ପାରଳାଖେମୁଣ୍ଡି,୨୫ା୬(ଡି.ଏନ୍.ଏ.): ଗଜପତି ଜିଲାରେ ପୁଣି ଆନ୍ଧ୍ର ଅନୁପ୍ରବେଶ କରି ନିଜର ଦାଦାଗିରି ଦେଖାଇଛି। ଚଳିତଥର କୃଷ୍ଣ ସାଗର ଡାହାଣ କେନାଲରେ ଜଳ ଲୁଟି ନେବାକୁ ମସୁଧା କରିଛି। ଗୋଷାଣୀ ବ୍ଲକର ଜଙ୍ଗଲପାଡୁ ନିକଟରେ ଥିବା କ୍ଷୁଦ୍ର ଜଳସେଚନ ପ୍ରକଳ୍ପକୁ ଆନ୍ଧ୍ର ପ୍ରଶାସନର ନିର୍ଦ୍ଦେଶରେ ଆନ୍ଧ୍ରର ଠିକାଦାର ଓ ସରପଞ୍ଚ ଉପସ୍ଥିତ ରହି ଇଚ୍ଛା ମୁତାବକ ମରାମତି କରୁଛନ୍ତି। ଏଥିରେ ନୀରବଦ୍ରଷ୍ଟା ସାଜିଛି ଗଜପତି ଜିଲା ପ୍ରଶାସନ।
ଚାଷୀଙ୍କ ସୁବିଧା ପାଇଁ ମହାରାଜା କୃଷ୍ଣଚନ୍ଦ୍ର ଗଜପତିଙ୍କ ସମୟରେ ଅନେକ ଜଳସେଚନ ପ୍ରକଳ୍ପ ନିର୍ମିତ ହୋଇଥିଲା। ସେଗୁଡିକର ରକ୍ଷଣାବେକ୍ଷଣ ଦାୟିତ୍ୱ କ୍ଷୁଦ୍ର ଜଳସେଚନ ବିଭାଗ ନେଇଥିଲେ ସୁଦ୍ଧା ଦୀର୍ଘ ଦିନ ହେଲା ମରାମତି ଅଭାବରୁ ଅଧିକାଂଶ ଭାଙ୍ଗିରୁଜି ଗଲାଣି। ଦୀର୍ଘ ୨୦ ବର୍ଷ ଧରି କୃଷ୍ଣ ସାଗରର ଡାହାଣ କେନାଲର ଜଙ୍ଗଲପାଡୁ ଚେକଡ୍ୟାମ ମରାମତି ଅଭାବରୁ ଭାଙ୍ଗିଯାଇଛି। ଏ ନେଇ ସ୍ଥାନୀୟ ଚାଷୀ ବିଭିନ୍ନ ସମୟରେ ପ୍ରଶାସନର ଦ୍ବାରସ୍ଥ ହୋଇଥିଲେ। କିନ୍ତୁ ଆଜି ଯାଏ ଏହି କେନାଲର କୌଣସି ମରାମତି ହୋଇପାରି ନାହିଁ। ଏହି କେନାଲ ଓଡ଼ିଶାର ପ୍ରାୟ ୫୦୦ ଏକର ଜମିକୁ ପାଣି ଯୋଗାଇବା ପରେ ଅବଶିଷ୍ଟ ଜଳ ଆନ୍ଧ୍ର ଜମିକୁ ଯାଇଥାଏ। ଚଳିତ ଖରିଫ ଚାଷ ପୂର୍ବରୁ ଆନ୍ଧ୍ରର ସରପଞ୍ଚ ଓ ଠିକାଦାର ଓଡ଼ିଶା ସୀମାରେ ପଶି ଉକ୍ତ ଚେକଡ୍ୟାମର ମରାମତି କାର୍ଯ୍ୟ ଚାଲୁ ରଖିଛନ୍ତି; ଯାହାକୁ ନେଇ ସ୍ଥାନୀୟ ଚାଷୀ ପ୍ରତିବାଦ କରିବାରୁ ବିବାଦୀୟ ପରିସ୍ଥିତି ଉପୁଜିଛି। ଏହି ଘଟଣାକୁ ନେଇ ଆନ୍ଧ୍ର ସରପଞ୍ଚ ଓ ଠିକାଦାର କହିଛନ୍ତି, କେନାଲ ତଳମୁଣ୍ଡରେ ଶହଶହ ଏକର ଆନ୍ଧ୍ର ଚାଷ ଜମି ରହିଛି। ପାଣି ପାଇବା ପାଇଁ ବିକଳ୍ପ ବ୍ୟବସ୍ଥା ନାହିଁ ତେଣୁ ସରକାରଙ୍କ ନିର୍ଦ୍ଦେଶରେ ଚେକଡ୍ୟାମର ମରାମତି କରାଯାଉଛି। ଅପରପକ୍ଷରେ ଘଟଣାସ୍ଥଳରେ ପହଞ୍ଚିଥିବା କନିଷ୍ଠ ଯନ୍ତ୍ରୀଙ୍କୁ ଦୀର୍ଘ ୫ ଘଣ୍ଟାରୁ ଊଦ୍ଧର୍ବ ସମୟ ଉତ୍ତ୍ୟକ୍ତ ଚାଷୀ ଅଟକ ରଖିଥିଲେ। ସମ୍ପୃକ୍ତ ବିଭାଗୀୟ ଏସ୍ଡିଓ ଆଶିଷ କୁମାର ମଲ୍ଲିକ ପହଞ୍ଚି ତୁରନ୍ତ ମରାମତି କରିବା ନେଇ ପ୍ରତିଶ୍ରୁତି ଦେବା ପରେ ଚାଷୀମାନେ ଯନ୍ତ୍ରୀଙ୍କୁ ଛାଡ଼ିଥିଲେ।
ସୂଚନାଯୋଗ୍ୟ, ଓଡ଼ିଶା ଭିତରେ ପ୍ରବେଶ କରି ଆନ୍ଧ୍ରର ଲୋକପ୍ରତିନିଧି ଓ ଠିକାଦାର ଉକ୍ତ ଚେକଡ୍ୟାମ ଓ କେନାଲ ମରାମତି କରୁଥିବା ବେଳେ ଦୀର୍ଘ ୨୦ ବର୍ଷ ଧରି ଉକ୍ତ ଚେକଡ୍ୟାମ ମରାମତି ପାଇଁ ଦାବି ହେଉଥିଲେ ସୁଦ୍ଧା ପ୍ରଶାସନ ପକ୍ଷରୁ ହୋଇପାରି ନ ଥିଲା।