ଗାଲେ, ୨୩ା୧-ସ୍ଥାନୀୟ ଗାଲେ ଇଣ୍ଟରନ୍ୟାଶନାଲ ଷ୍ଟାଡିୟମରେ ଶୁକ୍ରବାରଠାରୁ ଆରମ୍ଭ ହୋଇଥିବା ଇଂଲଣ୍ଡ ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟରେ ଶ୍ରୀଲଙ୍କା ଆଞ୍ଜେଲୋ ମାଥ୍ୟୁସଙ୍କ ଅପରାଜିତ ଶତକ ସହାୟତାରେ ପ୍ରଥମ ଦିବସ ଖେଳ ଶେଷ ସୁଦ୍ଧା ୪ ଉଇକେଟରେ ୨୨୯ ରନ କରିଛି। ଜେମ୍ସ ଆଣ୍ଡରସନଙ୍କ ଚମତ୍କାର ବୋଲିଂ ଯୋଗୁ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଘରୋଇ ଦଳର ଆରମ୍ଭ ଉତ୍ସାହଜନକ ହୋଇପାରି ନ ଥିଲା। ଜେମ୍ସ ପ୍ରଥମେ କୁଶାଲ ପେରେରା (୬) ଓ ଓସାଣ୍ଡା ଫର୍ନାଣ୍ଡୋ (୦) ଙ୍କୁ ଶୀଘ୍ର ଆଉଟ କରିଦେଇଥିଲେ। ପରେ ଓପନର ଲାହିରୁ ଥିରିମାନେ(୪୩) ତାଙ୍କ ବୋଲିଂର ଶିକାର ହୋଇଥିଲେ। ଫଳରେ ଶ୍ରୀଲଙ୍କା ୭୬ ସ୍କୋରରେ ଏହାର ୩ଟି ଉଇକେଟ ହରାଇ ସାରିଥିଲା। ତେବେ ଚତୁର୍ଥ ଉଇକେଟରେ ଆଞ୍ଜେଲୋ ମାଥ୍ୟୁସ (୧୦୭*) ଓ ଅଧିନାୟକ ଦିନେଶ ଚାଣ୍ଡିମଲ (୫୨)ଙ୍କ ମଧ୍ୟରେ ଶତକୀୟ ଭାଗୀଦାରି (୧୧୭) ଯୋଗୁ ଦଳର ବ୍ୟାଟିଂ ସ୍ଥିତିରେ ସୁଧାର ଆସିପାରିଥିଲା। ଚାଣ୍ଡିମଲଙ୍କୁ ମାର୍କ ଉଡ୍ ଏଲ୍ବିଡବ୍ଲ୍ୟୁ କରି ଏହି ପାର୍ଟନରଶିପ୍କୁ ଭଙ୍ଗ କରିଦେଇଥିଲେ। ଷ୍ଟମ୍ପ ଅପସାରଣ ବେଳକୁ ମାଥ୍ୟୁସଙ୍କ ସହ ଉଇକେଟକିପର ନିରୋଶାନ ଡିକ୍ଓ୍ବେଲା ୧୯ରନ କରି ଅପରାଜିତ ରହିଛନ୍ତି।
ସଂକ୍ଷିପ୍ତ ସ୍କୋର
ଶ୍ରୀଲଙ୍କା ପ୍ରଥମ ଇନିଂସ: ୨୨୯/୪ (ଆଞ୍ଜେଲୋ ମାଥ୍ୟୁସ-୧୦୭*, ଦିନେଶ ଚାଣ୍ଡିମଲ୍-୫୨, ଲାହିରୁ ଥିରିମାନେ-୪୩, ଜେମ୍ସ ଆଣ୍ଡରସନ-୩/୨୪)।