ଜି. ଉଦୟଗିରି,୨୨।୧୧(ଡି.ଏନ୍.ଏ.): ଜି. ଉଦୟଗିରି ଆଇସିଡିଏସ୍ କାର୍ଯ୍ୟାଳୟ ସମ୍ମୁଖରେ ମଙ୍ଗଳବାର ବିଭିନ୍ନ ଦାବି ନେଇ ଅଙ୍ଗନଓ୍ବାଡି କର୍ମୀ ଏବଂ ସହାୟିକା ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିଛନ୍ତି ।
ରାଜ୍ୟ ସରକାର ବିଭିନ୍ନ ସମୟରେ ପ୍ରତିଶ୍ରୁତି ଦେଇ ମଧ୍ୟ ଦାବି ପୂରଣ କରୁ ନ ଥିବା ଯୋଗୁ ଧାରଣାରେ ବସିଥିବା କର୍ମୀମାନେ ପ୍ରକାଶ କରିଛନ୍ତି। ପ୍ରମୁଖ ଦାବି ମଧ୍ୟରେ ଅଙ୍ଗନଓ୍ବାଡିକର୍ମୀଙ୍କୁ ସମ୍ପୂର୍ଣ୍ଣ ସରକାରୀ ମାନ୍ୟତା, ମାସିକ ୨୧ହଜାର ଟଙ୍କା ଦରମା ପ୍ରଦାନ, ମିନିକର୍ମୀମାନଙ୍କୁ ଅଙ୍ଗନଓ୍ବାଡି କର୍ମୀ ଘୋଷଣା, ରନ୍ଧା ଖାଦ୍ୟର ମୂଲ୍ୟ ବୃଦ୍ଧି ସହ ତୁରନ୍ତ ବିଭିନ୍ନ ଦାବି ପୂରଣ କରିବାକୁ କର୍ମୀମାନେ ଦାବି କରିଛନ୍ତି। ଦାବି ପୂରଣ ହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ସଭାନେତ୍ରୀ ଜ୍ୟୋତ୍ସ୍ନା ନାୟକ, ଉପ ସଭାନେତ୍ରୀ ରାଜଲକ୍ଷ୍ମୀ ମହାପାତ୍ର ଓ ସମ୍ପାଦିକା ରୁକୁମା ଦିଗଲ କହିଛନ୍ତି। ଆନ୍ଦୋଳନରେ ଜି. ଉଦୟଗିରି ବ୍ଲକର ୧୧୫ ଅଙ୍ଗନଓ୍ବାଡି କର୍ମୀ ସହାୟିକାଙ୍କ ସହ ୨୨୪ଜଣ କର୍ମୀ ସାମିଲ ରହିଛନ୍ତି।