ତିରୁପତି,୨୫।୯:ଆନ୍ଧ୍ରପ୍ରଦେଶର ତିରୁପତି ନିକଟ ରେନିଗୁଣ୍ଟାଠାରେ ରବିବାର ଏକ ଘରୋଇ ହସ୍ପିଟାଲ୍ରେ ନିଆଁ ଲାଗି ଜଣେ ୪୫ ବର୍ଷୀୟ ଡାକ୍ତର ଓ ତାଙ୍କର ଦୁଇ ପିଲାଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ଡାକ୍ତର ରବିଶଙ୍କର ରେଡ୍ଡୀ, ତାଙ୍କ ଝିଅ କାର୍ଥତ୍କ(୮) ଏବଂ ପୁଅ ଭାରତ(୧୨)। ଅଗ୍ନିଶମ କର୍ମଚାରୀମାନେ ଡାକ୍ତରଙ୍କ ସ୍ତ୍ରୀ ଡ. ଅନନ୍ତ ଲକ୍ଷ୍ମୀ ଏବଂ ମା’ ରମା ସୁବାମ୍ମାଙ୍କୁ ଉଦ୍ଧାର କରିଥିଲେ। ସେମାନଙ୍କୁ ଅନ୍ୟ ଏକ ହସ୍ପିଟାଲରେ ଭର୍ତ୍ତି କରାଯାଇଛି। ଡାକ୍ତର ରେଡ୍ଡୀ ତାଙ୍କ ବାସଭବନକୁ ଘରୋଇ ହସ୍ପିଟାଲ ଭାବେ ବ୍ୟବହାର କରୁଥିଲେ। ତଳ ମହଲାରେ ହସ୍ପିଟାଲ ଚାଲିଥିବାବେଳେ ପ୍ରଥମ ଓ ଦ୍ୱିତୀୟ ମହଲାରେ ଡାକ୍ତରଙ୍କ ପରିବାର ରହୁଥିଲେ।