ପଟ୍ଟାଙ୍ଗୀ,୨୯ା୯(ଡି.ଏନ.ଏ.):କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅନ୍ତର୍ଗତ ତଥା ଆନ୍ଦ୍ର ସୀମାନ୍ତ କୋଟିଆ ପଞ୍ଚାୟତକୁ ନେଇ ଓଡ଼ିଶା-ଆନ୍ଧ୍ର ମଧ୍ୟରେ ଦୀର୍ଘଦିନ ଧରି ବିବାଦ ଲାଗି ରହିଛି। ତେବେ ଏହି ବିବାଦକୁ ବେଶି ବଢ଼ାଉଛି ଆନ୍ଧ୍ର। ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶକୁ ପାଳନ ନ କରି ଆନ୍ଧ୍ର କୋଟିଆରେ ଅନୁପ୍ରବେଶ କରି ନିଜ କାର୍ଯ୍ୟକ୍ରମ ଜାରି ରଖିଛି। କୋଟିଆରେ ପୂର୍ବରୁ ଓଡ଼ିଶା ପକ୍ଷରୁ କୋରାପୁଟ ଜିଲା ପ୍ରଶାସନ ନାମଫଳକ ଲଗାଇଥିଲା। ସୋମବାର ଆନ୍ଧ୍ର କୋଟିଆର ପ୍ରତି ଗ୍ରାମରେ ନିଜର ନାମଫଳକ ଲଗାଇଥିଲା। ତେବେ ଏହି ସମୟରେ ଆନ୍ଧ୍ର ଓଡ଼ିଶା ପକ୍ଷରୁ ନେରେଡିବାଲାସା ଗ୍ରାମରେ ମରାଯାଇଥିବା ନାମଫଳକୁ ଆନ୍ଧ୍ରର ଅଧିକାରୀମାନେ ଲିଭାଇ ଦେଇଥିବା ଦେଖିବାକୁ ମିଳିଛି। ଆନ୍ଧ୍ରର ଏପରି କାର୍ଯ୍ୟକୁ ସାଧାରଣରେ ତୀବ୍ର ନିନ୍ଦା କରାଯାଇଛି। ଉତ୍କଳ ସମ୍ମିଳନୀର ପଟ୍ଟାଙ୍ଗୀ ବ୍ଲକ ସଭାପତି ଶରତ ଧଳଙ୍କ ସମେତ ଅନ୍ୟମାନେ ଏହାକୁ ନିନ୍ଦା କରି ଓଡିଶା ସରକାରଙ୍କ ପକ୍ଷରୁ କୋଟିଆରେ ହୋଇଥିବା ଉନ୍ନୟନମୂଳକ କାର୍ଯ୍ୟକୁ ଆନ୍ଧ୍ର ସହ୍ୟ କରି ପାରୁ ନ ଥିବା ପ୍ରକାଶ କରିଛନ୍ତି। କୋରାପୁଟ ଜିଲା ପ୍ରଶାସନ ପକ୍ଷରୁ ଏ ଦିଗରେ କଡା ପଦକ୍ଷେପ ନେବାକୁ ଦାବି ହେଉଛି। ସୂଚନାଯୋଗ୍ୟ, ଓଡ଼ିଶା-ଆନ୍ଧ୍ର ସୀମା ବିବାଦ ନେଇ ଓଡ଼ିଶା ସରକାର ସୁପ୍ରିମକୋର୍ଟର ଆଶ୍ରୟ ନେଇଥିଲେ। ନିକଟରେ ଏହି ମାମଲାର ଶୁଣାଣି କରି ସୁପ୍ରିମକୋର୍ଟ ଉଭୟ ରାଜ୍ୟର ରାଜନୈତିକ ସ୍ତରରେ ସମସ୍ୟା ଆଲୋଚନା କରି ସମାଧାନର ବାଟ ୬ ସପ୍ତାହ ମଧ୍ୟରେ ବାହାର କରିବାକୁ ନିକଟରେ ନିର୍ଦ୍ଦେଶ ଦେଇଛନ୍ତି। ଏହା ସତ୍ୱେ ଆନ୍ଧ୍ର ଏହାକୁ ଅଣଦେଖା କରି ଓଡ଼ିଶାର କୋଟିଆ ପଞ୍ଚାୟତରେ ଅନୁପ୍ରବେଶ କରି ବିଭିନ୍ନ କାର୍ଯ୍ୟ କରୁଛି।
