ବଲସକୁମ୍ପା, ୧୦ା୧୨: ଖଜୁରୀପଡ଼ା ବ୍ଲକର ସମସ୍ତ ଅଙ୍ଗନୱାଡି କର୍ମୀ ଶୁକ୍ରବାର ସକାଳୁ ଦୁତିମେଣ୍ଡି ଗ୍ରାମପଞ୍ଚାୟତ ସମ୍ବେପଦରଠାରେ ଥିବା ଛତୁଆ ପ୍ରସ୍ତୁତ କମ୍ପାନୀରୁ ଗୋଟିଏ ପିକ୍ଅପ ଗାଡ଼ିରେ ଛତୁଆ ବୋଝେଇ ହୋଇ ବାହାରୁଥିବା ଖବର ପାଇବା ପରେ ସେଠାରେ ପହଞ୍ଚି ଗାଡିକୁ ଅଟକ ରଖିବା ସହ ବିଭିନ୍ନ ସରକାରୀ ବିରୋଧୀ ନାରା ଦେଇ ନ୍ୟାୟ ଦାବି କରିଥିଲେ। ବହୁଦିନ ଧରି ରାଜଧାନୀରେ ଅଙ୍ଗନୱାଡି କର୍ମୀ ସେମାନଙ୍କୁ ଉଚିତ୍ ଦରମା ଏବଂ ସେମାନଙ୍କୁ ସମସ୍ତ ସୁବିଧା ସୁଯୋଗ ପ୍ରଦାନ ପାଇଁ ରାଜ୍ୟ ସରକାରଙ୍କ ପାଖରେ ଆନ୍ଦୋଳନ କରୁଥିବା ବେଳେ ତାହା ଜିଲା ଏବଂ ବ୍ଲକ ସ୍ତରରେ ମଧ୍ୟ ଚାଲୁ ରହିଛି। ଫଳରେ ବହୁଦିନ ଧରି ଅଙ୍ଗନୱାଡି କେନ୍ଦ୍ରରେ ତାଲା ଝୁଲୁଥିବା ବେଳେ କୋମଳମତି ଶିଶୁ ଏବଂ ଗର୍ଭବତୀ ମା’ମାନଙ୍କୁ ଅଣ୍ଡା ଛତୁଆ ପହଞ୍ଚାଇବା ଭଳି କାର୍ଯ୍ୟ ବାଧାପ୍ରାପ୍ତ ହୋଇଛି। ଶୁକ୍ରବାର ସକାଳୁ ଆର.ନୂଆଁଗାଁ ସର୍କଲ ସୁପରଭାଇଜର ସୁଜିତା ସାହୁ ଏକ ପିକଅପ ଗାଡିରେ ଛତୁଆ ବୋଝେଇ କରି ବିଭିନ୍ନ କେନ୍ଦ୍ରରେ ବଣ୍ଟନ ପାଇଁ ପ୍ରସ୍ତୁତ ହେଉଥିବା ବେଳେ ଅଙ୍ଗନୱାଡି କର୍ମୀ ଗାଡି ଅଟକାଇବା ସହ ସୁପରଭାଇଜରଙ୍କ ସାମ୍ନାରେ ନାରାବାଜି କରିଥିଲେ। ଯେ ପର୍ଯ୍ୟନ୍ତ ସାରା ରାଜ୍ୟର ଲକ୍ଷଲକ୍ଷ ଅଙ୍ଗନୱାଡି କର୍ମୀମାନଙ୍କୁ ସେମାନଙ୍କ ଉଚିତ ନ୍ୟାୟ ନ ମିଳିଛି ସେପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଉପସ୍ଥିତ ସମସ୍ତ ଅଙ୍ଗନୱାଡି କର୍ମୀ ସୂଚନା ଦେଇଥିଲେ।