କୋରେଇ,୨୭ା୫(ସ୍ବ.ପ୍ର.): କୋରେଇ ବ୍ଲକ ତଳଗଡ଼ ପଞ୍ଚାୟତ ଉପୁଳାଇ ଅଙ୍ଗନୱାଡି ଗୃହ ପିଲାଙ୍କ କାମରେ ଲାଗୁନି। ଦୁଇବର୍ଷ ହେଲା ଏହାର ନିର୍ମାଣ କାର୍ଯ୍ୟ ଶେଷ ହୋଇଥିଲେ ମଧ୍ୟ ପିଲା ଏଠାରେ ପଢିବାର ସୁଯୋଗ ପାଉନାହାନ୍ତି। ୫ ଲକ୍ଷ ଟଙ୍କାରୁ ଊର୍ଦ୍ଧ୍ୱ ବ୍ୟୟ ଅଟକଳରେ ଯେଉଁ ଉଦ୍ଦେଶ୍ୟରେ ଏହା ନିର୍ମିତ ହୋଇଥିଲା ତାହା କାମରେ ଆସୁନି। ଫଳରେ ଅଙ୍ଗନୱାଡିର ନିଜସ୍ବ ଗୃହ ଥିଲେ ମଧ୍ୟ କୋମଳମତି ପିଲାଙ୍କୁ ବାର ଓଳି ହେବାକୁ ପଡୁଛି। ଏପରି କି ପିଲା କେତେବେଳେ ବ୍ୟକ୍ତିଗତ ଘରେତ ଆଉ କେବେ ଗଛ ତଳେ ଓ ଗାଁ ସ୍କୁଲର କେଉଁ ଏକ କୋଠରୀରେ ପାଠ ପଢ଼ୁଛନ୍ତି। ଏହା ଉଦ୍ଘାଟନ ହୋଇ ପାରୁ ନ ଥିବାରୁ ଏଭଳି ଅବ୍ୟବସ୍ଥା ସୃଷ୍ଟି ହୋଇଥିବା ଶୁଣିବାକୁ ମିଳୁଛି। ୨୦୦୦ ମସିହାରେ ଉକ୍ତ ଅଙ୍ଗନଓ୍ବାଡି କେନ୍ଦ୍ରଟି ପ୍ରତିଷ୍ଠା ଲାଭ କରିଥିବା ବେଳେ ୨୦୧୨ ମସିହାରେ ଏହାର ନିଜସ୍ବ ଗୃହ ନିର୍ମାଣ ପାଇଁ ଅନୁଦାନ ମଞ୍ଜୁର ହୋଇଥିଲା। ହେଲା ଜମି ନିରୂପଣକୁ ନେଇ ବାଦାନୁବାଦ କାରଣରୁ ୭ ବର୍ଷ ପରେ ଗ୍ରାମରେ ଜାଗା ଚିହ୍ନଟ ହୋଇ କାର୍ଯ୍ୟ ଆରମ୍ଭ ହୋଇଥିଲା। ତେବେ ଦୁଇ ବର୍ଷ ପରେ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇ ଥିଲେ ମଧ୍ୟ ପିଲାଙ୍କୁ ଏଠାରେ ପଢିବାର ସୁଯୋଗ ମିଳିନାହିଁ। ଉକ୍ତ ଅଙ୍ଗନଓ୍ବାଡି କେନ୍ଦ୍ର ଅଧୀନରେ ଏହି ଗ୍ରାମ ସମେତ ହରିଚନ୍ଦନପୁର ଓ ମଙ୍ଗରାଜପୁର (ବନ୍ଦୀ) ପ୍ରଭୃତି ଗ୍ରାମ ରହିଛି। ତେଣୁ ଅଙ୍ଗନଓ୍ବାଡି ଗୃହକୁ ତୁରନ୍ତ କାର୍ଯ୍ୟକ୍ଷମ କରିବା କ୍ଷେତ୍ରରେ ସ୍ଥାନୀୟ ବିଧାୟକ, ସରପଞ୍ଚ, ବିଡିଓ ଏବଂ ମହିଳା ଶିଶୁ ବିକାଶ ଅଧିକାରୀ ଦୃଷ୍ଟିଦେବାକୁ ଦାବି ହୋଇଛି।