ଚେନ୍ନାଇ,୧୮।୪: ଚଳିତ ଆଇପିଏଲରେ ହ୍ୟାଟ୍ରିକ ବିଜୟ ହାସଲ କରିଛି ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)। ଏମ୍. ଚିଦାମ୍ବରମ ଷ୍ଟାଡିୟମରେ ରବିବାର ଅପରାହ୍ନରେ ଖେଳାଯାଇଥିବା ମ୍ୟାଚ୍ରେ ଆରସିବି ୩୮ ରନ୍ରେ କୋଲକାତା ନାଇଟ୍ ରାଇଡର୍ସ (କେକେଆର)କୁ ହରାଇ ଦେଇଛି। ଏହି ବିଜୟ ସହ ଆରସିବି ପୁଣି ଥରେ ପଏଣ୍ଟ ଟେବୁଲର ଶୀର୍ଷକୁ ଉଠିଛି।
୨୦୫ ରନ୍ର ବିଶାଳ ବିଜୟ ଲକ୍ଷ୍ୟ ନେଇ ଓହ୍ଲାଇଥିଲା କୋଲକାତା ଆରମ୍ଭରୁ ଆଟାକିଂ ବ୍ୟାଟିଂ କରିଥିଲା। ଦଳର ଉପର କ୍ରମର ବ୍ୟାଟ୍ସମ୍ୟାନ ନୀତିଶ ରାଣା (୧୮ ରନ୍, ୨ ଚୌକା ଓ ଗୋଟିଏ ଛକା), ଶୁବମାନ ଗିଲ (୨୧ ରନ୍, ୨ ଲେଖାଏ ଚୌକା ଓ ଛକା), ରାହୁଲ ତ୍ରିପାଠି (୨୫ ରନ୍, ୫ ଚୌକା) ଓ ଅଧିନାୟକ ଇଆନ ମୋର୍ଗାନ ( ୨୯ ରନ୍, ଗୋଟିଏ ଚୌକା ଓ ୨ ଛକା)ଙ୍କୁ ମିଳିଥିଲା ଭଲ ଆରମ୍ଭ। ହେଲେ କେହି ବଡ଼ ସ୍କୋର ହାସଲ କରିପାରି ନ ଥିଲେ। ଆଉ ଶେଷକୁ ଦେଖିବାକୁ ମିଳିଥିଲା ଆନ୍ଧ୍ରେ ରସେଲ (୩୧ ରନ୍, ୩ ଚୌକା ଓ ୨ ଛକା)ଙ୍କ ବିସ୍ଫୋରକ ବ୍ୟାଟିଂ। ଏହା ସତ୍ତ୍ୱେ କୋଲକାତା ଶେଷ ପର୍ଯ୍ୟନ୍ତ ଖେଳି ୮ ଉଇକେଟ କ୍ଷତିରେ ୧୬୬ ରନ୍ କରିବାକୁ ସକ୍ଷମ ହୋଇଥିଲା।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଆରସିବି ପୂରା ୨୦ ଓଭରରେ ୪ ଉଇକେଟ ହରାଇ ୨୦୪ ରନ୍ କରିଛି। ଗ୍ଲେନ ମ୍ୟାକ୍ସଓ୍ବେଲ (୭୮) ଓ ଏବି ଡି’ ଭିଲର୍ସ (୭୬)ଙ୍କ ଯୋଗୁ ଏହା ସମ୍ଭବ ହୋଇପାରିଥିଲା। ଦୁହିଁଙ୍କ ଇନିଂସରେ ସାମିଲ ଥିଲା ୯ ଲେଖାଏ ଚୌକା ଓ ୩ଟି ଲେଖାଏ ଛକା। ଦୁହେଁ କେକେଆର ବୋଲରଙ୍କୁ ଗ୍ରାଉଣ୍ଡର ଚାରି ଆଡ଼େ ଚୌକା ଓ ଛକା ଲଗାଇଥିଲେ। ଫଳରେ ପ୍ରଥମ ଦୁଇ ଓଭରରେ ଦୁଇ ଉଇକେଟ ନେଇଥିବା କେକେଆର ବୋଲରମାନେ ପରବର୍ତ୍ତୀ ସମୟରେ ମ୍ୟାଚ୍କୁ ଫେରି ପାରି ନ ଥିଲା।
