ଭବାନୀପାଟଣା,୧୦।୪(ସ୍ବ.ପ୍ର.): କଳାହାଣ୍ଡି ଜିଲା ଭବାନୀପାଟଣା ବ୍ଲକ ଦେପୁର ସେକ୍ଟର ଅଧୀନ ଉପକାଭଟ୍ଟାର ଅଙ୍ଗନଓ୍ବାଡ଼ି କର୍ମୀ ଝୁନୁପମା ଶତପଥୀ ନକଲି ସ୍କୁଲ ଲିଭିଂ ସାର୍ଟିଫିକେଟ ଦେଇ ଚାକିରି କରିଥିବା ଅଭିଯୋଗ ହୋଇଛି। ଏହା ପରେ ତାଙ୍କୁ ବହିଷ୍କାର ପାଇଁ ଭବାନୀପାଟଣା ଡିଏସ୍ଡବ୍ଲ୍ୟୁ ପକ୍ଷରୁ ଗ୍ରାମୀଣ ଆଇସିଡିଏସ ସିଡିପିଓଙ୍କୁ ନିର୍ଦ୍ଦେଶ ଦେବା ସହ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି। ପ୍ରକାଶ ଯେ, ଉପକାଭଟ୍ଟା ଅଙ୍ଗନଓ୍ବାଡ଼ି କେନ୍ଦ୍ରର କର୍ମୀ ଭାବେ ଝୁନୁପମା ଶତପଥୀ ନିଯୁକ୍ତି ପାଇଥିଲେ। ସେ ଭବାନୀପାଟଣା ସରକାରୀ ବାଳିକା ଉଚ୍ଚ ବିଦ୍ୟାଳୟରୁ ଆଣିଥିବା ସ୍କୁଲ ଲିଭିଂ ସାର୍ଟିଫିକେଟ ନକଲି ଥିବା ଜଣାପଡ଼ିବା ପରେ ଏହି ସ୍କୁଲ ପରିତ୍ୟାଗ ସାର୍ଟିଫିକେଟରେ ସ୍କୁଲରେ ୧୦।୦୩।୧୯୬୧ ଥିବାବେଳେ ଜାଲ କରି ଏହି ସାର୍ଟିଫିକେଟରେ ୧୯୬୫ ମାର୍ଚ୍ଚ ୧୦ ତାରିଖ ବୋଲି ଉଲ୍ଲେଖ କରିଥିଲେ। ଘଟଣାର ତଦନ୍ତ ପରେ ସ୍କୁଲର ପରିତ୍ୟାଗ ସାର୍ଟିଫିକେଟ ସହ ତାଳମେଳ ରହି ନ ଥିଲା। ଏହି ଘଟଣାରେ କଳାହାଣ୍ଡି ଡିଏସଡବ୍ଲ୍ୟୁ ଚିଠି ନଂ୧୯୩/୧୯।୦୧।୨୦୨୩ରେ ଝୁନୁପମାଙ୍କୁ କାର୍ଯ୍ୟରୁ ବହିଷ୍କାର ପାଇଁ ନିର୍ଦ୍ଦେଶ ଦେଇଛନ୍ତି। ସେହିପରି ୨୦୨୧ ଏପ୍ରିଲ ୧ରୁ ବର୍ତ୍ତମାନ ପର୍ଯ୍ୟନ୍ତ ଦରମା ଟଙ୍କା ଭରଣା ପାଇଁ ପଦକ୍ଷେପ ନେବା ସହ ଅପରାଧିକ ମାମଲା ରୁଜୁ କରିବାକୁ ଭବାନୀପାଟଣା ଗ୍ରାମୀଣ ସିଡିପିଓଙ୍କୁ ନିର୍ଦ୍ଦେଶ ଦେଇଛନ୍ତି। ଘଟଣାର ତଦନ୍ତ ପାଇଁ ଅଞ୍ଜନ ରଥ ଜିଲାପାଳଙ୍କୁ ଲିଖିତ ଭାବେ ଅଭିଯୋଗ କରିଥିଲେ। ଘଟଣା ପ୍ରଘଟ ହେବା ପରେ ନକଲି ସାର୍ଟିଫିକେଟ ଥିବା ବହୁ ଅଙ୍ଗନଓ୍ବାଡି କର୍ମୀ ଓ ଅନ୍ୟ ବିଭାଗୀୟ କର୍ମଚାରୀଙ୍କ ମଧ୍ୟରେ ଏବେ ଛନକା ପଶିଛି।
