ବାଲିଗୁଡ଼ା,୧୫ା୭(ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲା ବାଲିଗୁଡ଼ା ଥାନା ଅନ୍ତର୍ଗତ ଡହଲପଡ଼ି ଗ୍ରାମର ଆଦିବାସୀ ଯୁବକ ଅଙ୍ଗଦ ମଲ୍ଲିକ ମୁମ୍ବାଇ କାମ କରିବାକୁ ଯାଇଥିବା ବେଳେ ଦୁଇ ହାତ ହରାଇ ଘରକୁ ଫେରିବା ଘଟଣା ଦିନକୁ ଦିନ ଜଟିଳ ହେବାରେ ଲାଗିଛି। ଏପ୍ରିଲ ୨୭ରେ ଅଙ୍ଗଦ ମଲ୍ଲିକ ଓ ସାଥୀ ରବି ସାହାଣୀ ମିଶି ମୁମ୍ବାଇ କାମ କରିବା ପାଇଁ ଯାଇଥିଲେ। ସେଠାରେ ଅଜଣା ଦୁର୍ବୃତ୍ତଙ୍କ ଆକ୍ରମଣରେ ଅଙ୍ଗଦ ହାତ ହରାଇଥିବା ବାଲିଗୁଡ଼ା ଥାନାରେ ପରିବାର ଲୋକେ ଅଭିଯୋଗ କରିଥିଲେ। ଏହା ପରେ କନ୍ଧମାଳ ଏସ୍ପିଙ୍କ ନିର୍ଦ୍ଦେଶ କ୍ରମେ ବାଲିଗୁଡ଼ା ଥାନାରୁ ଏକ ଟିମ୍ ଘଟଣାର ତଦନ୍ତ ପାଇଁ ମୁମ୍ବାଇ ଯାଇଥିଲେ। ସେଠାରେ ୧୦ ଦିନ ରହି ବିଭିନ୍ନ ଅଞ୍ଚଳ ବୁଲି ଘଟଣାର ତଦନ୍ତ କରିଥଲେ। ଏହା କୌଣସି ଦୁର୍ବୃତ୍ତ ନୁହେଁ ଏକ ରେଳ ଦୁର୍ଘଟଣାରେ ହାତ କଟିଥିବା ପ୍ରାଥମିକ ତଦନ୍ତରୁ ପୋଲିସକୁ ସୂଚନା ମିଳିଛି। ଏନେଇ କଲ୍ୟାଣ ନଗର ରେଳଷ୍ଟେଶନ ଥାନାରେ ମେ’ ୧ରେ ଏକ ମାମଲା ରୁଜୁ କରାଯାଇଛି। ମୁମ୍ବାଇ ପାଇଁ ଯାଇଥିବା ଟିମ୍ ମୁଖ୍ୟ ଆଶୁତୋଷ ପାଇକରାୟ ସବିଶେଷ ତଥ୍ୟ ଖୁବ୍ଶୀଘ୍ର ପ୍ରଦାନ କଲେ ସମସ୍ତ ତଥ୍ୟ ପ୍ରଦାନ କରାଯିବ ବୋଲି ଥାନାଧିକାରୀ ବାବା ଶଙ୍କର ସରାଫ ପ୍ରକାଶ କରିଛନ୍ତି।
