ପଟ୍ଟାଙ୍ଗୀ/କୋରାପୁଟ, ୧୧।୩(ଡି.ଏନ୍.ଏ./ସ୍ବ.ପ୍ର.):ରାଜ୍ୟ ପିସିସି ସଭାପତି ନିରଞ୍ଜନ ପଟ୍ଟନାୟକ ବୁଧବାର କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅଧୀନ ଆନ୍ଧ୍ର ରାଜ୍ୟ ସୀମାନ୍ତ କୋଟିଆ ପଞ୍ଚାୟତ ଗସ୍ତ କରିଛନ୍ତି। ସେ ଅଞ୍ଚଳବାସୀଙ୍କ ସହ ସୁବିଧା ଅସୁବିଧା ସମ୍ପର୍କରେ ଆଲୋଚନା କରିଛନ୍ତି। ଏହାପରେ କୋଟିଆ ପଞ୍ଚାୟତ କାର୍ଯ୍ୟାଳରେ ଅନୁଷ୍ଠିତ ବୈଠକରେ ସେ ଯୋଗଦେଇଥିଲେ। ଅଞ୍ଚଳବାସୀଙ୍କ ଜୀବନ ଜୀବିକା ପାଇଁ ରାଜ୍ୟ ସରକାର ଯେପର୍ଯ୍ୟନ୍ତ ସହଯୋଗ କରିନାହାନ୍ତି ସେ ପର୍ଯ୍ୟନ୍ତ କଂଗ୍ରେସ ପଞ୍ଚାୟତବାସୀଙ୍କ ପାଇଁ ଲଢ଼ିବ। ସରକାରଙ୍କ ଉଦାସୀନତା ଯୋଗୁ ସୀମାନ୍ତବାସୀ ଆନ୍ଧ୍ର ମୁହାଁ ହେଉଛନ୍ତି ବୋଲି ନିରଞ୍ଜନ କହିଛନ୍ତି।
ସୂଚନା ଅନୁଯାୟୀ, ବୁଧବାର ମଧ୍ୟାହ୍ନରେ ନିରଞ୍ଜନ କୁନ୍ଦୁଲି ସାପ୍ତାହିକ ହାଟରେ ପହଞ୍ଚତ୍ ସେଠାରେ ଉପସ୍ଥିତ ବିଧାୟକ ଓ ଦଳୀୟ କର୍ମୀଙ୍କ ସହ ଆଲୋଚନା କରିଥିଲେ। ଏହାପରେ ସେମାନେ କୋଟିଆ ପଞ୍ଚାୟତର ଫାଟୁସିନେରି ଗ୍ରାମ ଅଭିମୁଖେ ବାହାରିଥିଲେ। ଗ୍ରାମରେ ଆନ୍ଧ୍ର ସରକାର ପକ୍ଷରୁ ମିଳିଥିବା ଆବାସ ଗୃହ ସବୁ ଦେଖିଥିଲେ। ସେହିଭଳି ଉକ୍ତ ଗ୍ରାମରେ ଆମଦାନୀ ହେଉଥିବା ତେନ୍ତୁଳି, ଝାଡୁ, ହଳଦୀ ଫସଲ କିଭଳି ବିକ୍ରି ହେଉଛି ସେ ସମ୍ପର୍କରେ ପଚାରି ବୁଝିଥିଲେ। ରାଜ୍ୟ ସରକାରଙ୍କ ପକ୍ଷରୁ କୌଣସି ବଜାର ବ୍ୟବସ୍ଥା ନାହିଁ। କୁନ୍ଦୁଲି ସାପ୍ତାହିକ ହାଟ ଏଠାରୁ ଅନେକ ଦୂର। ତେଣୁ ପଡ଼ୋଶୀ ଆନ୍ଧ୍ରର ବ୍ୟବସାୟୀଙ୍କୁ ଫସଲ ବିକ୍ରିକରି ଉଚିତ ମୂଲ୍ୟ ପାଉଛନ୍ତି ବୋଲି ଗ୍ରାମବାସୀ କହିଛନ୍ତି। ଓଡ଼ିଶାରେ ରହିଲେ ମଧ୍ୟ ଆନ୍ଧ୍ର ସରକାର ସେମାନଙ୍କ ଭଲମନ୍ଦ ବୁଝୁଛନ୍ତି। ତେଣୁ ପୂର୍ବ ପୁରୁଷ ଅମଳରୁ ଆନ୍ଧ୍ରରେ ଭୋଟ ଦେଇ ଆସୁଛନ୍ତି ବୋଲି ଗ୍ରାମବାସୀ ପିସିସି ସଭାପତିଙ୍କୁ କହିଛନ୍ତି। ରାଜ୍ୟ ସରକାର ଦୁଇଟି ପର୍ଯ୍ୟାୟରେ କୋଟିଆ ପାଇଁ ୧୮୦ କୋଟି ପ୍ରଦାନ କରିଛନ୍ତି। କିନ୍ତୁ ସୀମାନ୍ତ ଗ୍ରାମବାସୀଙ୍କ ଜୀବନ ଜୀବିକାକୁ ଗୁରୁତ୍ୱ ଦେଉନାହାନ୍ତି। ଲୋକଙ୍କ ସମସ୍ୟା ନେଇ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିବେ ବୋଲି ନିରଞ୍ଜନ କହିଛନ୍ତି। ସେହିଭଳି କଂଗ୍ରେସ୍ ଏମ୍ପି ସପ୍ତଗିରି ଉଲ୍ଲାକା କୋଟିଆକୁ ପୋଷ୍ୟ ପଞ୍ଚାୟତଭାବେ ଗ୍ରହଣ କରିଛନ୍ତି। ଏହାର ବିକାଶ ଉପରେ ଗୁରୁତ୍ୱ ଦେବେ ବୋଲି କହିଥିବା ବେଳେ ଫଗୁଣସିନେରି ଗ୍ରାମବାସୀଙ୍କ ସହ ମଧ୍ୟ ଆଲୋଚନା କରିଛନ୍ତି। ଏହି ଗସ୍ତ ସମୟରେ ପିସିସି ରାଜ୍ୟ କାର୍ଯ୍ୟକାରୀ ସଭାପତି ପ୍ରଦୀପ ମାଝି, କୋରାପୁଟ ଏମ୍ପି ସପ୍ତଗିରି ଉଲ୍ଲାକା, ଜୟପୁର ବିଧାୟକ ତାରାପ୍ରସାଦ ବାହିନୀପତି, ସାନଖେମୁଣ୍ଡି ବିଧାୟକ ରମେଶ ଜେନା ପ୍ରମୁଖ ଉପସ୍ଥିତ ଥିଲେ।