ଅନୁଗୋଳ ଅଫିସ, ୧।୧।୦ : ଅନୁଗୋଳ ସହର ବଜାରରେ ଥିବା ଦୁର୍ଗାଶଙ୍କର ପୂଜା ସମିତି ପକ୍ଷରୁ ମା’ଙ୍କ ପୂଜା ପାଇଁ ଧୁମ୍ଧାମରେ କରାଯାଇଛି ଆୟୋଜନ। ଚଳିତବର୍ଷ ୮୫ ବର୍ଷରେ ପାଦ ଥାପିବାକୁ ଯାଉଛି ସମିତିର ପୂଜା। ସ୍ଥାୟୀ ମଣ୍ଡପ ଥିବାରୁ ଏହା ସାଜସଜ୍ଜାରେ ଖୁବ୍ ସହାୟକ ହୋଇଛି। ଆକର୍ଷଣୀୟ ମୂର୍ତ୍ତି, ମେଢ଼, ତୋରଣ ପ୍ରସ୍ତୁତ ହୋଇସାରିଥିବା ବେଳେ ରଙ୍ଗିନ ଆଲୋକମାଳାରେ ଅଞ୍ଚଳ ଝଲସି ଉଠୁଛି।
୧୯୩୭ରେ ଏଠାରେ ପ୍ରଥମେ ମା’ଙ୍କୁ ଆବାହନ କରାଯାଇଥିଲା। ପୂର୍ବରୁ ବାଉଁଶରେ ମଣ୍ଡପ ନିର୍ମାଣ କରାଯାଉଥିବା ବେଳେ ସେପରି ଆଡ଼ମ୍ବର ନ ଥିଲା। ହେଲେ ମା’ଙ୍କ କୃପାରୁ ଏବେ ବଡ଼ ଓ ସ୍ଥାୟୀ ମଣ୍ଡପ ନିର୍ମାଣ ହୋଇପାରିଛି। ୨୦୧୦ଠାରୁ ସ୍ଥାୟୀ ମଣ୍ଡପରେ ପୂଜାର୍ଚ୍ଚନା କରାଯାଉଛି। ଷଷ୍ଠୀରୁ ଆରମ୍ଭ ହେବାକୁ ଯାଉଥିବା ପୂଜାରୁ ଏଠାରେ ବିଶ୍ୱଶାନ୍ତି ମହାଯଜ୍ଞ ପାଇଁ ଅଧିବାସ ହେବ। ଏହି ଯଜ୍ଞ ୫ ଦିନ ଧରି ଚାଲିବ। ଯଜ୍ଞ ପାଇଁ ୨୧ ଜଣ ପଣ୍ଡିତଙ୍କୁ ବରଣୀ କରାଯିବ। ମା’ଙ୍କ ନିକଟରେ ପ୍ରତ୍ୟେକ ଦିନ ଅନ୍ନପ୍ରସାଦ ଲାଗିହେବ। ସପ୍ତମୀରେ ଚକ୍ଷୁଦାନ, ଅଷ୍ଟମୀରେ ମହାଷ୍ଠମୀ ପୂଜା ଓ ସନ୍ଧି ପୂଜା, ନବମୀରେ କୁମାରୀ ପୂଜନ ସହ ଦଶମୀରେ ମୃଣ୍ମୟୀମୂର୍ତ୍ତି ବିସର୍ଜନ କରାଯାଇଥାଏ। ତେବେ ଦଶମୀରେ ଦହି ପଖାଳ ଅନ୍ନ ଏଠାକାର ଅନ୍ୟତମ ମୁଖ୍ୟ ଆକର୍ଷଣ। ଏହି ଅନ୍ନ ପ୍ରସାଦ ପାଇବା ପାଇଁ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଲାଗିବ। ଭସାଣି ଉତ୍ସବକୁ ବେଶ୍ ଧୁମ୍ଧାମ୍ରେ ପାଳନ କରାଯିବ ବୋଲି ଆୟୋଜକଙ୍କ ପକ୍ଷରୁ କୁହାଯାଇଛି। ସେହିପରି ପୂଜାକୁ ଆସୁଥିବା ଲୋକେ ଯେପରି ଭରପୂର ମଜା ନେଇପାରିବେ ସେଥିପାଇଁ ଦୁର୍ଗା ପଡ଼ିଆରେ ମିନା ବଜାରର ବ୍ୟବସ୍ଥା ହୋଇଛି। ବିଭିନ୍ନ ଘରକଣା ସାମଗ୍ରୀ ସହ ଚଟପଟା ଖାଦ୍ୟର ବହୁ ଷ୍ଟଲ ଲାଗିଛି। ରାମଦୋଳିଠାରୁ ଆରମ୍ଭ କରି ଡ୍ରାଗନ୍, ବ୍ରେକ୍ ଡ୍ୟାନ୍ସ, ବେଲୁନ୍ ଆଦି ଦୋଳି ପକାଯାଇଛି। ଏହି ଦୋଳି ଅନୁଗୋଳର କୌଣସି ମଣ୍ଡପ ନିକଟରେ ପଡ଼ି ନ ଥାଏ ବୋଲି ଆୟୋଜକଙ୍କ ପକ୍ଷରୁ କୁହାଯାଇଛି।
ସମସ୍ତ ପ୍ରସ୍ତୁତି ଶେଷ ହୋଇଛି
ଦୁଇ ବର୍ଷ ପରେ ମା’ଙ୍କ ପୂଜା ଧୁମ୍ଧାମରେ ଆୟୋଜନ କରାଯିବ। ଏଥିପାଇଁ ସମସ୍ତ ପ୍ରସ୍ତୁତି କାର୍ଯ୍ୟ ଶେଷ ହୋଇଛି। ପ୍ରବଳ ଜନସମାଗମ ହେବାକୁ ଥିବାରୁ ଶୃଙ୍ଖଳାର ପୂଜା ପାଇଁ ବ୍ୟବସ୍ଥା କରାଯାଇଛି। ମଣ୍ଡପ ନିକଟରେ ମା’ଙ୍କ ଏକ ସ୍ଥାୟୀ ମନ୍ଦିର କରାଯିବାର ଯୋଜନା ହେଉଛି।
-ସୁନୀଲ କୁମାର ସାହୁ, ସଭାପତି
ସୁନ୍ଦର ବାତାବରଣ ସୃଷ୍ଟି ହୋଇଛି
ମା’ଙ୍କ ପୂଜା ପାଇଁ ଏକ ସୁନ୍ଦର ବାତାବରଣ ସୃଷ୍ଟି ହୋଇଛି। ଫଳରେ ଚଳିତ ପୂଜା ଦେଖିବାକୁ ସହସ୍ରାଧିକ ଲୋକ ଆସିବେ। ମା’ଙ୍କ ଆର୍ଶୀବାଦରୁ ଅଦ୍ୟାବଧି ସୁରୁଖୁରରେ ପୂଜା ଆୟୋଜନ ହୋଇଆସୁଛି। ଏଥର ମଧ୍ୟ ଆଡ଼ମ୍ବରରେ ପୂଜା ଓ ଭସାଣି ଶେଷ ହେବ।
-ପୀୟୂଷକାନ୍ତି ମହୁରୀ, ସମ୍ପାଦକ
ଶୃଙ୍ଖଳିତ ପୂଜା ଉପରେ ଧ୍ୟାନ ଦିଆଯାଉଛି
ମଣ୍ଡପରେ ମା’ଙ୍କ ସମସ୍ତ ରୀତିନୀତି କିପରି ଶୃଙ୍ଖଳିତ ହୋଇପାରିବ ତାହା ଉପରେ ଅଧିକ ଧ୍ୟାନ ଦିଆଯାଉଛି। ପାର୍ବଣ ଆସିଥିବାରୁ ଏକତାର ସୂତାରେ ସମସ୍ତେ ବାନ୍ଧି ହେବେ। ଏହା ଅଞ୍ଚଳର ଭାଇଚାରାକୁ ଅଧିକ ସୁଦୃଢ଼ କରିବ।
-ଅଶୋକ କୁମାର ସାହୁ, ଉପସଭାପତି
ମନୋରଞ୍ଜନ କରିବ ମେଳା
ମା’ଙ୍କ ଅପାର କରୁଣା ଯୋଗୁ ସବୁକିଛି ସମ୍ଭବ ହୋଇପାରୁଛି। ଆମେ କେବଳ ମାଧ୍ୟମ ହୋଇ କାର୍ଯ୍ୟ କରୁଛୁ। ମନୋରଞ୍ଜନ ପାଇଁ ମଣ୍ଡପ ନିକଟରେ ଯେପରି ମେଳା ଆୟୋଜନ ହୋଇଛି ତାହା ସହରର ଅନ୍ୟ କେଉଁଠାରେ ଦେଖିବାକୁ ମିଳିବ ନାହିଁ।
-ସୁବ୍ରତ କୁମାର ନନ୍ଦ, ସଦସ୍ୟ