କାକଟପୁର,୩।୨(ଡି.ଏନ୍.ଏ.): ଚଳିତ ମାସ ୧ ତାରିଖରୁ ରାଜ୍ୟରେ ଥିବା ସମସ୍ତ ଅଙ୍ଗନଓ୍ବାଡି କେନ୍ଦ୍ର ଖୋଲିଛି। ହେଲେ କାକଟପୁର ବ୍ଲକ କୁଣ୍ଢେଇ ପଞ୍ଚାୟତର ବାଜପୁର ଗ୍ରାମରେ ଥିବା ୨ ଅଙ୍ଗନଓ୍ବାଡି କେନ୍ଦ୍ର ଅସୁରକ୍ଷିତ ଭାବେ ଏକ ବିଦ୍ୟାଳୟର ଗୃହରେ ଚାଲିଥିବା ଦେଖିବାକୁ ମିଳିଛି। କାନ୍ଥ ସବୁ ଫାଟିଯାଇଥିବା ବେଳେ ଆଜବେଷ୍ଟସ ପ୍ରାୟ ଭାଙ୍ଗିଗଲାଣି। ସେହି ଦୁଇ ଅଙ୍ଗନଓ୍ବାଡ଼ି କେନ୍ଦ୍ରର ନିଜସ୍ବ ଗୃହ ପାଇଁ ଅଧା କାର୍ଯ୍ୟ ହୋଇ ୨ବର୍ଷ ହେବ ସେଭଳି ପଡ଼ିରହିଛି। ଏହି ୨ ନୂତନ କେନ୍ଦ୍ରରେ ରୋଷେଇ ଘର, ପିଇବାପାଣି ବ୍ୟବସ୍ଥା, ବିଦ୍ୟୁତ୍ ଓ ଆନୁଷଙ୍ଗିକ ସୁବିଧା ନ ଥିବାରୁ ଖୋଲାଯାଇ ପାରୁ ନାହିଁ। ଫଳରେ ଗୃହ ଦୁଇଟି ସ୍ଥାନୀୟ ଲୋକ କବ୍ଜା କରି ନିଜସ୍ବ ବ୍ୟବହାର କରୁଥିବା ଦେଖିବାକୁ ମିଳିଛି। ବିଦ୍ୟାଳୟ ହତା ମଧ୍ୟରେ କାର୍ଯ୍ୟ କରୁଥିବା ୨ଟି ଅଙ୍ଗନଓ୍ବାଡି କେନ୍ଦ୍ରରେ ୪୦ରୁ ଊର୍ଦ୍ଧ୍ୱ ଶିଶୁ ଆସୁଥିବାବେଳେ ବିପଦସଙ୍କୁଳ ଅବସ୍ଥାରେ ଅଧ୍ୟୟନ କରୁଛନ୍ତି। ବ୍ଲକ ପ୍ରଶାସନିକ ଅଧିକାରୀଙ୍କର ଅପାରଗତା ସହ ନିର୍ମାଣ କରୁଥିବା ଠିକାଦାର ମନମୁଖି କାର୍ଯ୍ୟ କରିଥିବାରୁ ଏଭଳି ଅବସ୍ଥା ହୋଇଥିବା ଲୋକେ ଅଭିଯୋଗ କରିଛନ୍ତି। ତେଣୁ ତୁରନ୍ତ ବ୍ଲକ ପ୍ରଶାସନ ବାକି ଥିବା କାର୍ଯ୍ୟ ଶେଷ କରି କେନ୍ଦ୍ରକୁ ଉକ୍ତ ଗୃହକୁ ହସ୍ତାନ୍ତର କରିବାକୁ ଦାବି ହେଉଛି।