ପାତ୍ରପୁର,୧୨ା୨: ଆନ୍ଧ୍ରପ୍ରଦେଶରେ ଆସନ୍ତା ୧୩ ତାରିଖରେ ପଞ୍ଚାୟତ ନିର୍ବାଚନ ହେବାକୁ ଥିବା ବେଳେ ଗୁରୁବାର ଥିଲା ପ୍ରଚାରର ଶେଷ ଦିନ। ଗଞ୍ଜାମ ଜିଲା ପାତ୍ରପୁର ବ୍ଲକର ଉପାନ୍ତ ଅଞ୍ଚଳର ବହୁ ଗ୍ରାମ ଆନ୍ଧ୍ର ସୀମାକୁ ଲାଗି ରହିଛି। କେତେକ ଗ୍ରାମରେ ଆନ୍ଧ୍ର ପ୍ରଶାସନ ଧସେଇ ପଶି ବିଭିନ୍ନ ଜନହିତକର କାର୍ଯ୍ୟ କରିବା ସହ ଲୋକଙ୍କୁ ନିର୍ବାଚନରେ ସାମିଲ କରିଛି।
ତୁମ୍ବା ପଞ୍ଚାୟତ କୁଲାଡ଼ି ଓ ସାତପୁରି, ବୁରାତାଲ ପଞ୍ଚାୟତର ଗୁଡ଼ିଖଳା ଗ୍ରାମବାସୀ ଆନ୍ଧ୍ରରୁ ସମସ୍ତ ସୁବିଧା ପାଇ ବର୍ତ୍ତମାନ ସେଠିକାର ନିର୍ବାଚନରେ ସାମିଲ ହୋଇଛନ୍ତି। କୁଲାଡ଼ି ଗ୍ରାମର ସାବିତ୍ରୀ ଶବର ୱାର୍ଡ଼ସଭ୍ୟା ଭାବେ ନିର୍ବାଚନ ଲଢୁଥିବା ବେଳେ ଖବର ପାଇ ଗୁରୁବାର ପାତ୍ରପୁର ବିଡିଓ ପ୍ରକାଶ ଚନ୍ଦ୍ର ଦାସ ଓ ତହସିଲଦାର ଅମିତ କୁମାର ନାୟକଙ୍କ ସହ ଜରଡ଼ା ପୋଲିସ ଗ୍ରାମରେ ପହଞ୍ଚତ୍ ଥିଲେ। ଆନ୍ଧ୍ର ନିର୍ବାଚନରେ ସାମିଲ ନ ହେବାକୁ ଗ୍ରାମ ଲୋକଙ୍କୁ ଡାକି ବୁଝାଇଥିଲେ। ୱାର୍ଡ଼ସଭ୍ୟା ପ୍ରାର୍ଥୀ ସାବିତ୍ରୀଙ୍କୁ ଉଭୟ ଅଧିକାରୀ ପଚାରିବାରୁ ମୁଁ ନାମାଙ୍କନପତ୍ର ଦାଖଲ କରିବାକୁ ଯାଇନାହିଁ, କେତେଜଣ ଆସି କାଗଜରେ ଟିପଚିହ୍ନ ନେଇଥିବା ସେ କହିଥିଲେ। ଏହି ସମୟରେ ଆନ୍ଧ୍ରର ନିର୍ବାଚନ ପ୍ରଚାର ଗାଡି ସହ ଏକ ବିରାଟ ବାଇକ୍ ରାଲି ଗଁାରେ ପ୍ରବେଶ କରି ଅଧିକାରୀଙ୍କ ଉପସ୍ଥିତିରେ ପ୍ରଚାର କରିଥିଲା। ଏହାପରେ ଗ୍ରାମବାସୀ ଆନ୍ଧ୍ର ନିର୍ବାଚନରେ ଭାଗ ନେବେ ନାହିଁ ବୋଲି ଲିଖିତ ଭାବେ ଅଧିକାରୀଙ୍କୁ ଜଣାଇଥିଲେ।
ପ୍ରକାଶ ଥାଉକି, ସୀମାନ୍ତରେ ଥିବା ଓଡ଼ିଶାର ସମ୍ପୃକ୍ତ ଗ୍ରାମବାସୀ ଆନ୍ଧ୍ରର ବିଭିନ୍ନ ଯୋଜନା ଯଥା ଆବାସ, ଶିକ୍ଷା, ସ୍ବାସ୍ଥ୍ୟସେବା, ବ୍ୟାଙ୍କ, ଭତ୍ତା, ବିଦ୍ୟୁତ୍, ରାଶନ ସାମଗ୍ରୀ ପାଉଛନ୍ତି। ଓଡ଼ିଶାର ବ୍ଲକ ଓ ପଞ୍ଚାୟତ ମୁଖ୍ୟାଳୟ ସମ୍ପୃକ୍ତ ଗ୍ରାମଠାରୁ ବହୁ ଦୂର ହେଉଥିବାରୁ ଯାତାୟାତରେ ସମସ୍ୟା ହେଉଛି। ଏହାର ସୁଯୋଗ ନେଇ ଆନ୍ଧ୍ର ପ୍ରଶାସନ ସମ୍ପୃକ୍ତ ଗ୍ରାମରେ ପହଞ୍ଚତ୍ ରାଶନ, ଭତ୍ତା ସହ ଅନ୍ୟାନ୍ୟ ସୁବିଧା ଯୋଗାଉଛି। ଫଳରେ ସେମାନେ ଆନ୍ଧ୍ର ପଟକୁ ଢଳୁଥିବା ଜଣାପଡିଛି। ପ୍ରତିବର୍ଷ ପ୍ରଶାସନ ବାରଣ ସତ୍ତ୍ୱେ ଏମାନେ ଲୁଚିଛପି ଆନ୍ଧ୍ରରେ ଯାଇ ଭୋଟ ଦେଉଛନ୍ତି।
