ପଟ୍ଟାଙ୍ଗୀ,୮।୨(ଡି.ଏନ୍.ଏ.): କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ କୋଟିଆ ପଞ୍ଚାୟତ ନିର୍ବାଚନରେ ଅବତୀର୍ଣ୍ଣ ହୋଇଥିବା ପ୍ରାର୍ଥୀଙ୍କ ତାଲିକା ସଂଗ୍ରହ ଲାଗି ଉଦ୍ୟମ ଆରମ୍ଭ କରିଛି ଆନ୍ଧ୍ର। ଏଥିପାଇଁ ଆନ୍ଧ୍ର ପୋଲିସ ସୋମବାର ପଟ୍ଟାଙ୍ଗୀ ବ୍ଲକ କାର୍ଯ୍ୟାଳୟରେ ବିଡିଓ ସୌମ୍ୟସାର୍ଥକ ମିଶ୍ରଙ୍କୁ ଭେଟିଛି। ହେଲେ ଏଥିରେ ସେମାନଙ୍କୁ ସଫଳତା ମିଳିନାହିଁ।
ଖବରରୁ ଜଣାପଡିଛି ସାଲୁର ପୋଲିସ ଅଧୀନରେ କୋଟିଆ ପଞ୍ଚାୟତ ରହିଥିବା ଦର୍ଶାଇ ଆନ୍ଧ୍ରର ବିଜୟନଗରମ ପୋଲିସ ପ୍ରଶାସନ ଏସ୍ଆଇ ରୋହିନି ପାଥିଙ୍କ ନେତୃତ୍ୱରେ କେତେକ ପୋଲିସ କର୍ମଚାରୀଙ୍କୁ ଧରି ଦୁଇଟି ବୋଲେରୋରେ ପଟ୍ଟାଙ୍ଗୀ ବ୍ଲକ କାର୍ଯ୍ୟାଳୟରେ ପହଞ୍ଚତ୍ଥିଲେ। ସେମାନେ ବିଡିଓ ମିଶ୍ରଙ୍କ ସହ ଆଲୋଚନା କରି ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ କୋଟିଆ ପଞ୍ଚାୟତରେ ସରପଞ୍ଚ ଭାବେ ନିର୍ବାଚନ ଲଢୁଥିବା ପ୍ରାର୍ଥୀଙ୍କ ତାଲିକା ନେବାକୁ ଚାହିଁଥିଲେ। ତେବେ ବିଡିଓ ମିଶ୍ର ସେମାନଙ୍କୁ ନିରାଶ କରିଥିଲେ। ନିର୍ବାଚନ ପାଇଁ ଦାଖଲ ସମସ୍ତ ନାମାଙ୍କନପତ୍ର ଆମ ନିକଟରେ ନାହିଁ। ନାମାଙ୍କନପତ୍ର ଦାଖଲ ପ୍ରକ୍ରିୟା ବ୍ଲକ କାର୍ଯ୍ୟାଳୟରେ ସରିବା ପରେ ସମସ୍ତ ରେକର୍ଡ ଜିଲା ପ୍ରଶାସନକୁ ହସ୍ତାନ୍ତର ହୋଇଥିବା ବିଡିଓ କହିଥିଲେ। ବ୍ଲକ କାର୍ଯ୍ୟାଳୟରୁ ନିରାଶ ହୋଇ ଆନ୍ଧ୍ର ପୋଲିସ ତହସିଲ କାର୍ଯ୍ୟାଳୟକୁ ଯାଇ ତାଲିକା ସଂଗ୍ରହ କରିବାକୁ ଚେଷ୍ଟା କରିଥିଲେ ମଧ୍ୟ ସେଠାରୁ ପାଇ ନ ଥିଲେ। ଶେଷରେ ସେମାନେ ଆନ୍ଧ୍ର ଫେରିଯାଇଥିଲେ। ଅନ୍ୟପକ୍ଷରେ ଆନ୍ଧ୍ର ପୋଲିସ ଓଡ଼ିଶାରେ ପହଞ୍ଚତ୍ କୋଟିଆରେ ନିର୍ବାଚନ ଲଢୁଥିବା ପ୍ରାର୍ଥୀଙ୍କ ତାଲିକା ତଲାସି କରିବା ଆନ୍ଧ୍ରର ଆଭିମୁଖ୍ୟ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।