୍ବାଚନ କରିବାକୁ ଅନୁମତି ଆଣି ଜିଲା ପରିଷଦ ନିର୍ବାଚନ କରିଥିଲେ। ମାତ୍ର ଏହାକୁ ବିରୋଧକରି ପୁଣି ଥରେ ବିରୋଧୀ ଭାଜପା, ଟିଡିପି ଏବଂ ଜନସେନା ପାର୍ଟି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହାକୁ ଭିତ୍ତିକରି ଆନ୍ଧ୍ର ସରକାର ନିର୍ବାଚନ ପ୍ରକ୍ରିୟା ଏବଂ ନିୟମ ପାଳନ କରିଛନ୍ତି କି ନାହିଁ ତଦନ୍ତ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଜାରି ବିଜ୍ଞପ୍ତି ଅନୁଯାୟୀ ଆନ୍ଧ୍ର ନିର୍ବାଚନ ପ୍ରକ୍ରିୟା କରିଛି କି ନାହିଁ ସୁପ୍ରିମକୋର୍ଟ ଜାଣିବାକୁ ଚାହିଁଥିଲେ। ବିଜ୍ଞପ୍ତି ଜାରି ହେବାର ୪ ସପ୍ତାହ ପରେ ନିର୍ବାଚନ କରିବା ନିୟମ ଥିଲେ ମଧ୍ୟ ଆନ୍ଧ୍ର ସରକାର ତାହା ପାଳନ କରି ନ ଥିବା ଜଣାପଡିବା ପରେ ହୋଇଥିବା ପଞ୍ଚାୟତ ଏବଂ ଜିଲା ପରିଷଦ ନିର୍ବାଚନକୁ କୋର୍ଟ ଅସିଦ୍ଧ ଘୋଷଣା କରିଥିଲେ।