ପଟ୍ଟାଙ୍ଗି,୧୦ା୧୦(ଶରତ ଧଳ):ପଡ଼ୋଶୀ ରାଜ୍ୟ ଆନ୍ଧ୍ରର ସରକାରୀ କର୍ମଚାରୀ ଓଡ଼ିଶାର ସୀମାନ୍ତ ଗ୍ରାମରେ ଅନୁପ୍ରବେଶ କରି ନିଜ ରାଜ୍ୟର ଚାଷୀଙ୍କ ପାଇଁ ଜଳ ସଂରକ୍ଷଣ ବନ୍ଧ ନିର୍ମାଣ ଯୋଜନାକୁ ଓଡ଼ିଶା ପଣ୍ଡ କରିଦେଇଛି। ଏ ସମ୍ପର୍କରେ ଖବର ପ୍ରକାଶ ପାଇବା ପରେ କୋରାପୁଟ ଜିଲା ପଟ୍ଟାଙ୍ଗି ବ୍ଲକ୍ ପ୍ରଶାସନ ସୋମବାର ଘଟଣା ସ୍ଥଳରେ ପହଞ୍ଚତ୍ ଆନ୍ଧ୍ରର ସର୍ଭେରେ ବ୍ୟବହୃତ ବିଭିନ୍ନ ସାମଗ୍ରୀ ଜବତ କରିଛି। ଏଥିରେ ନିୟୋଜିତ କର୍ମଚାରୀଙ୍କୁ ଦୀର୍ଘ ସମୟ ଧରି ଅଟକ ରଖି ପରେ ସେମାନଙ୍କଠାରୁ ଲିଖିତ ରୂପେ ଲେଖି ରଖିବା ପରେ ଅଧିକାରୀମାନେ ସେମାନଙ୍କୁ ଛାଡ଼ିଛନ୍ତି।
ଖବରରୁ ଜଣାପଡିଛି, ବ୍ଲକ୍ର ସୁଙ୍କି, ରାଲେଗଡା ଓ ମାଡାୱାଲସା ପଞ୍ଚାୟତର ୧୪ଟି ଗ୍ରାମର ଗ୍ରାମବାସୀ ଗ୍ରାମ ନିକଟରେ ପ୍ରବାହିତ ପାହାଡି ନଦୀ ଉପରେ ନିର୍ଭର କରି ଚଳନ୍ତି। ଏହି ନଦୀ ଜଳରେ ସେମାନେ ଚାଷକରି ଜୀବିକା ନିର୍ବାହ କରନ୍ତି। ତେବେ ଆନ୍ଧ୍ର ନିଜ ରାଜ୍ୟ ଏବଂ ସୀମାନ୍ତ ଗ୍ରାମର ଚାଷୀଙ୍କ ପାଇଁ ମୁଙ୍ଗାରଗୁମି ଗ୍ରାମରେ ଏକ ଜଳସେଚନ ପ୍ରକଳ୍ପ ନେଇ ବନ୍ଧ ନିର୍ମାଣ କରିବାକୁ ଯୋଜନା କରି ଗତ ୨୬ରେ ଜମି ଚିହ୍ନଟ ସହ ସର୍ଭେ କାର୍ଯ୍ୟ ଆରମ୍ଭ କରିଥିଲା। ଏ ସମ୍ପର୍କରେ କେବଳ ଧରିତ୍ରୀରେ ଖବର ପ୍ରକାଶ ପରେ ସୋମବାର ବ୍ଲକ୍ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ତହସିଲଦାର ଦେବେନ୍ଦ୍ର ବାହାଦୁର ସିଂ ଧାରୁଆ ଓ ରାଜସ୍ବ ସୁପରଭାଇଜର ଗୋଲକ ପରିଡ଼ା ସୁଙ୍କି ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟରେ ପହଞ୍ଚତ୍ ଉପସ୍ଥିତ କର୍ମଚାରୀଙ୍କ ଉପରେ ଅସନ୍ତୋଷ ପ୍ରକାଶ କରିଥିଲେ। ତୁମ ରାଜସ୍ବ ଅଞ୍ଚଳରେ ଆନ୍ଧ୍ର ଘଟାଉଥିବା ଘଟଣା ଉପରେ କାହିଁକି ସୂଚନା ରଖୁନାହଁ ବୋଲି ପଚାରିଥିଲେ। ପରେ ଏଠାରୁ ସୁଙ୍କି ପୋଲିସକୁ ନେଇ ତହସିଲଦାର ଧାରୁଆ ଓ ସୁପରଭାଇଜର ପରିଡା ଆନ୍ଧ୍ର ବନ୍ଧ ନିର୍ମାଣ ନେଇ ଯୋଜନା ପ୍ରସ୍ତୁତ କରୁଥିବା ମୁଙ୍ଗାରଗୁମି ଗ୍ରାମରେ ପହଞ୍ଚତ୍ ଆନ୍ଧ୍ରର ଚାଲିଥିବା ସର୍ଭେ କାର୍ଯ୍ୟ ବନ୍ଦ କରିଥିଲେ। ସର୍ଭେ କାର୍ଯ୍ୟରେ ବ୍ୟବହୃତ ସମସ୍ତ ସାମଗ୍ରୀ ଜବତ କରି ଏଥିରେ ନିୟୋଜିତ ତିନି କର୍ମଚାରୀ ମଧୁ ପାଟେଲ୍, ପୋରିକା ରାକେଶ ଏବଂ ରବି ଲାଲ୍ ବିଶ୍ୱକର୍ମାଙ୍କୁ ସୁଙ୍କି ଥାନାକୁ ଆଣି ଦୀର୍ଘ ସମୟ ଧରି ଅଟକ ରଖିଲେ। ପରେ ଅଟକ କର୍ମଚାରୀମାନେ ଲିଖିତ ପ୍ରତିଶ୍ରୁତି ଦେବାରୁ ସେମାନଙ୍କୁ ଛାଡ଼ିଥିଲେ।